گوادر: ایران پاکستان گیس پائپ لائن ءِ کار گوں تیزی ءَ بنا ' بام ءِ گچینی سسا ءُ ٹپاس

گوادر : ایران پاکستان گیس پائپ لائن ءِ چیر گیجگ ءِ کار گوں تیزی ءَ بنا کنگ بوتگ ۔ گوادر ءُ نوبندیان ءِ میان ءَ کساس پانزدہ ھزار میٹر دراجی ءَ پائپ لائن ایر کنگ بوتگ  اَنت ءُ شپ روچ کار بوگ ءَ اِنت ۔ چَہ گوادر ءَ کساس نود کلومیٹر دور رودرتکی ءُ روکپتی بلوچستان ءِ زور گیشینتگیں سیمسر ءَ دوسد ءُ پنجاہ ءِ نام داتگیں ڈک ءَ  بہ گر داں روکپتی مکوران ءِ کوچگ ریمدان ءِ نزیک ءَ  '' ایران پاکستان گیس پائپ لائن '' دنیگت کساس پانزدہ ھزار میٹر دراجی ءَ ایرکنگ بوتگ ۔ پنجاہ ءُ شش انچ ءِ پراھیں پائپ زمین ءِ سر ءَ ایر اَنت ءُ گوں تیزی ءَ جوڑ دیگ بوگ ءَ اَنت ۔ پروجیکٹ ءِ رِد ءَ اے پائپ  داں یازدہ ھزار کلومیٹردور ایرانی زرباری اُستان بوشھر ءِ شھر عسلویہ ءَ برگ بیت ۔ نیشنل ایرانین گیس ایکسپورٹ کمپنی ءِ وب سائٹ ءَ اے پروجیکٹ  ایران ، پاکستان ءُ ھندوستان گیس پائپ لائن پروجیکٹ ءِ نام ءَ پجار کنگ بوتگ ۔ شرکت ء ملی صادرات گاز ء ایران ءِ داتگیں ھالانی رِد ءَ نوزدہ سد ءُ نود ءَ اے  کار بنا بوگی اَت بلے ھندوستان ءُ پاکستان ءِ نیام ءَ رنجشانی سبب ءَ کار ءَ دیمروی نہ کرتگ ۔ سن دوھزار ءِ بندات ءَ گوں میان اُستمانی شرکتانی کمک ءَ شرکت ء ملی ء نفت ایران ءَ پہ پائپ چیر گیجگ ءَ راہ ءِ شوھازکاری ، ءُ چار ءُ ٹپاسی بنا کرتگ اے درگت ءَ دوھزار یازدہ ءَ ھشکی ، کور ءُ کیلگ ، تیابدپ ءُ جُھلیں زِر ءَ پائپ گْوازینگ ءِ راہ ءُ ھیالانی سر ءَ شریں وڑے ءَ چارءُ بہ چار کنگ ءِ سوڈگ بوتگ ۔ سال دوھزار سئے ءَ بی ایچ پی نامیں آسڑیلیائی شرکت ءَ مزنیں چار ءُ ٹپاسی ءَ پد پہ پائپ چیرگیجگ ءَ زمینی راہ چَہ درساں جوانتر لیک اِتگ ۔ پائپ چیرگیجگ ءِ درگت ءَ پہ جیڑہ ءُ اَڑانی گیشوار ءَ سئے ملکاں وت ما وت بازیں ھمتْرانی کرتگ ۔ اے دیوانانی تہ ءَ  چَہ پاکستان ءِ نیمگ ءَ انٹر اسٹیٹ گیس سیسٹم لمیٹڈ ، چَہ ھندوستان ءِ نیمگ ءَ گیس اتھارٹی انڈیا لمیٹڈ ءُ انڈین آئل کمپنی لمیٹڈ ءِ جھگیراں  گوں ایران ءِ  شرکتاں گپ ءُ تْران کرتگ ۔ چَہ شرکتانی میان ءَ گپ ءُ تْراناں ابید پاکستان، ھندوستان ءُ ایرانی سرکار ءِ ھم  اے درگت ءَ بازیں سوڈگ ءُ دیوان بوتگ اَنت ۔

