وتکواکیں کوردستان پہ عراق ءِ نزور ءُ زیردستیں ٹکاں  پناھیں جاھے جوڑ بوتگ ۔

عرا ق ءِ قراقوش دمگ ءِ داعش ءِ زیردستی ءَ روگ ءَ پد ھزارھاں عیسای چَہ  آ اُود ءَ لڈ اِتگ ۔ ریاست اسلامیہ ءَ اُستان نینو ءِ دمگ قراقوش ھما وھدی دستیگ کُرت وھدے  کہ آ دمگ ءَ کورد سرمچاراں یلو دات ۔

عیسایانی میان اُستمانی گلے ءَ گْوشتگ کہ عراق ءَ عیسایانی چارکے چَہ قراقوش ءُ آئی ءِ آتراپیں میتگاں در کپگ ءَ اِنت ۔

عراق ءَ عراقی سرکاری لشکر ءَ داعش ءِ دیم ءَ پُروش وارتگ ءُ شیعہ دمگ ءَ نز اَتکگ بلئےعراق ءِ گوریچانی دمگ ءَ کورد سرمچارانی گل پیش مرگا گوں داعش ءِ جنگولاں پہ وتی گلزمین ءِ پھریزگ ءَ جنگ کنگ ءَ اِنت ۔

گْوستگیں ھپتگ ءَ وھدے داعشیاں قوبے ایردست کُرت گڑا چَہ آ اُود ءَ یزیدی نامیں کمتریں مذھبی ٹکے ءِ پنجاہ ھزار مردم چَہ سنجار نامیں دمگے ءَ درکپت ۔

فریترنیت آں نامیں فرانسیسی گلے ءَ وتی فیس بک تاک ءَ گْوشتگ کہ وھدے نینو ءَ قراقوش داعش ءِ جنگولانی دست ءَ کپت چَہ آ اُود ءَ گیشتر مردم پہ سلامتی درکپگ ءَ سوبمند بوتگ ۔

اندازہ جنگ بوگ ءَ اِنت کہ کساس لک مردم وتواکیں کوردستان ءِ نیمگ ءَ لڈ اِتگ ۔

قراقوش چَہ موصل ءَ نوزدہ میل زرباری رودرتک ءَ اِنت اِنت ، گْوستگیں جون ءَ ریاست اسلامیہ ءَ موصل ءِ بندبست وتی دست ءَ آورتگ ۔

پیش مرگا ءِ کورد سرمچار گوں داعش ءِ جنگولاں شریں وڑے ءَ جنگ ءَ اَنت بلئے اگاں آھاں میان اُستمانی کمک مہ رس اِیت ترس اِنت کہ کوردستان ءَ ھم داعش دستیگ کنت ءُ مزنیں کساسے ءَ کورد کشگ بنت ۔

گیشتر بہ وان…

فلسطینی واکمنداں گْوشتگ کہ غرب اُردن ءَ غزہ ءِ سر ءَ بمبگواری ءِ بگیری ءَ بیوکیں زھرشانی ءِ سر ءَ ازرائیلی کارروائی ءَ دو مردم بیران بوتگ ، داں انیگ ءَ چَہ ازرائیلی بمبگواری ءَ ھشت سد ءَ بُرز مردم بیران بوتگ ۔

ھالانی رد ءَ زھرشانی ءِ تہ ءَ دہ ھزار مردم گون بوتگ کہ آھاں چَہ رام اللہ  ءَرودرتکی یروشلم ءِ نیمگ ءَ روانک کشتگ ۔

رودرتکی یروشلم ءَ ازرائیلی فورسزاں آھاں دارگ ءِ جھد کُرتگ چَہ ھمیشی ءَ جاور نگیگ بوتگ اَنت ، دو فلسطینی بیران ءُ چَہ دوسد ءَ بُرز ٹپی بوتگ ۔

چَہ جنگ ءَ غزہ ءَ منندیں مردماں چل درسد جاہ ءَ روگ مکن کنگ بوتگ ءُ پہ شھرمننداں جم کُرتگیں وردنانی امبار گوں تیزی ءَ ھلاس بوگ ءَ اَنت ۔

ھزارھاں مردم تپاک راج ءِ نیمگ ءَ جوڑ کُرتگیں اسکولانی تہ ءَ پناہ زورگ ءَ لاچار اِنت ، بازیں مردماں وراک ءُ آپ ھم شری ءَ پُجگ ءَ نہ اِنت ۔

امریکی فیڈرل ایوی ایشن اتھارٹی ءَ امریکی بالیگ بال دئیں شرکت ءِ سر ءَ پہ تل ابیب ءَ بالیگ بال دئیگ ءِ بندش دور کُرتگ بلئے روکپتی ملک دنیگت پہ تل ابیب ءَ بالیگ بال نہ دیگ ءَ اَنت ۔

ازرائیلی فوج ءَ وتی بیان ءِ تہ ءَ اے ھبر راست گْوشان ءَ گْوشتگ کہ آھاں پہ زھرشانی کنوکانی مُچی ءِ  پُروشگ ءَ کارروائی کُرتگ ءُ ھما وھدی وھدے زھرشانی کنوکاں سنگ چگل داتگ ءُ ٹائر بن داتگ ۔ اے زھرشانیانی جار فلسطین ءِ مزن واک محمودعباس ءِ گل '' فتح موومنٹ '' ءِ نیمگ ءَ دیگ بوتگ اَت ۔

دومی نیمگ ءَ  حماس ءِ سروک خالدمشعل ءَ گْوشتگ داں وھدے کہ ازرائیل غزہ ءِ انگیری ءَ ھلاس نہ کنت جنگبندی نہ کن اِیں ۔ آئی ءَ گْوشتگ مئے ڈکانی تہ ءَ غزہ ءُ مصر ءِ سیمسر ءِ پچ کنگ ءُ فلسطینی زندانیانی یلہ کنگ ءِ لوٹ ھوار اَنت ۔

گیشتر بہ وان…

ازرائیل ءِ زری لشکر ءِ کمانڈواں غزہ ءِ تیاب ءِ سر ءَ اُرش  کُرتگ ۔

ازرائیل ءَ گْوشتگ کہ چَہ ھمود ءَ ازرائیل ءِ سر ءَ راکٹ گْواری بوگ ءَ اِنت ، ازرائیل ءِ زری لشکر ءِ کمانڈواں ھمود ءَ اُرش کُرتگ ءُ چَہ اے اُرش ءَ چار سپاھیگ ٹپی بوتگ بلئے حماس ءِ گْوشگ اِنت چَہ آئی ءِ دیمپانی ءَ ازرائیلی لشکر چَہ تیاب ءَ دیم ءَ اَتک نہ بوتگ ۔

