چَہ خیر بخش گونگیں پسگانی شھادت ءَ راج ءِ تہ ءَ آگھی پیداک بوگ ءَ اِنت ' بی ایس او آزاد

شال : بی ایس او آزاد ءِ جارکش ءَ گوشتگ کہ بلوچ نیشنل موومنٹ آواران ھنکین ءِ کارمستر خیر بخش ءِ پاکستانی چیریں ادارھانی دست ءَ آوار ءُ بازیں جنگ ءُ جوپگ ءَ گوں شھید کنگ ءَ پد میت ءِ دور دیگ چَہ انسانی راھبنداں دریں دھشت گردی اِنت ۔ اے رنگیں کارمیان اُستمانی راھبنداں سرگوز کنگ اِنت ۔ اے درگت ءَ تپاکیں راجانی گل دلگوشگور بہ دنت ۔ جارکش ءَ گوشتگ کہ پاکستانی چیریں ادراہ ءُ آئی ءِ تُمنی کاسگ چٹ بلوچ ورناھانی شھید کنگ ءَ ھمے سرپد بنت کہ بلوچ ورنا چَہ آجوئی ءِ جھد ءَ دستکش بنت گڑا اے آھانی دپتری رَدی اِنت ۔ ھر چ بلوچ پسگے ءِ میت ءِ پجیگ ءَ راج ءِ تہ ءَ آگھی پیداک بوگ ءَ اِنت ءُ پاکستان ءِ نوک آبادی بندبست وتی آسر ءِ نیمگ ءَ روگ ءَ اِنت مروچی بلوچ راج چَہ پیشگین ءَ گیشتر مھکم ءُ ترام اِنت ۔ پاکستان ءُ آئی ءِ میان اُستمانی بدمعاش بلوچستان ءَ داں باز مدت ءَ نشت نہ بنت ۔ آ بلوچ گلزمین ءِ یلہ کنگ ءَ لاچار بنت ۔ داں وھدے کہ پاکستان ءُ ایران بلوچ سرزمین ءِ سر ءَ زورگر اَنت بلوچ راج آجوئی ءِ جھد برجاہ بیت پہ بلوچ گلزمین ءِ آجوئی ءَ شھادت مارا سر ءُ چمان اِنت بلے زورگر ءِ غلامی ءَ بھ نہ من اِیں ۔