بلوچانی کُشت ءُ کوش یکشل ءَ برجاہ اِنت ' شیرمحمدبگٹی

بلوچ ری پبلکن پارٹی ءِ  بنجاھی جارکش شیرمحمد بگٹی ءَ گْوشتگ کہ بلوچستان ءِ چاریں پھناتاں ریاستی جبر ءِ دْرچ یکشل ءَ برجاہ اِنت بلوچ راج ءِ بگیری ءَ آپریشن ، میتگانی سر ءَ پہ وت بمب گْواری ، لوگانی تہ ءَ لُٹ پُل ، جنین ءُ چکاں تُرسینگ ءُ آھاں آزار دئیگ ، بلوچ ورنایاں آوار جنگ ءُ پہ زور بیگواہ کنگ ، جھدکاراں بدنامیں شکنجہ جاھانی تہ ءَ انسانیت سوچیں آزار دئیگ ءُ آھانی تلامیں کُنٹانی دگ ءُ ویرانگاں چگل دئیگ ءِ دْرچ برجاہ اِنت ۔

وتی شنگ کُرتگیں دْرشان ءِ تہ ءَ آئی ءَ گْوشتگ کہ میان اُستمانی واکمند ءُ منگھیں دنیا ءِ بے تواری ءَ بلوچ راج ءِ سر ءَ بیوکیں جبراکی گیش کُرتگ اَنت چَہ ھمیشی ءَ ریاستی لشکر ، چیریں ادارہ گوں نترسی ءَ بلوچ راج ءَ چُکچین کنگ ءَ اَنت آَئی ءَ گْوشتگ کہ مشکے ءِ ھنکین سراب ، کنداری ، مالار ءُ لاکی ءَ زورگریں لشکریاں سھب ءِ سر ءَ اُرش کُرت ءُ چَہ سد ءُ پنجاہ ءَ گیش مردم بیگواہ کُرتگ ۔

چَہ گْوستگیں روچ ءَ خاران ، نیوکاھان ءُ ڈیرہ بگٹی ءَ ریاستی جبر توانمندی ءَ برجاہ ءَ اِنت کہ آئی ءِ تہ ءَ بے میاریں بلوچ میتگانی سر ءَ زورگرانی بیڑ ءُ مردماں آزار دئیگ ھمروچیگیں کارے جوڑ بوتگ ءُ دنیگت چَہ دوسد ءَ گیش بے میاریں مردم دزگیر کنگ ءُ بیگواہ کنگ بوتگ کہ آھانی زندمانی ترس ءِ تہ ءَ اِنت پرچا کہ دنیگت چَہ زورگریں لشکر ءُ چیریں ادارھانی نیمگ ءَ بیست ھزار ءَ برز بلوچ پُسگ آوار جنگ بوتگ ءُ چَہ آھاں دوھزار ءَ گیش تلامیں جون چَگل دئیگ بوتگ ۔

آئی ءَ گْوشتگ کہ گْوستگیں روچ ءَ زورگراں پنجگور ءَ چتکان ءِ مانشجاہ ءَ بی آر پی ءِ شھیدیں جھدکار ساچن بلوچ ءِ مانش پُروشتگ ۔ اے کارپد زورگریں لشکر  ءِ تبی پُروش ءِ پدگْوانکی ءَ کنت ۔

بی آر پی انسانی حقانی پانک جنیں ادارہ ءُ گوں منگھیں دنیا ءَ دزبندی کنت کہ بلوچستان ءَ برجاھیں بلوچ ءِ چکچین کنگ ءُ ریاستی دھشت گردی ءِ نیمگ ءَ دلگوش گْور کنان میان اُستمانی راھبندانی پد ءَ وتی کرد ءَ پیلو بہ کنت ۔