گیس پائپ لائن ءِ گْرینک عسلویہ ءِ شھراِنت

گیس پائپ لائن ءِ گْرینک [ بن ] ایران ءِ زرباری شھر عسلویہ ءَ  آئی جی اے ٹی سیون پارس جنوبی نامیں گیس درآیوکیں جاہ اِنت ، مسامبندی بوتگ کہ چَہ اے پائپ ءَ ھمروچ سی ملون میٹر مکعب گیس ھردو ئیں ملک ھنودستان ءُ پاکستان ءَ رس اِیت ، مسابندی ءِ مدت بیست ءُ پنچ سال ایر کنگ بوتگ ، پائپانی پراھی پنجاہ ءُ شش انچ اِنت۔ عسلویہ ءَ بہ گراں داں سیمسر ءَ پائپ ءِ دراجی یازدہ ھزار کلومیٹر بیت ، پاکستان ءِ تہ ءَ اے پائپ داں نوسد ءُ نود کلومیٹر ءَ چیر گیجگ بیت ءُ ھندوستان ءَ پنچ سد ءُ دہ کلومیٹر دراجی ءَ پائپ چیر کنگ بیت ۔ پہ گیس ءِ فریشر ءِ مھکمی ءَ یازدہ جاہ جوڑ کنگ بیت ۔  شَور اِنت کہ  دوھزار سئے ءُ چاردہ ءَ اے کار آسر ءَ رس اِت  ءُ ایشی  ءِ سر ءَ ھپت ارب ڈالر ھرچ بیت ۔ ایرانی وبتاک ءَ داتگیں نکش ءِ تہ ءَ گیس چَہ بلوچستان ءُ سندھ ءَ گْوز اِیت بلے بلے بلوچستان ءِ ھچ شھر ءُ دیارءَ دیگ نہ بیت گیس جیکب آباد ، روھڑی ، لاڑکانہ ، کند ھ کوٹ ، رحیم یار خان ، خان  گڑھ ، راولپنڈی ءُ پنجاب ءِ توامیں مزنیں شھراں پُجارینگ بیت ۔  

ایران گیس پائپ لائن ءِ ھیال نوزدہ سد ءُ پنجاہ ءِ دھک ءَ یک پاکستانی انجینئرے ءَ پیش کرتگ ۔ آفتاب احمد خان گوں پاکستان آرمی ءِ انجینئرنگ تَک ءَ ھمبستگ بوتگ اے ھیال آئی ءَ '' پرشین پائپ لائن '' نامیں نوشتانکے ءِ تہ ءَ پیش کرتگ آئی ءِ بنی لوٹ ایرانی گیس امبار ءِ کارمرد کنگ اَت  بلے انوں ایران ءُ پاکستان ءِ نیام ءَ '' گیس پائپ لائن '' ایران ءِ جوھری جیڑہ ءِ سبب ءَ میان اُستمانی تک ءَ یک سکیں مانگیش اِتگیں پروجیکٹے زانگ بیت پمیشکا چَہ ایران ءُ پاکستان ءِ نیمگ ءَ بازیں زور ءُ تکانسری کشگ ءَ پد ھم اے کار ءَ بوتگیں سوڈگانی پد ءَ دیمروی نہ کرتگ ۔ چَہ امریکہ ءِ نیمگ ءَ ایران ءِ سر ءَ جتگیں نوکیں پابندیاں اے گیس پائپ لائن ءِ باندات ھم تاموراں کرتگ بلے ایران ءِ اشتاپ کاری ءِ پژدر زانگ نہ بوگ ءَ  اِنت کہ ایران  مالی ھساب ءَ انچوش کُٹ اِتگ کہ ابید چَہ وتی گیس ءِ بھا ءَ دگہ راہ گندگ ءَ نہ اِنت یا کہ جھانی تک ءَ وتی ایوکی ءُ جنجالاں کم کنگ لوٹ اِیت ۔ دومی نیمگ ءَ  اے گیس پائپ لائن چَہ ھندوستان ءَ گیش پہ پاکستان ءَ ھژدری منگ بیت کہ بے گیسی ءَ آئی ءِ بازیں شرکت بند بوتگ اَنت ءُ چُلانی آس تُستگ اَنت ءُ دنیگت اے دْرچ برجاہ اِنت ۔بلے چوش جیڑگ کہ ایران سر پہ وت یازدہ ھزار کلومیٹر پائپ چیر کنت ءُ میان اُستمانی جیڑہ ءُ جنجالاں کمار نہ کنت ھم منگی ھیالے نہ اِنت ۔ پمیشکا گمان اِنت کہ گْوستگیں ماھاں ایران ءُ پاکستان ءِ نیام ءَ بوتگیں سوڈگ ءُ دیوانانی تہ ءَ پہ اے کار ءَ سرمایہ کاری ءُ ھرچ درچ ءِ بندبست کنگ بوتگ ایشی ءِ بزانت ھمیش اِنت کہ پاکستان ءَ ھم میان اُستمانی زور ءُ لوٹانی نہ منگ ءِ ھبربستگ ۔

