زوگر ءِ جبراکی رمدان ءَ ھم یک پیم ءَ برجاہ اِنت'بی این ایم

بلوچ نیشنل موومنٹ ءِ جارکش ءَ بیان داتگ کہ رمدان ءِ مبارکیں ماہ ءَ ھم زورگریں لشکریانی ھلاس نہ بیوکیں جبراکی برجاہ اِنت.

گْوستگیں روچ ءَ زورگراں  پیراندر آواران ءَ مردمانی لوگانی سر ءَ اُرش کُرتگ گْرانھریں سامان پُل اِتگ ءُ وراک ءُ وردن ھم بُرتگ اَنت.

وتی زوراکیانی میان ءَ زورگراں جنین آدم ءُ چُک ھم لٹ داتگ اَنت ءُ بازیں بلوچ پُسگ آوار جتگ.

آوارجتگیں مردمانی تہ ءَ محمد ءِ چُک وزیر ،خان محمد ءِ چُک پیرجان ،محمد عابد ءِ چُک صادق ،سوالی ءِ چُک بلال ءُ داؤد ءِ سئے بچ شفیع محمد ، سلیم ءُ غفور ھوار اَنت.

مشکے ءَ کھنڈری ،نلی ءُ کوھلو ءَ ھم میتگانی سر ءَ زورگریں لشکریاں اُرش کُرتگ ، مردم لٹ داتگ اَنت.

ھمے پیم ککن ءَ ھَندی کنسٹرکشن کمپنی ءِ سائٹ دستیگ کنگ ءُ ملٹری کیمپ جوڑ کنگ بوتگ. نوک جوڑ بوتگیں ملڑی کیمپ ءِ تہ ءَ آیوکیں زورگریں لشکری ھمروچ میتگانی سر ءَ بیڑ برگ ءُ مردماں آزار کنگ ءَ اَنت.

ھوشاپ ءَ نوک جوڑ بیوکیں کالج ھم زورگریں آرمی ءَ دیگ بوتگ داں کالج ءِ نام ءَ ھمے جاہ ءَ آرمی چھاؤنی یے جوڑ کنگ بہ بیت.

زورگریں لشکر ءُ کاسگ چٹیں سرکار ءِ بلوچ کُشیں پندلاں ایرجنان جارکش ءَ گْوشتگ؛ آیوکیں روچاں  زورگر ءِ زوراکی ءِ گیشی ءِ گمان ءَ جھدکار مردماں اے زوراکیانی درگت ءَ سنچ ءُ سرپدی بہ دئے اَنت ءُ راج آجوئی ءِ جھد ءِ کلو ءَ لوگ لوگ ءَ سر بہ کن اَنت.