چمالنگ ءَ پاکستانی لشکر کشی برجاہ اِنت' کیمای ءُ جراثیمی سلاہ ھم کارمرد کنگ بوگ ءَ اَنت ' بلوچ نیشنل وائس

شال : بلوچ نیشنل وائس ءِ جارکش ءَ گوشتگ کہ کوھستان مری ءِ دمگ چمالنگ ءَ گوستگیں دو روچ اِنت کہ پاکستانی  فوج ءِ لشکر کشی برجاہ اِنت ۔ زورگیریں پا کستانی لشکر ءَ بلوچ میتگاں سر ءَ تیر گواری ءُ ٹوپ گواری کرتگ ، چَہ بلوچ میتگاں رستگیں ھالانی رِد ءَ بلوچانی سر ءَ چَہ پاکستانی لشکر ءِ نیمگ ءَ کیماوی سلاہ ھم کارمرد کنگ بوتگ ۔ چَہ ھندی مردماں رستگیں ھالانی پد ءَ جارکش ءَ گوشتگ کہ یک شمبے ءِ روچ ءَ بی ایل اے ءِ سرمچارانی زورگریں لشکر ءِ سر ءَ سوبمندیں اُرش پد ءَ پاکستانی لشکر ءَ بلوچ میتگانی سر ءَ بے سلاھیں مردمانی سر ءَ اُرش بنا کرتگ ، پاکستانی لشکر ءِ ناروائی گوستگیں دور روچ ءَ گوں ترندگیری ءَ برجاہ اِنت ۔ دو شمبے ءِ سجھیں روچ ءَ گوں جنگی گراب ءُ گن شپ ھیلی کاپٹراں چمالنگ ءِ میتگ کھجل ، برگ شم ، ڈیھوا، انار ، چیچند ا، میٹ وڈھ ، ساڑتو، ڈھڈر ءُ کش گور ءِ ھلکاں بلوچ میتگ ءُ مال ءُ دلوتانی سر ءَ مزنیں کساسے ءَ شیلنگ ءُ نوکتریں کیمای سلاہ ءُ جراثیمی سلاھاں اُرش کنگ بوتگ ۔دومی نیمگ ءَ دورجنیں میزائل ، نوکتریں آرٹیلری، ٹینک ءُ گرانیں ٹوپ جاہ ءَ گوں مزنیں کساسے ءَ پاکستانی لشکر ءَ چھج ، بالا ڈھاکہ ، بھلول ، سورگھار ، سرخیں چڑی، مری مین [ ناصری  مین] ءِ دمگاں سرچ آپریشن ءِ نام ءَ گوں بلوچاں ناروائی ءُ زوراکی کرتگ اے میان ءَ آھاں بلوچانی گدانانی سر ءَ ٹوپ  ءُ تیر گوار اِتگ ، آزمانی ءُ زمینی تیرگواری ءِ سبب ءَ مزنیں کچے ءَ بلوچ بیران ءُ ٹپی بوتگ اَنت ، سداں مال ءُ دلوت ھم مرتگ ۔زورگریں لشکر ءَ چَہ مردمانی انباراں وراک ءُ وردنی سامان ھم آس مانداتگ اَنت ءُ دکان پل اِتگ ءُ سامان گوں وت برتگ اَنت ۔ باز ھند ءَ مال ءُ دلوت ھم زورگریں لشکر ءَ ٹرکاں لڈ اِتگ ءُ برتگ اَنت ۔ دمگ چاریں گوراں انگیر کنگ بوتگ پمیشکا ٹپی ھسپتال ءَ ھم برگ نہ بوگ ءَ اَنت ۔ بیان ءِ تہ ءَ گوشگ بوتگ کہ دژمن چَہ وتی رستری کارپداں بلوچانی دل ءَ ترس ودی کنگ لوٹگ ءَ اَنت بلے چَہ اے زوراکیاں چوش نہ بیت نہ کہ بلوچانی دل ءَ سرمچارانی ھمدردی ھلاس کنگ بیت ۔ بلوچ راج زانت کہ پاکستانی لشکر دژمن ءُ بلوچ سرمچار بلوچ راج پھاز اَنت کہ بلوچ راج ءِ پھازگ ءَ گوں دژمن ءَ جنگ اِش داتگ ۔جارکش ءَ بی ایل اے ءِ شھید سنگت ھم گوں زبردستیں رنگے ءَ سلام پیش کرتگ ءُ گوشتگ بلوچ ورناھانی ریتگکیں گرمیں ھون پہ دژمن ءَ تباھی ءِ کلو بیت ۔بی ایل اے ءِ شھید سنگت ءَ جنگ ءِ میدان ءَ پاکستانی زورگریں لشکر ءَ دیم دیمی جنگ کرتگ ءُ گوں بھادری ءَ شھید بوتگ ۔