پاکستان پٹَرولیم ءِ وزیر ڈاکٹر عاصم حسین ءَ مارچ دوھزار دوازدہ ءَ پاکستانی پارلیمنٹ ءِ تہ ءَ گْوشتگ پہ ایران ءُ پاکستان ءِ نیام ءَ گیس پائپ لائن چیرکنگ ءَ ٹینڈر کنگ بوتگ آئی ءَ ھم اے پروجیکٹ ءِ داں دوھزار چاردہ ءَ آسر ءَ رسگ ءِ ڈاہ داتگ ۔بلے زانوگر ایران ءُ پاکستان ءِ اے دُرسیں ھیالاں چَہ راستی ءَ دور سما کنگ ءَ اَنت ۔  

میان اُستمانی تک ءَ ھوار ایران ءُ پاکستان ءِ تہ ءَ ھم بازیں سیاستدان ءُ زانتکاراں اے پروجیکٹ ءِ  تک ءُ پھناتاںی سر ءَ ایراد گیپتگ ۔ چَہ تْرندیں ایرادگراں یکے ایران ءِ وزارت ء نفت ءِ گْوستگیں کُمکار محمد ھادی نژاد حسینیان اِنت کہ اے رِد ءَ بوتگیں ھمترانی ءُ دیوانانی تہ ءَ ھم ھوار بوتگ ۔ آئی ءَ پہ گیس پائپ لائن چیر کنگ ءَ ایران ، پاکستان ءُ ھندوستان ءِ میان ءَ بوتگیں مسامبندی ءِ سر ءَ سکیں تْرندیں گال ءُ گالوار ءَ ایراد گیپتگ  '' اے مسامبندی ءِ سر ءَ دزرند پہ جمہوری اسلامی ءِ بندبست ءَ ھچ رنگیں پھربندی دستاورد نہ اِنت ءُ اے  ٹوھیں مسامبندی ءِ تہ ءَ راجی نپ ءُ سوت دیم ءَ کنگ نہ بوتگ اَنت۔'' آئی ءَ گیش کرتگ کہ '' ایران ءَ پہ ھندوستان ءُ پاکستان ءَ گیس ءِ نیاد چَہ سی درسد ءَ ھم جھلتر کرتگ ۔ ابید چَہ ایشی ءَ کہ چَہ پیشگیں نیاد ءَ برز تر بوت اِنت گوں ترکی ءَ پانزدہ سال پیش ءَ  دزرند بوتگیں مسامبندی ءِ نیاد ءَ بیست ءُ دو درسد ارزان تر اِنت ءُ جاوراِیش اِنت کہ احمدی نژاد ءِ کمکار رحیم مشایی ءَ یک ھندوستانی روتاکے ءَ گْوشتگ گیس ءِ نیاد ھچ رنگ ءَ مھم نہ اِنت ۔''

