بی این ایم بنجاھی مجلس ءِ دیوان ' پارٹی ءِ نوھمی سیشن ھمے سال ءَ بیت

بنجاھی مجلس ءِ ھشتمی دیوان ءَ ھمے شَوربندی کنگ بوتگ کہ پارٹی ءِ نوھمی کونسل سیشن 2014 ءَ پارٹی ءِ بیگواھیں جھدکار ڈاکٹردین ، صادق جمالدینی ، غفور بلوچ ، رمضان بلوچ ، زاھد بلوچ ءُ شھید غلام  محمد ءِ  نام ءَ مکوران ءَ بیت ۔'

 بلوچ نیشنل موومنٹ ءِ ھشتمی بنجاھی مجلس ءِ دیوان پارٹی چیئرمین خلیل بلوچ ءِ پاگواجھی ءَ ماں جھاو ءَ بوت ۔ دیوان ءَ ھَندی ءُ میان اُستمانی جاور ءُ سیشن ءِ تیاری ءِ سر ءَ گپ بوت ۔

پہ ھم پتیں سنگرے ءِ جوڑ کنگ ءَ چیئرمین خلیل بلوچ ءِ سروکی ءَ کمیٹی جوڑ کنگ بوتگ کہ آ ڈرافٹے جوڑ کنت ءُ پہ یکجائی ءَ گوں دگہ آزادی پسندیں گلاں گپ جنت ۔ اے کمیٹی ءِ باسکانی تہ ءَ ڈاکٹرنسیم ، ھمل حیدر ، نبی بخش ءُ کچکول ایڈوکیٹ ھوار اَنت ۔

وائس چیئرمین ءِ ھالیکیں اُگدہ  ءِ سر ءَ کہ چَہ سعید یوسف ءِ دزکشی ءَ پد ھالیک اَت سلمی بلوچ وائس چیئرمین کنگ بوت ۔

سوشل میڈیا ءِ تہ ءَ '' نیگیٹوپروپیگنڈہ '' ءِ درگت ءَ شَور کنگ بوتگ کہ پارٹی وتی پیشیگیں پالیسی ءَ دار اِیت ءُ سوشل میڈیا  یک دومی پاد  ءِ چیکگ ءِ بدل ءَ جوانیں وڑے ءَ پہ زْرمبش ءِ پلہ مرزی ءَ کارمرد بیت ۔

چاگردی جیڑھانی گیشوار ءَ ڈاکٹرمنان ءِ سروکی ءَ چاگردی کمیٹی یے جوڑ کنگ بوتگ کہ آئی ءِ باسک واجہ غلام نبی ءُ غفار بلوچ اَنت ، پارٹی جھدکار گّوشگ بوتگ اَنت کہ آ ھرچ وڑیں چاگردی جیڑھانی سر ءَ گوں ھمے کمیٹی اھوال بہ گر اَنت ۔

چَہ بی این ایم ءِ نیمگ ءَ شنگ بوتگیں پریس ریلیز ءِ تہ ءَ اے ھم گْوشگ بوتگ کہ 21 جنوری 2013 ءَ بسیمہ ءَ کشگ بوتگیں سیف الدین بی این ایم ءِ دوزاھے بوتگ کہ چاریگی ءِ بھتام ءَ بی ایل اے ءِ دست ءَ کشگ بوتگ پارٹی ءَ چَہ سالے ءَ بُرز پٹ ءُ پول کُرتگ ءُ آسر ھمے دراَتکگ کہ سیف الدین بے میارے بوتگ پمیشکا پارٹی آئی ءَ وتی شھید سرپد بیت ءُ چَہ بی ایل اے ءَ دزبندی کنت کہ آوتی کُرتگیں کار ءِ سر ءَ پد ءَ چار ءُ بہ چار بہ کنت ۔

    پارٹی فیصلھانی بگیری ءُ پارٹی ءِ بیگری ءَ ردیں پروپیگنڈہ کنگ ءِ سبب ءَ چَہ مشکے ھنکین ءَ مسعود بلوچ ، عقیل بلوچ ءُ ماسٹر صادق بلوچ ءِ باسکی ھلاس کنگ بوتگ اَنت ۔ شیرباز بی این ایم شال زون ءِ باسک کنگ بوتگ اَت بلئے آئی ءَ پہ پارٹی ھچ رنگیں کار نہ کُرت پمیشکا آئی ءِ باسکبندی چَہ وت ھلاس بوتگ ءُ نی آئی ءَ گوں پارٹی ءَ ھچ رنگیں سیادی نیست ءُ ناں پارٹی آئی ءِ کار ءُ کردانی ذمہ وار اِنت ۔