چہ ایشی ءَ ابید گْوستگیں شپ ءَ ھم ازرائیلی لشکر ءِ بالیگاں غزہ ءِ سر ءَ تیر ءُ بم گْورتگ ءُ چَہ اے اُرش ءَ فلسطین ءِ پولیس ءِ کارمند قیف ءِ لوگ ءَ ھم تاوان رستگ ءُ آئی ءِ کھول ءِ ھپدہ مردم شھید بوتگ ۔

فلسطینی گْوشگ ءَ اَنت چَہ ازرائیل ءِ نوکیں اُرشاں سد ءُ پنجاہ ءُ نو فلسطین شھید بوتگ ۔ 

گیشتر بہ وان…

شام ءُ عراق ءَ اسلامی خلافت جوڑ کنوکیں گل داعش ءَ چَہ عراق ءِ شھر موصل ءَ اسلامی خلافت ءِ پاسپورٹ شنگ کُرتگ ۔

ترکی ھالرسانی وبتاک '' ینی شفق '' ءِ رد ءَ  چارجولائی ءَ داعش ءَ چَہ عراق ءِ شھر موصل ءَ چَہ نام گیپتیں اسلامی خلافت ءِ نیمگ ءَ پاسپورٹ شنگ کُرتگ ۔

پاسپورٹ ءِ سر ءَ '' الخلافت السلامیہ '' نوشتہ اِنت ءُ یک نیمگے '' داعش '' ءِ بیرک جتگ ۔ پاسپورٹ موصل شھر ءِ شناسنامہ ءُ پاسپورٹ جوڑ کنوکیں کارگس ءَ اڈ کنگ بوتگ ۔ دنیگت پاسپورٹ شام ءُ عراق ءِ یازدہ ءَ برز مردماں دیگ بوتگ ۔
 

ھال ءِ رِد ءَ دوھزار یازدہ ءَ عراقی سیکورٹی فورسزاں ھمے کارگس ءِ سر ءَ بیڑ بُرتگ ءُ بازیں مردم دزگیر کُرتگ اَت ، داعش ءَ جار پرینتگ کہ دیم ءِ ھپتگ ءَ چَہ ھمے کارگس ءَ خلافت ءِ شناسنامہ شنگ کنگ بیت ءُ چَہ ھمیشی ءِ کمک ءَ شھرمنندانی ڈیٹا گرگ بنت ۔

دومی نیمگ ءَ گوں داعش ءَ بگیرداریں گل اسلامک فرنٹ ءِ راھشون شیخ ابوعبدالملک ءَ گْوشتگ کہ داعش ءِ شان ءُ نام ءُ آئی ءِ سوبمندی اَدارکی اَنت ، اے وھدی اے ریاست گوات ءِ سر ءَ اُوشتاتگ کہ کجام ھم وھدے ھلاس بیت ۔

آئی ءِ گْوشگ اَت کہ اسلامی خلافت جوڑ کنگ ھرابیں ھبرے نہ اِنت بلکیں عبادتے بلئے داعش ءُ آئی ءِ پلہ مرزیں ٹک اسلامی خلافت ءِ سرسبز کنگ ءِ گپ ءَ جن اَنت بلئے اے چونیں خلافتے کہ ایشی ءِ تہ ءَ شوری نیست وھدے کہ خلافت اسلامیہ ءِ اولی گامگیج شورای ءِ ٹھینگ اِنت ۔

داعش ءَ وتی دستیگ کُرتگیں شھرانی نیکراھی کارستانی ادیرہ ءُ شیعہ یانی امام بارگاہ ھم پُروشتگ اَنت ۔
 

گیشتر بہ وان…

بحرینی سر کار ءَ امریکا ءِ مزنیں ڈپلومیٹے ءَ را پرمان داتگ کہ آ زیت وت ءَ چَہ بحرین ءَ بہ کش اِیت، امریکا ءَ اے رِد ءَ وتی بے تاھیری دْرشان کُرتگ ۔

 
امریکی ڈنی کارانی وزارت ءِ اُستمانی ، انسان حق ءُ کارگری کارانی تہ ءَ کمک ٹام مالینووسکی یکشمبے ءِ روچ ءَ بحرین ءَ شتگ اَت ۔

آئی ءَ ماں بحرین ءَ شیعہ ٹک ءِ چَہ  درستاں مستریں گل '' جمیعت وفاق '' ءِ راھشون شیخ علی سلمان ءَ گوں نند ءُ گند کُرتگ ۔

 گل ءَ وتی ٹیوٹر اکاونٹ ءَ نام گیپتگیں گند ءُ نند ءِ ھکسے شنگ کُرتگ ۔

ڈنی کارانی  بحرینی وزارت ءَ  اے درگت ءَ وتی شنگ کُرتگیں بیان ءِ تہ ءَ گْوشتگ کہ امریکی ڈپلومیٹ ءِ اے گامگیج ملک ءِ تھی کارانی تہ ءَ دزمانجنی اِنت ۔

امریکی ڈنی کارانی وزارت ءَ گْوشتگ کہ پہ اے گند ءُ نند ءَ گوں بحرین  سرکار ءَ چَہ دیوان ءَ پیش ھال ءُ ھبر کنگ بوتگ ۔

بحرین ءَ گْوشتگ کہ امریکی اُگدہ دار ءِ چَہ ملک ءَ درکنگ ءَ دوئیں ملکانی سیادی اسرمند نہ بنت ۔


ٹام مالینووسکی  بحرین ءَ پہ سئے روچ ءِ تر ءُ تاب ءَ شتگ اَت ءُ آئی ءِ برنامہ ءِ تہ ءَ ھست اَت کہ  گوں بحرین ءِ سرکار ءَ بگیرداریں گل ءُ انسانی حقانی پانک جنوکیں مردماں گند ءُ نند بہ کنت ۔

ٹام چَہ ایشی ءَ پیش واشنگٹن ءَ انسانی حقانی پھریزکاریں گارگس ءِ مستر اَت ، ءُ ھمے سال ءَ اپریل ءِ ماہ ءَ امریکی ڈنی کارانی وزارت ءِ کمکار ءِ بستار ءَ کار ئِے بندات کُرتگ ۔

بحرینی شیعہ ملک ءِ واکمندی ءِ تہ ءَ بائیواری ءُ تعصب ءِ ھلاسی ءِ لوٹوک اَنت ءُ چَہ دوھزار یازدہ ءَ پہ وتی لوٹاں زھرشانی کنگ ءَ اَنت ۔

گیشتر بہ وان…

حسنین امیر عبداللھیان ، ایران ءِ پہ تازی ءُ اپریکی ڈنی کارانی وزارت ءِ کمک ءَ گْوشتگ کہ آئی ءِ ملک بِھ عراق ءِ بھر کنگ ءِ اجازت نہ دنت ۔

