شال : ایف سی ءُ چیریں ادارہ جسٹس دیم ءَ گپ جن اَنت گامگیج نہ زور اَنت ' ماما قدیر

 شال : ایف سی ءُ چیریں ادارہ چیف جسٹس ءِ دیم ءَ ایوک گپ جن اَنت گپانی سر ءَ ھچ گامگیج زورگ نہ بیت ۔ اے ھیال  وائس فار بلوچ مسنگ پرسنز ءِ وائس چیئرمین ماما قدیر ءَ یک ٹی وی برنامھے ءِ تہ ءَ دْرشانتگ اَنت ۔ آئی ءَ گْوشتگ ھرچ مردم کہ دنیگت درا کنگ بوتگ ھما اَنت کہ چندیں وھد پیش ءَ جتاجتائیں جاھاں دزگیر کنگ بوتگ اِت اَنت بلے ذاکر مجید ، ڈاکٹر دین محمد ءُ دگہ بلوچ راھشوناں دہ سال اِنت کہ درکنگ نہ بوگ ءَ اَنت داں وھدے کہ درا نہ بنت سپریم کورٹ ءِ سر ءَ مئے اُوست برجاہ نہ بیت آئی ءَ گْوشتگ کہ درس زان اَنت بیگواھیں مردم کے ءَ بیگواہ کرتگ اَنت ءُ آ باز تواندار اَنت۔ ھمے رِد ءَ گپ جنان زور گریں سرکار ءَ ھمدست آیت اللہ درانی ءَ گْوشتگ کہ بلوچستان ءِ لھتیں سیاسی جیڑہ اَنت کہ آھانی سر ءَ تْران بوگ ءَ اِنت ءُ سر وزیر ءَ ھم شال ءِ سواد کرتگ ءُ بلوچستان جیڑھے گوں سنگینی ءَ گیشوار ءِ جھد ءَ اِنت ۔آئی ءَ گْوشتگ کہ بیگواھیں مردمانی جیڑہ المی ءَ سنگین اِنت آئی ءَ ھم گیشینگ لوٹ اِیں ۔ آئی ءَ گْوشتگ کہ من چَہ وتی نیمگ ءَ درملکی سواد کرتگ ءُ گوں بلوچ راھشوناں دوچار کپتگ اَنت کہ مئے بولکی چاگرد ءِ بھر اِنت کہ ما گوں یک دومی ءَ ھال ءُ اھوال بہ کن اِیں ءُ مئے جھد اِنت کہ بلوچستان ءِ حیڑہءِ گیشوار سیاسی راھبنداں در بئیت ۔ ھمے برنامہ ءَ بلوچستان بار ایسوسی ایشن ءِ صدر ظھور شاھوانی ءَ گپ جنان گْوشتگ کہ سپریم کورٹ جوانیں گامگیج زورگ ءَ اِنت ءُ ایشی ءِ جوانیں آسر درکپ اَنت ۔ آئی ءَ گْوشتگ کہ ھما کار کہ سیاسی سرکار ءَ کنگ لوٹ اَنت کورٹ اِش کنگ ءَ اِنت ۔ آئین ءُ راھبندانی پد ءَ مردم بیگواہ کنگ نہ بنت پرچا کہ اے آئین ءِ سرگْوز کنگ اِنت ۔ آئی ءَ گْوشتگ کہ بلوچستان سرکار ءَ ھچ نہ کرتگ ءُ نہ آ بلوچستان ءِ جیڑہ ءَ سنگین سرپد بوتگ ۔ اسلام آباد سرکار ھم بلوچستان جیڑہ ءَ سرگْوز کنگ ءَ اِنت۔ سر وزیر ءَ ایوک ءَ پھلی لوٹ اِتگ کہ پیسرگیں وزیر ءُ صدراں  ھم لوٹ اِتگ ۔ بیگواھیں مردم درکنگ بوگ ءَ اَنت ءُ اے پہ بلوچستان ءَ نیکیں پال اِنت۔