ذمہ وار ما اِیں کہ اُلس چَہ زْرمبش گستا بیان اِنت 'ٹکی ءُ بھر بانگیں سیاست ءَ نپ نیست' بی این ایم شھید غلام محمد

شال : بلوچ نیشنل موومنٹ [ شھید غلام محمد ] ءِ بنجاھی جارکش ءَ وتی شنگ کُرتگیں دْرشان ءَ  دمگ ءِ بدل بوتگیں جاور ءُ زورگریں ریاست ءِ نیمگ ءَ گلزمین ءِ چاریں پھناتاں لشکرکشی ءُ بلوچ پسگانی بیگواہ کنگ ءِ نوکیں ھال دلگوش کرز ڈسان گْوشتگ کہ راج آجوئی زْرمبش ءَ ھواریں کلیں آزادی پسندیں گلانی سر ءَ چَہ پیشیگین ءَ گیش اے ذمہ واری بیت کہ وتی راجی ذمہ واریانی پیکو کنگ ءَ چَہ ذاتی ءُ ٹکی سیمسراں در بہ کپ اَنت ءُگوں آشوبی ارواہ ءُ سیاسی بنیاداں تجزیہ کنان بلوچ راجی جست ءَ سنچی بنیاد ءَ دنیا ءِ دیم ءَ ایر بہ کن اَنت ۔

جارکش ءَ گْوشتگ کہ یازدہ سال ءَ برجاھیں زْرمبش ءَ دیم ءَ روگ ءِ بدل ءَ مروچی ما پُرشت ءُ پروشانی آماچ بوتگ اِیں ۔ مروچی راستی اِیش اِنت کہ بلوچ راج چَہ وتی اے مزنیں زْرمبش ءَ درامد بوان اِنت کہ ایشی ءِ ذمہ وار زْرمبش ءِ سروک ، گل ءُ ما درس اِیں۔ جذباتی بوگ ، دگراں مان نیارگ ، بے نپیں ھڑتال ، جاک ءُ یک دومی ءِ سر ءَ الزام جنگ ءَ اَجبیں جاوریں ودی کُرتگ ۔راستی اِیش اِنت کہ راج ءَ مادنیں کشکے دیگ ءُ سنج  ءَ بالاچی  دارگ ءِ دنیگت دلبڈی ئیں جاور جوڑ نہ بوتگ ۔

جارکش ءَ گْوشتگ کہ آیوکاں روچاں اے دمگ ءَ بازیں تبدیلی یے ودی بوگی اِنت ۔ پاکستانی ریاست  ءُ آئی ءِ واکمند دنیگت سامراجی ملکانی دوست ءُ دلبر اَنت کسے من اِیت یا نہ من اِیت بلئے راستی یے کہ ھرچ وڑیں تبدیلی بَہ اِت پاکستانی ریاست ءُ آئی پلہ مرزیں ملک پاکستان ءَ ھچ پیم چَہ آ تبدیلیاں گستا بوگ ءَ نہ ھل اَنت  بلئے دومی نیمگ ءَ مئے گْور ءَ ابید چَہ تاوان ءَ دگہ ھچ گندگ نہ بوگ ءَ اِنت کہ آئی ءِ مستریں سبب وڑ وڑیں گل ، بھر ءُ بانگیں تپنگی گل ءُ ذات ءُ ٹک دوستی ءَ ابید ھچ نہ اِنت ۔

جارکش ءَ گْوشتگ ما دمپارا اے ھبر ءِ نشون دیان اِیں کہ دنیا ءِ وتی گزر اَنت ءُ چَہ دنیا ءِ لوٹاں یکے اِیش اِنت کہ آئی ءَ گوں کسے تاوان ءَ کار نیست آئی ءَ گوں ایشی ءَ ھم کار نیست کہ کئے آئی ءَ پہ اُوستیں چماں چارگ ءَ اِنت ۔ آھاں ھرجاہ کہ وتی گزر ترس دیمپان گندگ بنت آ کسی دزبندیاں مان نیار اَنت ءُ  تہ ءَ دور کن اَنت ۔

جارکش ءَ گْوشتگ کہ مارا جیڑگ لوٹ اِیت کہ مئے لوٹ چی اَنت ءُ پہ آھانی پیلوی ءَ چی پکار اِنت ؟ مئے چَہ کُلاں مستریں ذمہ واری اِیش اِنت کہ اے جاوراں ما  انچیں گامگیج بہ زیر اِیں کہ چَہ آھاں راج راستی ءَ پوہ بہ بیت ءُ گوں زْرمبش ءَ ھمگرنچ بہ بیت ۔ بلئے پہ ایشی ءَ اولی ڈک اِیش اِنت کہ مارا درساں ھیروازم ، ٹک دوستی ءُ دگہ بلابتراں درکپگی اِنت گھتریں داناگی ، شوربندی ءُ سائنشی وڑ ءُ پیمانی بے درویں درانگازی کنان زْرمبش گوں انیگیں جاوراں ھمدپ کنگی ءُ بلوچ راجی جست دیم ءَ آرگی اِنت ۔