آئی ءَ یکشمبے ءِ روچ ءَ گوں تازی زبان ءَ ھال شنگ کنوکیں ٹیلیویژن العالم ءَ گپ جنان ءَ چَہ ازرائیلی مزن وزیر ءِ نیمگ ءَ کوردانی آجوئی ءِ پلہ مرزی ءِ کنگ ءِ نیمگ ءَ دلگوش داتگ ءُ گْوشتگ کہ ایران '' نیتنیاھو ءِ وابانی'' پیلو بوگ ءِ دیم ءَ الم گیپت ۔

بنجامن نیتنیاھو ، ازرائیل ءِ مزن وزیر ءَ ھپتگے پیش کوردستان ءِ آجوئی پلہ مرزی کُرتگ ءُ آھانی سوبمندی  پہ دمگ ءِ میان روئیں تواناں جوانیں ھمکاری یے لیک اِتگ ۔
   
عراقی کورستان ءِ اُستانی سرکار ءِ مزن واک مسعودبرزانی ءَ گْوشتگ کہ دلمانگ اِیں چندیں ماھانی تہ ءَ چَہ عراق ءَ وتی آجوئی ءَ پچ بہ گر اِیں ۔


حسنین امیر ءَ گْوشتگ کہ چَہ کوردانی نیمگ ءَ وتی آجوئی ءِ جار آھانی اشتاپکاری اِنت ۔

آئی ءَ وتی روس ءِ سواد ءِ نیمگ ءَ اشارہ کنان ءَ گْوشتگ کہ دوئیں ملک پہ عراق ءِ یکجائی ءُ کلیں سرزمین ءِ آجوئی ءَ گوں عراقی مھلوک ءُ سرکار ءَ ھمزان بنت ۔

آئی ءَ گْوشتگ کہ کوردستان ءِ آجوئی ءِ  درگت ءَ اسلامی جمھوریہ ایران ءُ ترکی ءِ اسٹریٹجک لوٹ یک اَنت ۔

گیشتر بہ وان…

سعودی عرب ءِ بنجاھی شھرریاض  ءَ دو وتکشاں وت ءَ  تْراکینتگ  ۔

سرکاری ماڑی یے تہ ءَ سیکورٹی فورسزاں شدتی پجار آورتگ ءُ انگیر کُرتگ اَنت وھدے  شدتیاں تچگ ءِ راہ نہ دیستگ وت ءَ  تْراکینتگ ۔

چَہ اے وتکش تْراک ءَ یک تْراک کنوک ءُ دو سیکورٹی ءِ مردمانی پجیگ ءَ شش مردم بیران بوتگ ۔

گْوشگ بوگ ءَ اِنت وتکش تْراک کنوک القاعدہ ءِ باسک بوتگ اَنت ۔

گیشتر بہ وان…

تل ابیب: سیزدہ روچ پیش بیگواہ بوتگیں سئے ازرائیلی بچکانی جُون دست کپتگ اَنت ءُ ازرائیل ءَ حماس ذمہ وار لیک اِتگ ءُ بیر گرگ بیھار داتگ.

ازرائیلی مزن وزیر بنجامن نیتنیاھو ءَ وتی سرکار ءِ وزیرانی اشتاپی لوٹائینتگیں دیوان ءَ تْران کنان ءَ سئے بچکانی جُونانی دست کپگ ءِ ھال راست من اِتگ ءُ گْوشتگ کوش ءِ ذمہ وار حماس اِنت ءُ آئی ایشی ءِ ھساب دیگی اِنت.

دومی نیمگ ءَ حماس ءَ ازرائیل ھژدار داتگ ءُ گْوشتگ کہ اگاں حماس ءِ بگیری ءَ کارروائی بہ بیت گڑا اِزرائیل پہ وت جھنم ءِ دروازگاں پچ کنت.

امریکی مزن واک اوباما ءَ ھم اے درگت بے تاھیری دْرشان کُرتگ ءُ گْوشتگ کہ چَہ اے پیمیں کاراں جاور گیش نگیگ بنت.

ھپدہ روچ پیش بیگواہ بوتگیں ازرائیلی بچکانی جُون چَہ روکپتی نیمگ ءِ ڈگاراں دست کپتگ اَنت.

گیشتر بہ وان…

واشنگٹن: عراق ءِ گرءُ چلیں جاورانی سبب ءَ امریکہ ءَ دگہ دو سد فوجی ، ڈرونز ءُ ھیلی کاپٹر دیم دئیگ ءِ شَور کُرتگ.

امریکی مزن واک بارک اوباما ءَ گْوشتگ کہ چاریگی ساماناں ءُ ھیلی کاپٹرانی پجیگ ءَ دگہ دوسد امریکی فوجی عراق ءَ دیم دئیگ بیت.

اے فوجی امریکہ ءِ چَہ پیش ءَ عراق ءَ موجودیں دوسد ءُ ھپتاد ءُ پنچیں فوجیاں ھوار امریکی سفارتجاہ ءُ بغداد بالی پٹ ءَ نگھدار اَنت.

چَہ ایشی ءَ ابید امریکی اسپیشل فورس ءِ دگہ سئے سد سپاھیگ ماں عراق ءَ  پہ عراقی فوج ءِ سر ءُ سوج گنگ ءَ نشتگ گوں اے فوجیانی روگ ءَ پد عراق ءَ امریکی فوجیانی کساس داں ھشت سد ءَ نزیک بیت.

گیشتر بہ وان…

ریوٹرز ۔ چَہ سنی منندیں میانی عراق ءَ جھادیانی توپانے چست اِنت دیم پہ بغدادءَ کہ جنگول ءَ نز ءَ  آ اُود ءَ شیعہ سرکارے واکمند اِنت ۔ آ جھلانکیں فرقہ پرستی ءَ سرپوش کنگ لوٹ اَنت کہ آئی ءَ سوریہ ءِ تھی جنگ ھم آس داتگ ءُ ھمے آس  زیمی ئیں موسوی چاگرد ءَ ھم گرگ  ءَ اِنت چوش کہ لیبنان اِنت ۔

فرقہ پرستی ءِ '' جن '' نی جوانیں رنگے ءَ چَہ بوتل ءَ ڈن در اَتکگ ، میان رودرتک ءِ تھی کْوھنیں ربیدگی جیڑھاں کمرنگ کنان اِنت  ابید چَہ ایشی ءَ کہ آ دنیگت ماں  کسمانک ءَ گوازی کنگ ءَ اَنت ۔

1979 ءِ اسلامی آشوب ءَ چَہ عرباں ڈنی ملک ایران ءَ شیعہ مذھبی سرکار ے واکمند بوت ، آئی ءَ میان رودرتک ایران ءُ سعودی عرب ءِ میان ءَ کہ سرجم ءَ بنیادپسندیں '' سنی وھابی '' لیکوانی سر ءَ کاربندیں بادشاھی یے،  پہ میان رودرتکی ملکانی سر  ءَ اثرمند بوگ ءَ ریاست پہ ریاست داں دراجیں مدتے ءَ داروکیں مذھبی تعصبے  اِشت ۔

