ھپدہ رمضان المبارک، مسلمان ءُ قریشی کافرانی میان ءَ اولی جنگ

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بام: ھپدہ رمضان المبارک دو ھجری (17 مارچ، 624ء)  ءَ، بزاں مرچیگیں روچ ءَ مسلمان ءُ قریشی کافریں لشکر ءِ میان ءَ اولی جنگ بیتگ کہ اے جنگ غزوہ بدر ءِ نام ءَ زانگ بیت۔ اے جنگ ءَ کمیں کچے ءَ ابئئد ھم چہ خدا ءِ وتی شان ءُ شرپ ءَ مسلماناں سوب مندی رَستگ۔۔

اے جنگ ءَ مسلمانانی لشکر ءَ سئے صد ءُ سیزدہ کَس بوتگ اَنت ، وھدیکہ آھانی مقابلہ گوں قریش ءِ یک ھزار ٹوھیں آسن پوشیں جنگولاں بیتگ۔  اے جنگ ءَ قریش ءِ نامئئں سردار ابوجہل ءَ ھوار دگہ بازیں نامئیں سردار کُشگ بیتگ اَنت ءُ قریشی لشکر ءَ پروش وارتگ ءُ چہ میدان ءَ ھَزاتگ اَنت۔

اے جنگ ءَ مسلمانانی بس چاردہ مردم شھید بیتگ ءُ قریشیاں  چار ٹوھیں سرداراں ھوار 70 مردم  کُشگ بوتگ اَنت کہ آھانی تھا 36 تھنا حضرت علی (رض) ءَ کُشتگ اَنت۔  وھدیکہ قریشیانی ھپتاد ءَ چہ گیش مردم دزگیر بیتگ اَنت کہ آھانی تھا قریش ءِ اہمیں جنگول ھوار بیتگ اَنت۔۔

مسلمانانی سِتک ءِ ردا اے خدا ءِ وتی شان ءُ کُمک بیتگ کہ 313 غریب ءُ غیر سلاہ بندیں مردماں گوں دواسپ ءُ  لھتے اُشتر ءَ  یک ھزار انچیں جنگولاں گوں مقابلہ کُتگ کہ آ وتی  وھد ءِ جوان تریں سلاھاں گوں میدان ءَ اَتکگ اَنت ءُ آھاں آسن ءِ پشک پوش اِتگ، بلے پدا ھم پروش ئے وارتگ ۔۔

اے تاریخ ءِ مَن اِتگیں راستی ءُ زِبریں ھکلے  کہ ظالم ھمینکہ تمرد ءُ  مُھکم بیتگ ۔ آئی ءَ حق ءِ دیم ءَ پروش وارتگ۔ پمیشا انسان ھمینکہ وت ءَ تُرم خان ءُ زوراک سرپد بیت تہ آئی ءَ اے حقیقت زانگی اِنت کہ انسانی زند ءَ گِستا یک انچیں توان مند ءُ طاقت وریں ذاتی است ، آ مدام حق ءِ مدت ءُ کمک ءَ ظالم ءِ ھلاپ ءَ اوشتاتگ، ظالم ءَ ہر وڑا پروش ورگی اِنت ۔ اے تاریخ ءِ حقیقتے ءُ خدا ءِ قانون اِنت۔

سرجمیں ایردستیں بلوچاں گوں دزبندی اِنت کہ آ ‘‘رمضان شریف ‘‘ءِ اے روچ ءَ پاکستانی ظالمیں ملائی ملک ءِ تباھی ءُ بربادی ءُ بلوچستان ءِ آجوئی ءِ ھاترا دعا بہ لوٹ اَنت