چاردہ اگست، مند پاکی رستریں لشکر ءِ سرا اُرش، تیر گواری

بام(گچینی ھال) ایردستیں بلوچستان ءِ دمگ مند ءَ ناشناسیں سلاہ بنداں پاکی رستریں لشکر ءِ سرا اُرش کُتگ۔  ھندی ھالانی ردا ردا مند ءِ دمگ گواک ءَ ناشناسیں سلاہ بنداں ‘ایف۔ سی چیک پوسٹ‘‘ ءِ سرا گوں راکٹ ءُ وتکاریں سلاھاں اُرش کُتگ۔  پجاہ نیاؤرتگیں مردماں ایف۔سی چیک پوسٹ ءِ سرا سئے راکٹ جتگ کہ راکٹ چیک پوسٹ ءِ میان ءَ کپتگ ءُ ترک اِتگ اَنت ۔ وھدیکہ دوئیں نیمگاں تیرگواری رد  نیم ساھت ءَ برجاہ بیتگ۔ ارش ءَ پد پاکی رستریں لشکر ءَ گواک بازار ءِ سرا دو راکٹ جتگ کہ یک راکٹے زرباری کوھانی سرا کپتگ ءُ ترک اِتگ ءُ دومی راکٹ گواک بازار ءِ میان ءَ کپتگ ءُ ترک اِتگ۔ ایشی ءَ ابئید ایف۔ سی ءَ پچیں بازار ءِ سرا تیرگواری کُتگ ۔

دومی نیمگ ءَ مند ءِ کیمپ ءِ سرا ناشناسیں مردماں  پنچ راکٹ جتگ ءُ تیرگواری کُتگ۔ ھندی ھالانی ردا چر اے ارشاں پاکی لشکر ءَ بازیں جانی تاوان رستگ۔

وھدیکہ ساھتے ءَ رند یک رندی پدا ناشناسیں مردماں ایف۔ سی کیمپ ءِ سرا دو راکٹ جتگ۔
دنیگہ ھچ سلاہ بندیں گلاں اے اُرشانی ذمہ واری وتی سرا نہ زُرتگ اَنت۔