 دوھزار سئے ءِ امریکی اُرش ءَ عراق نسلی تک ءَ بھر کُرت ،کمتریں سنیانی سر ءَ شماری ھساب ءَ  گیشتریں شیعہ زور آور کُرت اَنت ءُ سدانی سال ءَ ھستیں توان ءِ تناسب  بدل کُرت  ۔
 
نی سوریا ءِ جیڑہ سرکارے ءَ پروش دیگ ءَ اِنت کہ آئی ءِ پُشت ءَ بشارالاسد ءِ  علوی سرکار اِنت ،  کہ چَہ ملک ءِ کمتریں بھر'' شیعہ یاں '' سیادی دار اِیت ۔ یاگیانی بگیری ءَ برجاھیں جنگ گیشتر گوں سنیان اِنت کہ ملک ءِ گیشتریں بھر اَنت ، ھمے جنگ ءَ جھادی رضاکار بغداد ءَ گر داں بیروت ءَ یک بدڈولیں مذھبی جنگجاھے جوڑ کنگ ءِ سکین دات اَنت ۔

'' آ اُود ءَ تپاکیں پجارے ءِ سنچ نیست ءھمے سبب اِنت کہ توان بھر اِنت لیبنان ، سوریا ، عراق ءُ بحرین ءِ وڑ ءَ کہ کسے بہ کٹ اِیت ءُ جنگ آسر بہ بیت ، اے ھما وھد ءَ بیت کہ کٹَوک کلیں ادراھاں دستیگ بہ کنت ۔ '' اے ھبر اَنت میان رودرتک ءَ اکیڈمک ءُ فارمر اسٹیٹ ڈیپارٹمنٹ ءِ اُگدہ دار ناصر ولی ءِ کہ بروکنگز انسٹی ٹیوشن ءَھم  سینَر فیلو اِنت ۔

'' ایشی ءَ ھر دوئیں نیمگ کنگ ءَ اَنت ، چَہ برز ءَ گر جھلءَ  ، جھل ءَ گر برز ءَ   ۔ ''

فرقہ پرستی ءِ نادانی:

اے ھونی ئیں تعصب ءِ کردار باز اَنت چوش کہ '' دولت اسلامی عراق والشام (  داعش / آئی اس آئی ایل ) اِنت کہ چَہ القاعدہ ءَ درکپتگیں گروپے آئی ءِ مول میان رودرتک ءِ دلبند ءَ '' خلافت '' جوڑ کنگ اِنت ، جون ءَ گوریچانی پھنات ءُ عراقی میانی شھر دستیگ ئِے کُرتگ اَنت ۔

چَہ آئی اس آئی ایل ءِ نیمگ ءَ شنگ بوتگیں ویڈو ءِ تہ ءَ پیش دارگ بوتگ کہ آئی ءِ جنگول کماشیں مردے ءِ لوگ ءَ پُروشگ،  آ ءُ آئی ء دو ورنائیںِ چُکاں عراق ءِ شیعہ مزن  وزیر نور المالکی ءِ سرکاری آرمی ءِ بھر بوگ ءِ سبب ءَ ملام کنگ ءَ اَنت ۔

وھدے کہ دزگیر کُرتگیں مردے وتی جند ءِ کبر ءَ جنگ ءَ بیت ، جنگولے گوں آئی ءَ ملنڈ کنت : '' دم برتگ ئے ، ھو ؟ کُوچ ، گیشتر کُوچ ، کج اِنت مالکی کہ بَہ اِت ترا بہ پھریز اِیت ؟ تو پرچا مالکی ءِ فوج ءَ بھرتی بوتگ  ئے ؟  ''

پیرمرد جنگولانی منت ءَ زور اِیت کہ آ گوں آرمی وتی ھمگرنچیاں ھلاس کنت ءُ گْوش اِیت : ''  منی نیمگ ءَ بہ چار ، من وتی جند ءِ کبر ءَ کُوچَگ ءَ آں ، آ منی لوگ ءَ کَہ ینت من ءَ بر اَنت ۔ '' ویڈیو سِست ءُ سیدیں پیمے ءَ ھلاس بیت انچوش کہ گیپتگیں مردماں زھم جنگ بوت ءُ گوں اے گالاں '' ندر کنگ بوت اَنت '' ۔

آئی ایس آئی ایل ءِ سروکے ءَ گوں اسکائپ ءَ ریوٹرز ءَ گپ جنان اے کشت کشار ءِ درگت ءَ گشینتگ کہ اے دلگوش دئیں کار اِنت انچوش کہ آھانی زْرمبش گوں کش گور ءِ سیمسراں وتی اسلامی ریاست ءَ جوڑ بہ کنت۔

'' ما گوں مالکی ءِ ھمراھدار ءُ گوں آئی ءِ پلیتیں ریاست ءَ اسلام ءِ نیکراھی راھبندا نی رِد ءَ پیش کَہ اِیں ۔ ''
آ گْوش اِیت : '' ھرکس چَہ ایشی ءَ پیش کہ ما گوں بالادستی آئی ءَ بہ گر اِیں  گوں پشومانی ءَ مئے کر ءَ بَہ اِت آ چَہ مئے مردماں ھساب بیت ۔ بلئے یکے گوں وتی کافری ، بے دینی ءَ گوں ما جنگ ءَ زور دنت  آ وتی آسر ءَ گند اِیت ۔ ''

آئی اسی آئی ایل ءِ گوں بازیں گپ القاعدہ ھم تپاک نہ دار اِیت ءُ  وتی سر ءَ نہ زور اِیت ، آئی ایس آئی ایل ءَ عراق ءَ نفرت ودی کنوکیں ترانانی تہ ءَ گیشی آورتگ ، بیرگرگ ءِ بیھار دئیان  ءَ  شیعہ یاں '' مالکی  ءِ کچک ''  یا '' رافضی ءُ نجس''  گْوشگ ۔

آ جار جن اَنت : '' مرگ  پہ شیعہ ملایاں تیوکیں زبان اِنت پہ گپ ءَ ءُ آھانی پِس اِتگیں ٹولی سرپد  بہ بیت ۔ ''

چَہ شیعہ یانی نیمگ ءَ ھم انچیں ویڈیو شنگ کنگ بوگ ءَ اِنت کہ آھانی تہ ءَ  سنی سزا دیگ بوگ ءَ اَنت ۔ یکے ءِ تہ ءَ مردمانی ٹکے انچوش پہ دیم کورکائی تیر جنگ بیت  تیر لھتیانی سر ءَ پیوست بنت ۔ چَہ ایشی ءَ پد یک دومی ءَ دروگبند کنگ کہ اے کارپد آئی ءِ نہ ینت  اُوتاک ءِ تہ ءَ پیش اَتکگیں ندارگانی سبب َ دومی ءَ لیکگ کہ  دیوالانی سر ءَ ھونانی نکش ءُ ھرچ نیمگ ءَ تیرانی ٹپ اَنت ۔


