ڈیتھ اسکواڈ ءِ سروک پاکستانی چیریں ادارہ اَنت ' ماماقدیر

شال: پہ بیگواھیں بلوچاں جتگیں شدکشیں کیمپ ءَ 1641 روچ سرجم بوتگ. گوں بیگواھیں بلوچانی کھولاں ھمدردی دْرشان کنگ ءَ چَہ گوادر ءَ میر اللہ بخش گوں وتی ھمراھاں کیمپ ءَ اَتکگ.آئی ءَ گوں بیگواہ ءُ شھد بوتگیں مردمانی سیاداں ھمدردی پیش داشتگ ءُ چَہ وتی نیمگ ءَ کمک ءِ باوری داتگ. وائس فار بلوچ مسنگ پرسنز ءِ وائس چیئرمین ماماقدیر بلوچ ءَ گوں کیمپ ءَ اَتکگیں مردماں گپ جنان ءَ گْوشتگ کہ 1979 ءَ دانشوراں پٹ ءُ پول ءَ پد " ڈیتھ اسکواڈ " ءِ ھمے ساڑا کُرتگ کہ وھدے جابریں آمریں سرکارے یا زورگرے چَہ راھبند ءَ ڈن گوں وتی بگیری داریں مردمانی سرچُوپی ءَ ٹکے جوڑ بہ کنت کہ دُزی ، جنسی زیادتی ءُ مردم آزاری بہ کنت " ڈیتھ اسکواڈ " گُوشگ بیت . اے گال رسانکدراں ھما وھد ءَ اَتکگ وھدے برطانیہ ءِ سرکار ءَ گوریچانی ائیرلینڈ ءَ ڈیتھ اسکواڈ جوڑ کُرتگ ءُ بدنامیں رِپک " شوٹ ٹوکِل " ءَ گوں آئرش ریپبلکن آرمی ءِ سرمچار کُشتگ اَنت چَہ ایشی ءَ پد ھمے پیمیں ڈیتھ اسکواڈ اسپین ،انڈیا،فلپائن،انڈونیشیا،گوئٹے مالا ،بنگلہ دیش ءُ ارجنٹائن ءِ پجیگ ءَ بازیں ملکاں جوڑ کنگ بوت کہ کشت ءُ کشار ءُ ترس اِش ودی کُرت. بلوچستان ءَ بلوچ راجی زْرمبش ءِ نامداری ءُ دیمروی ءَ تکانسریں پاکستان ءَ پہ وتی بدیں مولاں انچیں ڈیتھ اسکواڈ جوڑ کُرتگ. اے ڈیتھ اسکواڈ بلوچ زْرمبش ءَ ھمگرنچیں نودربر، وکیل ،ڈاکٹر،سیاسی سروک ،باپاری ، تاکار ءُ ھرچ سند ءُ سِن ءِ بلوچانی آوار جنگ ءُ کشگ ءَ گون اِنت. بے میاریں بلوچاں دلسیاہ کنگ ،آھانی لوگاں پَلمالی کنگ ، چَہ تمردی سُنگ گرگ پہ زر مردماں آوار جنگ پہ آھاں انچائیں کار جوڑ بوتگ اَنت. سرجمیں بلوچستان ءَ ڈیتھ اسکواڈ ءِ سروکی پاکستان ءِ چیریں ادارہ کنگ ءَ اَنت ءُ گچین خضدار ءُ جھلاوان ءِ گپ بہ بیت گڑا آ اُود ءَ ڈیتھ اسکواڈ ءَ سدانی بلوچانی پجیگ ءَ سرجمیں بلوچستان ءَ بازیں سیاسی کارکن شھید کنائینتگ ءُ پاکستان ءِ بلوچ کُشیں رِپک کاربستگ. دمگ ءِ تہ ءَ وتی ترس ءِ ودی کنگ ءَ اے ریاستی کاسگ چٹاں فوج ءِ ھمراھی ءَ 2011 ءَ توتک ءِ سر ءَ اُرش کُرتگ ءُ چَہ شست ءَ بُرز بلوچ آوار جتگ کہ چَہ آھاں دوازدہ دنیگت ھماھانی چیریں زندان ءَ بند اِنت.