چاردہ اگست ءَ سندھ ءُ بلوچستان ءَ سیاھیں روچ دارگ بیت ' جسمم ۔ بی این ایف

جئے سندھ متحدہ محاذ ءُ بلوچ نیشنل فرنٹ  ءَ چاردہ اگست ءَ سندھ ءُ بلوچستان ءَ  سیاھیں روچ دارگ ءِ جار جتگ ۔ جئے سندھ متحدہ محاذ ءِ چیئرمین شفیع محمد برفت ءَ گْوشتگ کہ چاردہ اگست ءَ ما زورگریں ریاست ءِ واب ءُ تاھیراں پُل اِیں جھدکار شیوار بہ بنت پہ سندھو دیش ءِ آجوئی ءَ ، سرمتابیں جھد برجاہ بیت ۔

بلوچ نیشنل فرنٹ ءِ جارکش ءَ ھم پاکستان ءِ جوڑ بوگ ءِ روچ ءَ سرجمیں بلوچستان ءَ دربندی ءُ پرگ بندی جار جتگ ءُ گْوشتگ کہ پاکستان ءِ جوڑ بوگ ءِ روچ '' چاردہ اگست سیاھیں روچ '' ءِ بستار ءَ دارگ بیت ۔

آئی ءَ گْوشتگ کہ چاردہ اگست ءَ جوڑ بوتگیں مذھبی دھشت گردیں پاکستان بلوچانی بندگ کنگ ءِ پجیگ ءَ دنیا ءِ ایمنی ءَ تاوان دئیگ ءِ سبب جوڑ بوتگ ۔

جارکش ءَ گْوشتگ کہ بلوچانی بندگی ءِ انیگیں کسہ چَہ چاردہ اگست ءَ بندات نہ بیت بلئے اے روچ  ءَ  ما پمیشکا سیاھیں روچ من اِیں کہ برٹش ءِ سیاسی ردیانی سبب ءَ ھمے روچ ءَ پاکستان جوڑ بوتگ  کہ ھمیشی ءَ رند ءَ برٹش ءِ کمک ءَ بلوچستان زیردست کُرتگ کہ دنیگت پاکستان ءِ زیردستی ءَ بدجاوری ءِ آماچ اِنت ۔  پمیشکا اے روچ پہ بلوچاں سیاھیں روچے منگ بیت ۔