بازیں مذھبی تجزیہ نگار گْوش اِیت کہ اے کار پہ وتی بگیری ءَ اُوشتوکانی پُروش دیگ ءَ سلاہ ءِ پیم ءَ کارمرد بوگ ءَ اِنت بلئے ھمے کار آھانی جند ءِ مذھبی زندمان ءِ تہ ءَ زھرمینگ ءَ اِنت ، باز رند ءَ آ وتی تپنگ ءَ سر ءَ کنٹرول ءَ یلو دئے اَنت ۔

'' اے ملکانی تہ ءَ راجی پجار ھلاس بوگ ءُ مذھبی پجار گیشتر رُدوم زورگ ءَ اِنت ۔ '' ناصر ءَ گْوشت ۔

پروفیسرچارلس ٹرپ ءَ لندن یونیورسٹی ءِ اسکول آف اورینٹیل اینڈ افریکن اسٹیڈیز ءَ گْوشتگ : ''  عرا ق ءِ تہ ءَ اے کار چَہ 1990 ءَ بوتگ ، آمر صدام حسین ءَ کہ 2003 ءَ چَہ واکداری ءَ زِبھر کنگ بوت ، سیکولر رجیم ءِ جاہ ءَ  '' نیکراھی تقوی ءِ باوستے '' بندات کُرت  گوں اے کرد ءَ کہ آئی ءِ سر ءَ سنگینیں میان اُستمانی بندش ھست اِت اَنت  ۔ ''

چَہ سنی سلفیانی بے راھبندیں پلہ مرزی ءُ '' شیعہ ازم '' ءِ  سکین ءَ  '' موقع پرستیں راھشوناں دیست کہ  اے پہ مردمانی مذھبی ءُ فرقہ ءِ بنیاد ءَ جنزینگ ءَ سوتمند اِنت ۔ ''

'' کارے ءَ  کہ مالکی سرکار ءِ چیردستی ءَ برجاہ اِنت ، فرقہ پرستانی اَبید چَہ ٹپاس زرتگیں شَور ءُ کارپد گوں کینگ ءُ کنت ءَ بدل کُرت اَنت ۔ ھما لیڈر کہ وتارا  '' نیلامی ءِ بگیری ءَ چالاکیں جنگے''  ءِ تہ ءَ سما کنگ ءَ اِنت ،آھاں ایشی ءَ مذھبی ءُ شرعی گْوشت ۔'' اے ھبر اَنت ٹرپی ءِ  '' دمگ ءِ گوازی گراں ھم وتی سیاسی ءُ جغرافیائی سوت ءُ نپانی شوھاز '' مذھبی قبا ''  گْور ءَ دات اَنت ۔ '' آئی ءَ وتی ھبرانی تہ ءَ ھوار کُرت ۔

آئی ءَ گْوشت :  '' اگاں تو ایرانی یے ءِ بستار ءَ وتی شیعہ ازم ءِ سر ءَ زور دئے اے سوچ  ترا لیبنان ءِ تہ ءَ دراندازی ءِ اجازت دنت ( آ اُود ءَ شیعہ یانی مزنیں آبادی یے ) ۔ ھمے پیم اگاں تو سعودی یے تو گْوشت کن ئے کہ اے دمگی دژمنانی بیگری ءِ درگت ءَ نہ اِنت بلکیں پہ لھتے مستریں مول ءُ مرادان اِنت ۔ '' 

یزد سیگھ کہ بیروت ءِ کارنیگی مڈل ایسٹ سینٹر ءَ ایسوسیئٹ اِنت ، دلیل دنت : '' پہ راستیں وڑے ءَ اے مذھبی جنگ ءِ تہ ءَ ھچ رنگیں '' مذھبی بحث '' نیست اے دائم بنیاد پرستی اِنت ، جنگے پہ سیاسی توانمندی ءَ ۔ ''

 مسلمانانی دو ھمسنگیں فرقہ یانی میان ءَ دُژمنی ھروھد ءُ ھون ریچ ءُ آسشان بنت ، اے نی دمگ ءِ مزنیں پھناتے ءَ تالان بوتگ ، چَہ رودرتکی رومی زر ءَ ءَ بہ گر داں عراق ، مزن ھُور ءَ یمن ءَ ۔ '' اے ناں یکشل ءَ مذھبی اِنت ناں زگریں وڑے ءَ سیاسی؛ دو ھواردگ اَنت کہ یک دومی ءَ سکین ءُ شُور دئے اَنت ، ذاتی سوت ، جغرافیائی ءُ سیاسی گرچل اے آس ءِ سر ءَ پٹرول ریچگ ءَ اَنت ۔ ''
اے ھبر اَنت ، کتاب '' پریلیئس سیناریو ان دی ایسٹرن مڈیٹیرین '' ( رودرتکی رومی زر ءِ ھونی ئیں ندارگ )
ءِ نوشتہ کار طارق عثمان ءِ ۔

عثمان  گْوش اِیت : '' فرقھی جنگ انچیں وھدے ءَ بوگ ءَ اِنت کہ عرب چاگرد دھکاں ھاکمی کنوکیں آمریں بادشاھانی درانڈیھ کُرتگیں راھشونانی رندگیری ءَ چَہ کْوھنیں سیاسی راھبنداں نوکیں سیاست ءِ نیمگ ءَ آیگ ءَ اِنت ، دنیگت ایشی ءِ دْروشم نہ گیش اِتگ ۔''

اے گْوستگیں سد ءُ پنجاہ سال ءِ تہ ءَ اولی رند اِنت کہ دمگ مزنیں کساسے ءَ  چَہ سلاھاں سربار ءُ دیناداسی ئیں جھادے گروپاں  گندگ ءَ اِنت کہ چَہ رودرتکی سوریاءَ گر داں روکپتی عراق ءَ دستیگ کنگ لوٹ اَنت ءُ کم کم ءَ وتی ریاستے جوڑ کنگ ءَ اَنت ، داں وتی موجودگی ءَ دائمی بہ دار اَنت ۔

عثمان ءَ گْوشت : '' اگاں چوش بہ بیت اے  نان ایوک پہ دنیا ءِ اے بھر ءِ واتکواکیں ملکاں ترسے بیت  ، ناں ایوک پہ ھماھاں کہ مذھبی ھساب ءَ شماراِش کم اِنت بلکیں پہ سرجمیں چاگرد ءَ ترسے بیت ۔ ''

زانتکار گْوش اَنت کہ باندات ھمینکس ھَندی ٹکانی دست ءَ اِنت  ھمینکس دمگی توانانی ۔

