جھدکار عبداللہ حسین بر بیران ، ھیربیار ءَ دلپدردی دْرشانتگ

لندن : ھدامرزی ئیں عبداللہ حسین بر ءَ یورپ ءَ بلوچ راج آجوئی جست ءِ دیم ءَ آرگ ءَ گْرانبھائیں کردے پیلو کرتگ آئی ءِ جھد دائم یات کنگ بنت ۔ آے ھیال بلوچ راھشون ھیربیارمری ءَ وتی یک پرسی بیانے ءِ تہ ءَ کرتگ اَنت ۔

آئی ءَ گْوشتگ کہ بلوچ راجی جست ءِ سر ءَ تْرانکاری ءُ بلوچانی سر ءَ ریاستی زوراکیانی ایرجنگ ءَ بازیں سساتْرانی دیوان [ سمینار ] ءُ کانفرنس ءَ جنیوا ، امریکہ ءُ لندن ءَ بھر زرتگ ۔ ھندوستان ءَ شتگ ءُ آ اُود ءِ بلوچاں پہ بلوچستان ءِ راج زْرمبش ءِ درگت ءَ آگاھی دئیگ ءِ جھد کرتگ ۔ سوشل نیٹورکانی تہ ءَ مدام بلوچ گلزمین ءِ آجوئی وکالت کرتگ ءُ ھرجاہ گوں وتی گزمین ءَدلی ھمبستگی دْرشانتگ ءُ پیش داشتگ کہ یورپ ءِ وشھالیں چاگرد ءِ تہ ءَ ھم پہ لگتمالیں بلوچاں توار چست کنوکیں مردمانی پلہ مرزی کنگ بیت ۔ آ پہ یورپ ، امریکہ ، کینڈا ءُ دگہ ملکاں نشتگیں بلوچاں یک رژناھیں درورے اَت کہ بلوچ راج ءِ ھبر ھرچ رنگ ءُ ھرچ بستار ءَ کنگ بیت ۔ ڈک [ شرط ] ایوک ایش اِنت کہ تو گوں دلستک بلوچ گلزمین ءِ آجوئی ءَ سرجمی ءَ ایمان بیار ئے ءُ ھدامرزی ئیں حسین بر ءَ اے ھبر ءِ سر ءَ سرجمی ءَ باور اَت کہ بلوچ آجوئی زْرمبش الم سوبمند بیت ءُ آجوئیں بلوچستان دنیا ءِ نکش ءِ سر ءَ ودی بیت ۔

آئی ءَ گْوشتگ کہ چَہ عبداللہ حسین بر ءِ بیرانی ءَ ما چَہ یک راست ءُ بلوچ دوستیں کارکنے ءَ زِبھر بوتگ اِیں ۔ مئے گوں ھاوند ءَ مراد وندی [ دعا] اِنت کہ ھدا آئی ءَ وتی سارتیں ساھگ ءَ جاہ بہ دنت ءُ پشتپداں اُوپار ءِ ھاٹیگ ۔