ھمے پیم پاکستان ءَ ھم زانتکار بازیں تک ءُ پھناتاں چاران اے پروجیکٹ ءِ سر ءَ ایراد گرگ ءَ اَنت دلگوش کنگی ھبرے کہ یک گْورے ایرانی گیس ءِ نیاد ءَ کم سرپد اَنت  ءُ دومی نیمگ ءَ پاکستانی زانتکارانی ھیال اِنت کہ ایرانی گیس پاکستانی  مھلوک ءَ گْران ءَ کپ اِیت ۔ پاکستانی انگریزی روتاک دی نیوز ءَ بازیں تک ءُ  پھناتانی سر ءَ مانگیش اِتگیں  جستانی پسو دیان  ڈاکٹر فرخ سلیم ءَ ھمے آسر کشتگ کہ اے سوڈگ ءِ سر ءَ گامگیج زورگ نہ بوتگیں کارے ، آئی ءَ سبب ھم گْوشتگ اَنت ۔ 
پہ اے کار ءَ ھشت ارب ڈالر پکار اِنت ۔ جمھوری اسلامی ایران ءِ سر ءَ اے وھدی سئے وڑیں مالی ءُ باپاری پابندی ھست اَنت ۔ میان اُستمانی تک ءِ چار وڑیں پابندی گستا اَنت ۔ وھدے کہ یورپی ملک ، کینیڈا، آسٹرلیا، سوئزر لینڈ ، جاپان ءُ امریکہ ءَ ھم یکجاھی ءَ لھتیں پابندی جتگ ۔ نیشنل بینک آف پاکستان ءَ اے پروجیکٹ ءِ تہ ءَ بھر نہ زورگ ءِ ھبربستگ پرچا کہ آئی ءَ ترس اِنت کہ آئی ءِ درملکی شاھڑ بند کنگ بنت ۔ آئل اینڈ گیس ڈویلپمنٹ کارپوریشن ءَ  ترس اِنت کہ آئی ءِ درملکی سرمایہ کار تَچ اَنت پمیشکا آئی ءَ ھم ماں اے پروجیکٹ ءَ بھر زورگ ءَ انکار کرتگ ، روکپتی ملکانی ھم ھچ مالیاتی ادارہ پاک ایران گیس پائپ لائن یا گوں ایشی ءَ بندوکیں دگہ پروجیکٹاں مالی وسیلت دیگ ءَ ساڑی نہ اِنت۔  دنیا ءَ تیل ءُ گیس ءِ مستریں شوھازکار ءُ آھاں دیمروی دیوکیں ادارہ روس اِنت ۔ پاکستان ءَ گوں روسی شرکت گیزپارم ءَ گْوشتگ کہ آ پہ پائپ لائن ءِ چیرگیجگ ءَ یک اعشاریہ دو ارب ڈالر ءِ مسامبندی بہ کنت  ۔ ڈاکٹر فرخ سلیم ءَ اے مسابندی ءِ سر ءَ سسا پیش کرتگ :'' ما درس سرپداِیں کہ امریکہ مالی کمک کنگ ءَ پد گوں وتی وامداراں چونیں ترندگیریں ءَ پیش کپ اِیت بلے مارا ایشی ءِ ھچ وڑیں اندازہ نیست کہ روس گْوں وتی وامداریں ملکاں چی کنت۔''

پہ پائپ چیرگیجگ ءُ گیس ءَ داں پاکستانی کارمرد کنوکاں سر کنگ ءَ پکاریں تکنیک ءُ بودشت ءِ سر ءَ ھم شک کنگ بیت ۔ نہ پاکستان ءَ بودشت ھست نہ ایران ءِ گْور ءَ تکنیک ءُ اے جاوراں ھچ یورپی ملک کمک کنگ ءَ ساڑی نہ اِنت چَہ ایشی ءَ ابید پائپ لائن ءِ پھریزگ ھم یک جنجالے ۔

 ایشاں ابید پاکستان ءُ ایران ءِ میان ءَ ھم لھتیں اَڑ دیم ءَ اَتکگ پاکستا ن ءَ چَہ ایران ءَ گْوشتگ کہ گیس ءِ نیاد ءَ کم بہ کنت ءُ ھپتاد ءُ ھشت درسد خام ءِ نیاد ءَ ھپتاد درسد خام ءِ برابر ءَ بہ کنت ۔

