پہ جھدکاارنی گیر کنگ ءَ دز ءُ ٹیک آزاد کنگ بوتگ اَنت' شھیدعلی شیر ءِ لوگ ءِ سر ءَ بیڑ دژمن ءِ پُروش اِنت' بی این ایم

شال : بلوچ نیشنل موومنٹ ءِ بنجاھی جارکش ءَ گْوشتگ کہ سرجمیں بلوچستان ءَ زورگر ءِ جبر ءُ زور برجاہ اِنت ، نوکیں دْرچے ءِ پد ءَ شھیدانی ادیرہ ءُ آھانی لوگاں پترگ ءُ  بے شرپی کنگ بوگ ءَ اِنت ۔ گْوستگیں روچ ءَ شھید علی شیر کرد ءِ لوگ ءِ سر ءَ بیڑ برگ ءُ گوں آئی ءِ مکھیں مات ءَ بدزبانی کنگ بوتگ ، ما اے کارپد ءَ تْرندی ءَ ایرجن ءُ ایشی ءَ زورگر ءِ ریٹوی ءُ بلوچ ءِ سوبمندی سرپد بَہ اِیں کہ زورگر پہ وتی پُروش ءِ چیردیگ ءَ ھمے رنگیں کپتگیں کار کنگ ءَ اِنت ۔

زورگریں لشکریاں مچ ءَ شھید علی شیر کُرد ءِ لوگ ءِ سر ءَ بیڑ بُرتگ ءُ نہ ایوک لُٹ ءُ پُل کُرتگ بلکیں آئی ءِ مکھیں مات ءَ گوں ھم بدزبانی کُرتگ ۔

دومی  نیمگ ءَ زورگریں ریاست ءِ پلہ مرزی ءَ مذھبی دھشت گردانی کمک ءَ بلوچ جنین آدمانی سر ءَ تیزاپ پرریچگ ، اسکولانی بند کنگ ھمے دْرچ ءِ بھر اَنت کہ زورگر گوں وتی زیردستیں راج ءَ کن اَنت ۔

خاران ءَ ھمیشانی پلہ مرزی ءَ بازیں جاھاں بلوچ پسگ آوار جنگ ءُ آزار دیگ بوگ ءَ اَنت مارا ترس اِنت زیت مکوران ءِ وڑ ءَ اد ءَ ھم کتاب ءُ اسکولانی سر ءَ بندش جنگ ءُ پہ بلوچاں وانگ ءِ دروازگ بند کنگ بنت ۔

بنجاھی جارکش ءَ گْوشتگ کہ شھیدعلی شیرکرد ، شھید کچکول علی بھار ءُ دگہ شھیدانی  ادیرھانی پُروشگ ءُ لوگانی سر ءَ اُرش ، یکگور کُرتگیں میتانی درکپگ ، اسلام ءِ نام ءِ سر ءَ بے دینیں ریاست ءِ جبراکی ءِ بدتریں درور اَنت ۔

کیچ ءِ بازیں دمگاں زورگریں لشکریانی مھلوک ءِ سر ءَ جبر ءُ زور برجاہ اِنت وھدے کہ ریاستی زورگریں لشکری ، آئی ءِ چیریں ادارہ ءُ ڈیتھ اسکواڈ ءِ کارمند زیردسریں بلوچستان ءِ سرجمیں دمگاں پہ تمردیں سُنگ ءُ مالیات گرگ ءَ اَنت ، اے درگت ءَ آ نہ ایوک چَہ نیزگاریں مھلوک ءَ سُنگ گرگ ءَ اَنت بلکیں آجوئی لوٹوکیں جھدکاراں آوار جنگ ، شھید کنگ ءُ دزگیر کنائینگ ءَ ھم دیم ءَ اَنت ۔ زورگریں ریاست ءَ چاگردی سلکاریانی تہ ءَ ھواریں ، نشہ بھا کنوک ءُ آزاد کُرتگ اَنت کہ آ پہ سُنگ گری چُنگی ءُ یونین جوڑ بہ کن اَنت داں بلوچ آزادی ءِ جھد ءِ سرگرمیں جھدکار گیر بہ بنت ۔