ٹرپی ءَ گْوشت : '' تھی سیاست ایشی ءَ یک رنگے دات کنت ، باز بر ءَ تھی سیاست ءِ مراد سک باز کُشت ءُ کُشار ءُ ھونریچی بیت ، انچیں کار کہ شما سوریا ءَ دیستگ اَنت اد ءَ گند اِش کہ میتگے ءِ مردم چَہ دومی نیمگ  ءِ مردمانی دست ءَ کُشگ بوتگ اَنت ۔ ءُ الم ھَںدی سیاست اے جنگ ءَ ھلاس کُرت کنت ، شری یے ءِ آورت کنت پرچا کہ راستی ءَ آئی ءِ راھشون تھی مردم بنت ۔ ''  

 دومی نیمگ ءَ  اے راستی یے کہ عراق ءِ زربار ءَ نشتگیں سنی مالکی سرکار ءِ بگیری ءَ ھمپت اَنت ، آ گْوش اَنت کہ مالکی ءَ آ چَہ واکمندی ءَ زِبھر کُرتگ ءُ جھل جتگ اَنت ، آھاں آئی اس آئی ایل اے پہ اے بَھمانگی سوبمندی ءَ کمک کُرتگ ، ءُ ھمے بگیری ءُ دگری آھانی ءُ آئی اس آئی ایل ءِ میان ءَ گستائی ءِ سبب ءَ ھم بوت کنت ، آئی ءِ دگراں برداشت نہ کنگ ءُ کشت ءُ کشارانی سر ءَ ۔ انچوش کہ ھپت سال پیش سوریا ءُ عراق ءَ بوتگ ۔


زانتکار گْوش اَنت کہ  تھی بگیری ، زرانی ءُ زمینانی بھر ءُ واکمندی ءِ جیڑھانی سر ءَ آئی اس آئی ایل ءِ  آسر ءَ  پُرشت ءُ پروش بیت ۔

آھاں باور اِنت کہ  آئی اس آئی ایل ءِ جنگول رد دیگ بنت ، چَہ جتائیں تمن ءُ ٹکانی نیمگ ءَ ، دگہ سنی گروپانی نیمگ ءَ ، صدام ءِ باریگ ءِ افسرانی نیمگ ءَ ءُ عراق ءِ بُنکی مردمانی نیمگ ءَ انچوش  کہ آھاں دوھزار پنچ داں دوھزار ھشت ءَ گوں القاعدہ ءِ راھشون ابو موسی الزرقاوی ءَ کُرت ، وھدے عراقی یاگیاں آئی ءِ تُرندیں اسلامی راھبندانی بگیری کُرت ۔

  لھتے دلیل دنت کہ اے پُرشت پُروش زیت بیت وھدے کہ جھادی وتی دستیگ کرتگیں مزن پھناتیں زمین ءَ سرکار جوڑ کن اَنت ۔

چارلس ٹرپ ءَ گْوشت : '' القاعدہ  ءِ مستریں توان اِیش اِنت کہ آئی ءَ چاگردی ھنکین نیست ۔ آ مردماں لیکوے ءِ سر ءَ یکجا کنت بلئے آھاں لین ، آپ ءُ چاگردی انصاف ءُ دگہ آسراتی آئی ءَ دیگی نہ اِنت ۔ آئی ایس آئی ایل نی ھمے کار ءَ کنت۔   ''

ٹرپی گْوش اِیت : '' داں انیگ ءَ ھما شھر کہ آئی اس آئی ایل ءَ گیپتگ اَنت آ اُود ءَ چاگردی توان ءِ ترتیب ءُ ساچ ٹکی راھشون ءُ پیسرگیں بحث پارٹی ءِ اُگدھداراں دست ءَ اِنت ، وھدے کہ مردم گوں تپنگ ءُ سنگدلی ءَ ءُ آئی ایس آئی ایل گوں کشت ءُ کُشار ءَ اِنت ۔ ''

 ٹرپی ءِ رد ءَ : '' آ زان اَنت آ دمگاں ابید چَہ ٹکانی کمک ءَ ھاکمی کُرت نہ کن اَنت ۔ وھدے تو پیشیگیں کاراں چار ئے کہ  چِہ پیم القاعدہ ءُ زرقاوی ءِ زُور پُرشت پرچا کہ آئی ءَ آھانی راہ  تاب دات ۔ ''

زانتکار گْوش اَنت ؛'' زمین ءِ سر ءَاے گمان کنگ گران اِنت کہ مالکی گوں عراق آرمی  ءَ کہ زمین ءَ گیش گاگدانی سر ءَ ھست  وتی ببا داتگیں زمین ءَ چَہ آئی ایس آئی ایل ءَ پچ گرگ ءَ اِنت ۔ بلئے ایشاں چَہ ایران ءَ ھیلکاری زرتگیں شیعہ جنگولانی کمک ءَ چوش کہ '' اھل الحق '' ءِ پچگرگ فرقی پرستی ءِ کشتارجاہ جوڑ کنوکیں رِپکے ۔ ''

    باز پیشگْوشی کنگ ءَ اِنت کہ جنگ داں ھما وھد ءَ برجاہ بیت وھدے کلیں فرقہ داں سوریہ ءَ گر عراق ءَ ، شیعہ ، سنی ، کرد ءُ علوی وتی وتکواکیں ریاست جوڑ مہ کن اَنت توری وتی انیگیں میان اُستمانی سیمسرانی تہ ءَ ۔

 پدرائیں زمین جاور ءِ بدلی گوریچانی نیمگ ءَ کوردانی دمگ ءَ بوگ ءَ اِنت کہ ایشی ءَ چَہ بیست سال ءَ بُرز ءَ اِنت ءُ زانوگر گْوش اَنت آ پہ مدامی بیت ۔

نوشتہ کار : سامعہ ناکھول
پلگار : ڈومینک ایوانز ءُ  فلیپا فلیچر

گیشتر بہ وان…

عراق ءُ شام ءِ دستیگ بوتگیں دمگاں " اسلامی خلافت " ٹھ اِتگ ءُ ابوبکر البغدادی خلیفتہ المسلمین نامینگ بوتگ.

گْوستگیں شمبے ءَِ انٹرنیٹ ءَ  عراق ءُ شام ءَ جنگ کنوکیں سنی مذھبی گلاں وتی شنگ کُرتگیں گپانی تہ ءَ وتی راھشون ابوبکر البغدادی خلیفتہ المسلمین نامینتگ .

