بلوچ جنین آدمانی دیم ءِ سر ءَ تیزاپ ریچگ ءِ پژدر بلوچ چاگرد ءَ مذھبی پیش کنگ اِنت ' بی ایس او آزاد

شال : بلوچ جنین آدمانی دیم ءِ سر ءَ تیزاپ  ریچگ ءِ کرد ءِ پژدر ھمیش اِنت کہ بلوچ چاگرد مذھبی پیش دارگ بہ بیت ، اے کار ءِ کنوکاں زورگریں ریاست پلہ مرزی کنگ ءَ اِنت ۔ اے ھبر بلوچ اسٹوڈنس آرگنائزیشن آزاد ءِ بنجاھی جارکش ءَ وتی بیان ءِ تہ ءَ کُرتگ اَنت ۔ آئی ءَ گْوشتگ کہ بلوچ راج زْرمبش ءِ اسرمندیانی دیم ءِ دارگ ءَ زورگریں ریاست وتی جوڑ کُرتگیں شورانی پد ءَ مذھبی گل ءُ ترند روئیں مذھبی لیکو داریں ٹکانی پلہ مرزی کنگ ءَ اِنت ۔ ھمے مردم گوں ریاستی ڈیتھ اسکواڈ ءَ ھم ھمگرنچ اَنت کہ یک گْورے پاکستان ءِ سلامتی ءِ ٹھیکہ دار اَنت ءُ دومی نیمگ ءَ وتگڑیں مذھبی لیکواں ھم بلوچ چاگرد ءِ سر ءَ مشگ لوٹ اَنت کہ پہ بلوچ راج ءَ ھچ رنگ ءَ مناک نہ اَنت ۔ آئی ءَ گْوشتگ کہ ریاست چَہ بلوچ جنین آدمانی راج زْرمبش ءِ درگت ءَ سنچی آگھی ءَ بیم کپتگ ءُ پہ ھمیشی ءِ بیر ءَ آ وتی کاسگ چٹیں مذھبی گلاں کاربندگ ءَ اِنت داں بلوچ جنین آدم ، سیاست ، زانشت ، ادب ءُ چاگردی کاراں دور دارگ بہ بنت ۔ پنجگور ءَ جنکانی وانگجاہ ءِ بند کنگ ءُ بلوچ جنین آدمانی دیم ءِ سر ءَ تیزاپ ریچگ  یکیں کار ءِ دْرچ اِنت کہ آئی ءِ سر ءَ گام پہ گام بستگیں شوربندیانی پد ءَ گامگیج زورگ بوگ ءَ اِنت کہ آئی ءَ بی ایس او آزاد ریاستی ناشرکاری  گْوش اِیت ءُ آئی ءِ ھرچ پیم دیم دارگ بیت ، بلوچ راج ءِ چَہ وانگ ءُ آگھی ءَ دارگ ءِ جھد الم ناسوب بیت ۔