پاکستانی آمیدگساں ثبوت داتگ کہ بلوچانی بیگواھی ءِ تہ ایف سی ءُ دگہ ادارھانی دست ماں ' نصراللہ

شال : وائس فار بلوچ مسنگ پرسنز ءِ چِیئرمین نصراللہ بلوچ ءَ پہ زور بیگواہ کرتگیں مردمانی دراہ نہ کنگ ءِ سر ءَ بے تاھیری دْرشانتگ ۔

آئی ءَ گْوشتگ کہ چیریں ادارہ ءُ سیکورٹی فورسزاں ریاست ءِ تہ ءَ ریاست جوڑ کرتگ کہ آئین ، قانون ءِ پجیگ ءَ انسانی حقانی نہ منگ اِنت ۔

آئی ءَ گْوشتگ کہ چَہ ادراھانی نیمگ ءَ آمیدگس ءِ پرمان ءِ نہ منگ ءُ یکشل ءَ مِرکنگ [ ہٹ دھرمی ] ءَ بیگواھیں مردماں کھول ذھنی تکانسری ءُ جنجالانی آماچ جوڑ بوتگ اَنت۔

آئی ءَ گْوشتگ کہ وھدے بیگواھیں مردمانی کھولاں سپریم کورٹ ءَ بیان ریکارڈ کنائِنتگ آ ُود ءَ ثبوت ھم پیش کنگ بوتگ اَنت کہ آھانی مردمانی آوار جنگ ءَ ایف سی ءُ چیریں ادارھاں ھوار اَنت ۔

سیشن جج نوشکے ءِ رپورٹ ءُ توتک ءِ دزگیرانی درگت ءَ توامیں شاھدی ادارھاں ملامکار کن اَنت ۔ ھمے پیم ڈاکٹردین محمد بلوچ ، ذاکر مجید ، شمس بلوچ ، منیرمیروانی ایڈوکیٹ ءِ کیس ءِ تہ ءَ ھما شاھدی دیم ءَ اَتکگ اَنت درس اے کارپد اں پاکستانی ادارھانی ڈس اَنت ۔