آئی اس آئی اس ءِ جارکش ابومحمدالعدنانی ءَ گْوشتگ " اسلامی شورای ءَ خلافت ءِ بنگپ ءَ جیڑ اِتگ .آئی اس آئی اس ءَ خلافت جوڑ کنگ ءُ مسلمانانی خلیفہ نامینگ ءِ شَوربستگ. "

ابومحمد ءَ جھادی راھشون ابوبکر البغدادی ءِ خلیفہ جوڑ کنگ ءِ ھال داتگ ءُ " گْوشتگ ابوبکر ءَ اُگدہ من اِتگ ءُ نی آ سرجمیں مسلمانانی سروک اِنت. "

ابومحمد ءَ گْوشتگ " سرکاری گاگد ءُ کراچانی تہ ءَ اسلامی ریاست ءِ نام ءِ دیم ءَ عراق ءُ شام  دور کنگ بنت. "

آئی ءَ گوں دنیا ءِ اسلامی گلاں " خلیفہ " ءِ دست ءَ " بیعت " کنگ ءِ لُوٹ کُرتگ.

آئی اس آئی اس سرجمیں دنیا ءَ اسلامی ملکانی سیمسراں ھلاس کنگ ءُ " خلافت " ءِ تہ ءَ ھوار کنگ لوٹ اِیت. اے ناں پہ دنیا ءِ ملکاں تُرسے بلکیں گوں دگہ اسلامی گلاں ھم نسیل اِنت. القاعدہ ءَ ھم چَہ ایشی ءَ سیادی نہ بوگ ءِ جار جتگ.

گیشتر بہ وان…

 جنرل مارٹن ڈمپسی ، امریکن چیئرمین آف دی جوائںٹ چیفس آف اسٹاف ءَ گْوشتگ کہ ابید چَہ ایشی ءَ ایران ءُ امریکہ ءِ ماں عراق ءَ مول ءُ مرام یک نہ ینت ، دوئیں ملکانی پہ داعش ءِ دیم ءِ دارگ ءَ ھمکاری پدنبوتگیں ھبرے نہ اِنت ھرچُنت کہ انی پہ اے رنگیں ھمکاری ءَ باید دراجیں پندے بُرگ بہ بیت ۔ 

 اے ھبر جنرل مارٹن ءَ گْوستگیں آدینگ بیست ءُ شش جون ءَ گوں سرکاری ٹی وی ان پی آر ءَ گپ جنان ءَ گْوشتگ اَنت : '' ما پیسر باید بہ زان اِیں کہ ایران ھم اَنی عراق ءِ ایمنی پھازکاراں شَور ءُ ھیلکاری دئیگ ءَ اِنت یا ناں ۔۔ ۔ ءُ ما تیوک راستیں جاور ءِ زانگ ءَ پد اے درگت ءَ شَوربندی کُرت کن اِیں ۔ '' 

جنرل مارٹن ءَ گْوشتگ: '' آئی ءِ ملک گوں ایران ءَ ھمکاری ءَ پھریز اِنت داں زمانے بہ مار اِیت کہ عراق ءِ تہ ءَ کجام تک ءَ  گوں ایران ءَ تپاکی ھست ءُ ھما وھدی گوں ایران ءَ ھمکاری ءِ درگت ءَ شَوربندی بوت کنت ۔ '' 

داعش ءِ پیشگامی ءِ دارگ ءِ درگت ءَ ایران ءُ امریکا ءِ ھمکاری ءِ بنگپ ھردو ملکانی واکمندانی تہ ءَ دلگوش کرزنیں بنگپے جوڑ بوتگ ۔ دومی نیمگ ءَ اھوالگر ءُ زانتکار ھمے گندگ ءَ اَنت کہ عراق ءَ سنی جنگولانی پہ بغداد ءِ نیمگ ءَ پیشگامی ءَ تھران ، واشنگٹن ءُ ھم ماسکو یکراہ کُرتگ اَنت ۔

گیشتر بہ وان…

امریکی واکداراں گْوشتگ کہ پہ امریکی سوجکارانی پھازگ ءَ سِلاھباریں  ڈرون عراقی آزمان ءَ بال کن اَنت۔

چَہ داعش ءِ نیمگ ءَ ملک ءِ گوریچانی دمگانی گرگ ءَ پد پہ عراقی فوج ءِ کمک ءَ امریکی فوجی سوجکار دیم دیگ بوتگ اَنت کہ عراقی فوج ءَ کمک بنت.

گیشتر بہ وان…

 
جدہ : چَہ داعش ءِ تُرس ءَ دمگ ءِ کلیں ملک دلاپ اَنت ءُ پہ آئی ءِ پیشگامیانی دارگ ءَ چنلانچ کنگ ءَ اَنت ۔

جدہ ءَ سعودی بادشاہ '' شاہ عبداللہ '' ءِ پاگواجھی ءَ راجمان سلامتی ءِ دیوانے بوتگ ۔ دیوان ءَ شاہ عبداللہ ءَ عراق ءِ جاورانی سر ءَ ناوشی دْرشان کُرتگ ءُ  راجمان سلامتی ءِ ادارھاں پرمان داتگ کہ آ پہ دھشت گردانی دیم ءِ دارگ ءَ جوانیں دیمپانی گامگیج بہ زور اَنت ۔

گیشتر بہ وان…

ایران ءِ ڈنی کارانی وزارت ءِ کمکار حسین امیر عبداللھیان ءَ  کہ تازی ءُ اپریکی ملکانی گوں ایران ءَ سیادی ءُ ھمگرنچیاں چار اِیت گوں ایرانی سرکاری ٹی وی '' صدای و سیمای ایران ''ءَ گپ جنان ءَ گْوشتگ کہ اگاں عراق بہ لوٹ اِیت  ایران آئی ءَ جنگی سامان  بلکیں بہ دنت بلئے دنیگت چوشیں لوٹے نہ بوتگ ۔

حسین ءَ گْوشتگ کہ چَہ عراق ءِ دزبندی ءَ ایران میان اُستمانی حق ، سَوڈگ ءُ گپانی ھساب ءَ  پہ عراق ءَ سامان دیم دات کنت ۔

گْوستگیں روچ ءَ نیویارک ٹائمز ءَ چَہ امریکی واکمندی ءِ نیمگ ءَ ھال شنگ کُرتگ کہ ایران ءَ بے سرمنندیں بالیگ ءُ سبکیں جنگی سلاہ ءُ سامان پہ بغداد ءَ دیم داتگ ۔

روتاک ءَ چَہ سرپد ءُ اُگدھداریں مردمے ءَ اے گْوشتگ کہ پکائیں ھال اِنت کہ چَہ ایران ءَ ھمروچ دو بالیگ پہ بغداد ءِ روگ ءَ جنز اِیت ، ھربالیگے ءَ ھپتاد ٹن جنگی سامان مان اِنت ۔

ھمے اُگدھدار ءِ گْوشگ اِنت کہ ایران ءِ '' سپاہ ء قدس ءِ فرماندہ قاسم سلیمانی '' ھم چَہ کم ءَ کم دو گشت ءَ عراق ءَ شتگ۔

