غزہ ءَ بیوکیں زوراکیاں کلیں زیردستیں راجانی باندات ترس ءِ آماچ کُرتگ' بی این ایم

شال : بلوچ نیشنل موومںٹ ءِ بنجاھی جارکش ءَہ چَہ ازرائیل ءِ نیمگ ءَ فلسطین ء مھلوک ءِ نشانگ کنگ ایر جنان ءَ گْوشتگ کہ بی این ایم سامراجی واکانی ھمک کارپدانی بگیری ءَ توار چست کنت کہ چَہ آھاں زیردستاں آزار دیگ بہ بیت ۔ غزہ ءَ دگہ بلیک ستمبر وڑیں کارے بوگ ءَ اِنت چَہ ایشی ءَ کلیں زیردستیں راجانی باندات ترس ءِ آماچ اِنت ۔

اے درگت ءَ بلوچ راج ءِ ترس چَہ ھرکس ءَ گیش اَنت پرچا کہ 1948 ءَ زورگر ءِ دستیگ کنگ ءَ پد روچ مروچی ریاستی زوراکیانی سر ءَ انسانی حقانی پانک جنیں گل ءُ تپاکیں  راج  بلوچ گلزمین ءِ سر ءَ بیوکیں زورگری ءُ بلوچانی چُک چینی ءِ سر ءَ تْرک ءُ نک اَنت ۔ عرب لیگ ، انسانی حقانی پانک جنیں گل ، سلامتی کونسل ءِ پجیگ ءَ کلیں ادارہ فلسطینی مھلوک ءِ سر ءَ بیوکیں جبر ءِ بگیری ءَ توار چست کنگ ءَ اَنت کہ ما ھم ایشی ءَ جوانیں کارے سرپد بَہ اِیں ءُ گوں آھاں دزبندی کن اِیں کہ آ بلوچ راجی جیڑھے ءِ سر ءَ ھم توار چست بہ کن اَنت ۔

بلوچ وتی دپتری سرزمین ءِ سر ءَ انچیں ریاستے ءِ بندگ اَنت کہ آئی ءَ وت ءَ ناں راجی ناں ربیدگی دپترے ھست ءُ ناں کسے ءِ وژھالی ءِ مانزمان اِنت بلکیں 1970 ءِ بلیک ستمبر ءِ وھیل ءِ پجیگ ءَ  دنیا ءِ ایمنی ءِ ھلاس کنگ ءِ ذمہ وار اِنت ۔

پاکستان ءِ بلوچ سرزمین ءَ دستیگ کنگ ، بلوچ راج ءِ سر ءَ جبر ءُ زور ، مھلوک ءِ سر ءَ بم گواری ءُ بلوچ سرزمین ءِ سر ءَ وانگ ءِ بندش ءَ تپاک راجیں گل ، یورپی یونین ءُ امریکا انسانی وھیلے ءِ بستار ءَ چاران ءَ ریاستی زوراکیانی بگیری ءَ توار چست بہ کن اَنت ءُ کلیں زیردستیں راجانی آجوئی ءِ پلہ مرزی بہ کن اَنت ءُ بلوچ دژمن ریاست وڑیں دھشت گردیں ملکانی کمک ءَ بہ پھریز اَنت ۔