یازہ اگست سوگند سرسبزی روچ اِنت'راجی سنچ ءِ تالانی ءَ چَہ دیمونی ءَ چکپد نہ بَہ اِیں ' ڈاکٹرمنان

بلوچ نیشنل فرنٹ ءِ بنجاھی کارگشاد ڈاکٹرمنان بلوچ ءَ یازدہ اگست ءِ درگت ءَ برجمیں مراگشے ءَ گوں بی این ایم ءُ بی ایس او آزاد ءِ جھدکار ءُ لس مردماں گپ جنان گْوشتگ کہ اے روچ مارا سما ءَ پرین اِیت کہ ما وتواجھیں ملکے ءِ واھند بوتگ اِیں ۔

چاراگست ءَ  نوزدہ سد ءُ چل ءُ ھپت ءَ پاکستان ءِ جھگیر محمدعلی جناح ، برطانیہ ءُ بلوچستان ءِ جھگیرانی دیم ءَ بلوچستان ءِ آجوئی منگ بوت ، ھمے پیم یازدہ اگست ءَ بلوچستان ءِ آجوئی ءِ جار جنگ بوت بلئے ھمے مردماں کہ بلوچستان ءِ آجوئی من اِتگ اَت پہ زور مئے آجوئی پُل اِت ءُ مئے ھزارسالی دپتر ءِ واھندیں گلزمین یک نوک جوڑ بوتگیں ملکے ءِ زیردستے ءَ دات ۔ اے کار ءِ تہ ءَ برطانیہ ءِ سیاسی ردی ءُ ھمے پیم بلوچانی سر ءَ جبر ھوار اَت ۔

بلوچ چَہ ھمے روچ ءَ پاکستانی ریاست ءِ جبرانی آماچ اِنت ءُ ھرچ وڑیں آسراتیاں زِبھر بندگی زند گْوازینگ ءَ اِنت ، ھمے پاکستان مروچی برطانیہ ءِ پجیگ ءَ یورپ ءُ کلیں دنیا ءَ دھشت گرد دیم دئیگ ءُ پہ آھاں مزنیں سردردے جوڑ بوتگ ۔

بلوچ مروچی پہ وتی ریاست ءِ سرسبزی ءُ دنیا ءَ یک ایمنیں سیکولر ملکے ءِ دئیگ ءِ جھد ءَ ھرچ وڑیں دیمونی دئیگ ءَ اِنت ۔ پمیشکا  ما چَہ دنیا ءَ ھم انچیں کمکے ءِ واھوک  اِیں داں بلوچ وتی پھزگ ءِ پجیگ ءَ اے دمگ ءُ دنیا ءِ ایمنی ءِ مانزمان بہ بیت ۔

ڈاکٹرمنان بلوچ ءَ گْوشتگ کہ اے روچ ءَ سوگند سرسبزی روچ منگ  اِنت ءُ مارا گیشتر دیمونی دئیگ ءُ وتی ادارہ مھکم کنگی اَنت ، بل کہ دومی نیمگ ءَ اے پیژگامیاں گندان ریاست مئے میتگانی سر ءَ زمینی ءُ آزمانی اُرش کنگ ءَ اِنت ۔

مروچی بلوچ سیاسی جھدکارانی ، کلیں تک ءِ مردمانی زانشتی آگھی ءُ بندَگی ءِ بگیری ءَ مھکمیں جھد ءِ پجیگ ءَ گوں ریاستی جبرانی دیمپانی ءَ وت ءُ وتی راج ءَ ذھنی تک ءَ ساڑی کنگ ءَ شپ روچ کار کنگی اِنت ۔

مروچی یازدہ اگست سوگند سرسبزی روچ اِنت ما پہ وتی آجوئی ءَ ، راج ءِ سنچی جھد ءِ تالانی ءَ ھچ وڑیں نابودی پیژ نہ دار اِیں ءُ ھچ رنگیں دیمونی دئیگ ءَ چکپد نہ بَہ اِیں ۔