پاکستان ءَ گیس پُجارینوکیں شرکت سئے ءُ نیم ڈالر ءِ برابر یونٹ گیسے بھا کنگ ءَ اَنت وھدے کہ چَہ ایران ءَ رستگیں گیس ءِ نیاد سیزدہ ڈالر بیت ۔ چَہ ایران ءَ آیوکیں گیس چَہ ھما گیس ءَ کہ پاکستان انوں بلوچستان ءُ دگہ جاھاں کارمرد کنگ ءَ اِنت چارسد درسری گْران بیت ۔ ایران ءِ سر ءَ باپاری ءُ مالی بندشانی سبب ءَ آ چَہ میان اُستمانی ادارھاں سستگ پمیشکا گوں آئی ءَ چَہ میان اُستمانی مالیاتی ادارھانی کمک ءَ دیگ ءُ زورگ نہ بیت پمیشکا ایران ءَ لوٹ کرتگ آئی ءَ گیس ءِ نیاد ءِ بدل ءَ سھر دیگ بیت ۔ ایران ءَ جنس ءِ بدل ءَ جنس دیگ بوت کنت پہ ایران ءَ  پاکستانی دان روگ ءِ کُل کساس سد ءُ بیست ءُ پنچ ملون ڈالر اِنت۔ 

سعودی عرب کہ پاکستان ءَ کمک کنوکیں دومی مزنیں ملک اِنت آئی ءِ گوں امریکہ ءَ یک چیریں سفارتکاری نمدی یے وکی لیکس ءَ دیم ءَ آرتگ '' سعودی شاہ عبداللہ ءَ گوں امریکہ ءِ فوجی سروک جنرل پیٹریاس ءَ یک گندءُ نندے ءِ تہ ءَ گْوشتگ  ''کہ ''مار'' بزاں ایران ءِ سر ءَ بہ سند۔

سال دوھزار ھشت ءَ چَہ امریکہ ءِ نیمگ ءَ صدر بش ءَ '' امریکہ ھندوستان سول نیوکلیئر'' راھبندے سر ءَ دزرند جتگ چَہ ایشی ءَ پد ھندوستان چَہ ایران پاکستان پائپ لائن  ءِ پروجیکٹ ءَ گستا بوتگ ۔ ھندوستان ءِ چَہ اے پروجیکٹ ءَ  گستا بوگ ءَ پد اے پروجیکٹءِ میان اُستمانی اَرزش سک کم تر اِتگ چد ءُ پیش اے گیس پائپ لائن ایرانیاں  '' خط لولہ صلح '' ءِ نام داتگ اَت بزاں چر اے لائن ءَ پاکستان ءُ ھندوستان ءِ میان ءَ صلح ءُ ایمنی بیت اے واب ءِ پیلو نہ بوگ ءَ پد ھم ایرانی سرکاری وبتاکانی تہ ءَ اے پروجیکٹ انگت ایران ، پاکستان ءُ ھندوستان پروجیکٹ ءِ نام ءَ پجار کنگ بوگ ءَ اِنت بلے زانتکار واب ءُ راستی ءِ میان ءَ کشک رندگ ءَ اَنت ۔ ایران، پاکستان ءُ زانتکار اے کار ءِ آسر بوگ ءِ سال ءِ سر ءَ ھم تپاک نہ اَنت پاکستان ءُ ایران ءِ گْوشگ اِنت داں دوھزار چاردہ ءَ اے پائپ لائن چیرگیجگ بیت وھدے کہ ڈاکٹر فرخ سلیم ءِ گْوشگ اِنت اگاں انوں اے پروجیکٹ ءِ سر ءَ گامگیج بنا کنگ بہ بنت دوھزار ھپدہ ءَ سرجم بیت ۔