ایرانی ڈنی کارانی وزارت ءَ قاسم سلیمانی ءِ عراق ءَ روگ دروگ گْوشتگ ۔

ایران ءِ واکمنداں  اے ھم گْوشتگ کہ آ '' داعش ءِ تُرس '' ءِ دیم ءِ دارگ ءُ عراق ءِ جیڑہ ءِ گیشینگ ءَ گوں امریکا ءُ دگہ جھانی تواناں ھمکاری کن اَنت ۔

حسن روحانی ، ایران ءِ مزنواک ءَ چد ءُ پیش گْوشتگ کہ اگاں عراق دزبندی بہ کنت گوں امریکہ ءَ ھمکاری ءِ درگت ءَ جیڑ اِیں ، بلئے ایرانی سپاہ ءِ سروکاں گوں امریکا ءَ ھمکاری رَد کُرتگ ۔

گیشتر بہ وان…

امریکی پریذیڈنٹ بزاں مزنواک ءَ پہ سوریہ ءِ یاگیانی ھیلکاری ءُ پہ آھاں ساز ءُ سامان پُجارینگ ءَ چَہ کانگریس ءَ پنجاہ کروڑ ڈالر لوٹ اِتگ ۔

اے درگت ءَ اسپیت ماڑی [ وائٹ ھاوس ] ءِ گْوشگ اِنت کہ چَہ اے زراں شامی مھلوک چَہ بشارالاسد ءِ سپاھیگاں وتی دیمپانی ءَ کُرت کنت ۔

گپانی تہ ءَ اے ھم گْوشگ بوت کہ چَہ ھمے کمک ءَ دولت اسلامی عراق والشام [ داعش ] رنگیں اسلامی تُرند روئیں گلانی ھم دیم دارگ بیت ۔

گوں سوریہ [ شام ] ءَ ھم مرزیں ملک عراق ءَ داعش ءِ پیشگامیانی سبب ءَ گانگریس ءِ لھتے باسکاں اُوباما کڈن کُرتگ کہ آ سوریہ ءِ جاورانی درگت ءَ گامگیج بہ زور اِیت ۔

اسپیت ماڑی ءَ گْوشتگ کہ اے کمک سوریہ ءَ لس مردم ءُ تپنگی یاگیانی کمک کنگ ءِ اوباما ءُ کارمندانی سَوڑگ ءُ سوجانی دْرچ  اِنت ۔
 
'' چَہ ایشی ءَ دیمپانی ءِ وزارت ھم من اِتگیں تپنگی یاگیانی کمک کُرت کنت ۔''

گپانی تہ ءَ گْوشگ بوتگ کہ امریکہ یا آئی ءِ دستیار کمک ءِ چَہ بگیری ءَ اُوشتوکیں مردمانی دست ءَ روگ ءِ تُرس ءَ زرانی بھر کنگ ءَ پیش یاگیاں جوانیں وڑے ءَ پُول اِیت ۔

گیشتر بہ وان…

چَہ امریکی سرکار ءِ پلہ مرزی ءَ برجمیں عراقی سرکار ءِ مزن وزیر نوری مالکی ءَ کلیں ٹک ءُ گلانی ھمکاری ءَ جوڑ بیوکیں سرکار ءِ بگیری کُرتگ ۔

اے رنگیں ھواردگیں سرکارے ءِ جوڑ کنگ ءِ  مول '' سنی جھادیانی '' دیم ءِ دارگ اِنت۔

واجہ مالکی ءَ گْوشتگ پہ سرکار ءِ بدلی ءَ زور دیگ ءِ بسات '' گوں بنکی راھبنداں زورکاری ءُ راھے بیت ماں عراق ءَ پہ اُستمانی سرکار ءِ کتہ کاری ءِ ھلاسی ءَ '' ۔


آئی ءَ ماں عراقی ٹیلیوژن ءَ وتی ھپتگی تْران ءَ چَہ کلیں سیاسی گلاں ایمنی ءِ لوٹ کُرتگ داں '' نامھربانیں دھشت گردانی دیم دارگ بہ بیت '' ۔

زانگ بہ بیت کہ اے سوج چَہ امریکہ ءِ نیمگ ءَ دیگ بوتگ کہ '' عراقی سرکار باید چَہ کلیں ٹک ءُ گلانی جھگیرانی ھوار کنگ جوڑ بہ بیت ۔ ''

 گوں '' دولت اسلامی عراق والشام [ داعش ] ءَ ھمگرنچیں بیر آورتگیں جنگولاں  کہ آئی ءِ تہ ءَ گیشتر درملکی جھادی اَنت عراق ءِ مزنیں بھرے دستیگ کُرتگ کہ دنیگت عراقی سرکاری لشکر آئی ءِ پچ گرگ ءَ سوبمند نہ بوتگ ۔

امریکہ ءِ ڈنی کارانی ویزر جان کیری ھم ھمے درگت ءَ بروکسل ءَ گوں نیٹو ءِ واکمنداں گند ءُ نند ءَ شتگ داں عراق ءِ جاورانی سر ءَ گوں آھاں گپ بہ جنت ۔  

گیشتر بہ وان…

بغداد : پہ داعش ءِ دیم ءِ دارگ ءَ نود امریکی لشکری زانوگرانی اولی ٹک بغداد ءَ سر بوتگ کہ عراقی لشکر ءُ سرکار ءَ پہ داعش ءِ دیم ءِ دارگ ءَ لشکری رپک ءُ راہ سوج  کن اَنت ۔ دومی نیمگ ءَ امریکی انٹیلی جنس ءَ ھژدار داتگ کہ اگاں داعش دارگ مہ بیت آ عراق ءِ مزنیں بھرے ءَ دستیگ کنت۔

چَہ نوک اَتکگیں امریکی ٹک ءَ ابید چل امریکی لشکری زانوگر ءُ سوجکار چَہ ایشاں پیش بغداد کارکنگ ءَ اِنت ۔امریکی ڈنی کارانی وزیر ءَ گْوشتگ کہ امریکی فوجی ھچ رنگیں
جنگی کارروائیانی تہ ءَ بھر نہ زور اَنت ءُ تیوک عراقی لشکر ءَ تکنیکی سوج ءُ کمک کن اَنت ۔
داعش ءِ دیمروی پہ سرجمیں جھان ءَ جنجالے جوڑ بوتگ گچین پہ ایران ءَ کہ آ اُود ءَ داعش ءِ بگیری ءُ  عراقی سرکار ءِ پلہ مرزی ءَ روانک کشگ بوگ ءَ اِنت ۔

تپاک راجمان ءَ گوشتگ کہ عراق ءَ گْوستگیں ھپدہ روچ ءِ بے ایمنی ءِ تہ ءَ ھزار ءَ گیش مردم بیران بوتگ ۔

گیشتر بہ وان…