ائید ءَ شھید ءُ بیگواھانی تْرانگ ءَ گوں سادھی ءَ بہ گْوازین اِت ' بی این ایم

بلوچ نیشنل موومنٹ ءِ بنجاھی جارکش ءَ گْوشتگ کہ زورگریں لشکر ءِ مھلوک ءِ سر ءَ جبراکی برجاہ اِنت ۔ تمپ ءَ آجوئی دوستیں راھشون اُستاد واجد کمبر ءِ لوگ ءِ سر ءَ اُرش ءُ چادر ءُ چار دیوال ءِ کم شرپ کنگ ءَ گوں ترندی ءَ ایر جن اِیں ۔

بنجاھی جارکش ءَ گْوشتگ کہ یک شمبے ءِ روچ ءَ زورگریں لشکریاں اُستاد واحدکمبر ءِ لوگ ءِ سر ءَ اُرش کُرتگ ءُ جنین ءُ چک تُرسینتگ اَنت ، لوگ ءَ لُٹ پُل کُرتگ ءُ پنچ مردم دزگیر کُرتگ کہ تمپ ءِ بھادریں چک ءُ جنیناں نندانک داتگ ءُ پچ گیپتگ اَنت ۔

آئی ءَ گْوشتگ انچوش راجی سنچ ءُ جھد ءِ تہ ءَ پھتوی آیان اِنت ءُ جھد ءِ مھلوک ءِ کمک ءُ پلہ مرزی ءَ منزل ءَ جنزان اِنت زورگر ءِ ریٹوی گیش بوان اِنت ءُ آ ھمے پیم مھلوک ءِ سر ءَ اُرش کنگ ءَ اِنت ' آجوئی لوٹوکیں گل ، راھشونانی لوگ ءُ سیاد ءُ سانگبندانی سر ءَ جبراکی گیش بوان اِنت ۔

بنجاھی جارکش ءَ ائید ءِ روچ ءَ وائس فار بلوچ مسنگ پرسنز ءِ نیمگ ءَ زھرشانی روانک ءُ بی ایس او آزا ءِ زھرشانی کیمپ ءِ پلہ مرزی ءِ جار جنان ءَ جھدکاراں گْوشتگ کہ ایشانی تہ ءَ المی ءَ بھر بہ زور اَنت ۔

جارکش ءَ چَہ راج ءَ دزبندی کُرتگ کہ راج گوں سادھی ءَ ائید بہ کنت ، کلیں بنزہ ءُ ھنکین شھیدانی مانشانی سر ءَ برو اَنت ءُ پہ زور گار کُرتگیں بلوچ پسگانی تْرانگ ءَ ائید ءَ سادھی بہ گْوازین اَنت ۔ />