برز ءَ نوشتگیں بازیں تک ءُ پھناتانی سر ءَ چار ءُ بہ چار ءَ ھمے آسر در کئیت کہ ایران ءُ پاکستان ءَ گیس پائپ لائن چیرگیجگ ءِ سر ءَ تپاک کرتگ اے باندات ءَ پیش اَتکگیں جیڑہ  چی بنت دنیگت پدر نہ اِنت پرچاکہ ایران ءِ نیمگ ءَ کار بنا بوگ ءَ پد ھم چَہ پاکستان ءِ نیمگ ءَ ھچ رنگیں سُرپر گندگ نہ بوگ ءَ اِنت ءُ آئی ءَ چَہ ایران ءِ نیمگ ءَ اے ھبر ءِ ھم ھچ رنگیں پسو نہ داتگ کہ اگاں پاکستان بہ گْوش اِیت پاکستان ءِ نیمگ  ءَ ھم ایران وت پائپ لائن چیر کنت ۔ بلے ایران ءِ گامگیج ایوک اشتاپ کاری ءِ نام دیگ نہ بنت ۔  در ملکی پابندیاں  کمار نہ کنگ ءِ انچیں گْوستے کہ ایران دار اِیت ھمے پیم پاکستان ھم میان اُستمانی تک ءَ وژنامیں ملکے نہ اِنت ۔ پاکستان ءَ جوھری تْراک کنگ ءَ پد داں مزنیں مدتے ءَ امریکہ ءُ میان اُستمان پابندیانی دیمپانی کرتگ بلے ایران ءُ پاکستان ءَ مدام چَہ وتی بودشت ءَ گیش میان اُستمانی مانگیش اِتگیں روش ءَ کمک رستگ ۔ گندگ بوگ ءَ اِنت کہ یک گْورے امریکہ ءُ تپاکیں راجانی گل ایران ءِ سر ءَ مالی ءُ باپاری بندش جنگ ءَ اَنت دومی نیمگ ءَ گوں امریکہ ءَ ھمدست ءُ ھمکاریں ملک پاکستان چَہ ایران ءَ گیس ءُ لین [ الیکٹرک سٹی ] زورگ ءِ مسامبندی کنگ ءَ اِنت ۔ ماں جھان ءَ ایران یک سرمتابیں ملکے  منگ بیت بلے پاکستان چالاک اِنت کس نہ زانت کہ آ کدی ایران ءَ رَد بہ دنت ءُ گوں امریکہ ءَ ھندوستان رنگیں مسامبندی ءَ پد چَہ ایران گیس پائپ لائن ءَ دستکش بہ بیت یا چَہ امریکہ ءِ نزوری ءَ سوت چست بہ کنت ءُ ھما چیریں ملک ءُ ادارھانی رَم ءَ ھور بہ کپ اِیت کہ ایران ءَ چیر اندری کمک اَنت ۔  امریکہ ، برٹش ، یورپی یونین ءُ ازرائیل چی جیڑگ ءَ اَنت زانگ نہ بیت بلے ایران پاکستان گیس پائپ لائپ ءَ دوسد ءُ پنجاھے ءِ ڈک ءَ گْوزوکیں ھرکس گندگ ءَ اِنت کہ روچ پہ روچ عسلویہ ءِ نیمگ ءَ دْراج بیان اِنت ۔اے گیس پائپ لائن ءِ روچ پہ روچ مستر بوگ میان اُستمانی تک ءَ ھما ملکانی بستار ءَ کستر کنت کہ ایران ءِ سر ءَ نوک نوکیں پابندی جنان اَنت ءُ ھمے دلمانگ اَنت کہ ایران چَہ وتی جوھری برنامہ ءَ دست ءَ بہ کش اِیت۔ اے ھم بوت کنت کہ چَہ پاکستان ءُ ھندوستان ءِ  وتا چَہ اے پروجیکٹ ءَ دُزگ ءُ دور دارگ ءَ پد ایران ءِ اشتاپ کاری ءِ سبب ھم میان اُستمانی تک ءَ آئی ءِ جوھری جیڑہ بہ بیت پمیشکا ایران ایشی ءَ وتی سوبمندی ءِ نشان جوڑ کنگ لوٹ اِیت بلے بیا ھمے زمین ءَ کہ اے پائپ لائن ءَ گْوزگی اِنت  '' بلوچ '' جاھمند اِنت آئی ءِ سوڈگ ءُ ھبرگوں کے ءَ بنت ءُ آ چی کنت ھم سیل کنگی اَنت ۔