پشوکان : پاکستانی لشکریانی کھرآماچ یکے شھید ، سئے آوار

گوادر ءِ زرباری نیمگ ءَ پشوکان نامیں تیابدپی کوچگ چَہ بلوچ سرمچارانی 21 جولائی ءِ سوبمندیں اُرش ءَ پد پاکستانی چیریں ادارہ ، ایف سی ءُ کوسٹ گارڈ ءِ دھشت گردیانی آماچ اِنت ۔
چَہ پشوکان ءَ گْوستگیں 23 اگست ءِ کساس دوازدہ بج ءَ پاکستانی لشکریاں صمد ء بلال کہ وتی سنگتانی نیام  ءَ نندوک اَت  آوار جتگ ءُ گوں وت برتگ ۔
صمد ءِ آوار جنگ ءِ سر ءَ جنین آدماں زھرشانی کرتگ ءُ داں کوسٹ گارڈ ءِ کیمپ ءَ شتگ اَنت ۔
مروچی [ 24اگست ] ءَ ھال رستگ کہ صمد ء بلال میت گوادر ءِ نگور نامیں کوچگ ءِ نزیک ءَ دست کپتگ ۔
چَہ پشوکان ءَ  ابید چَہ شھید صمد بلال ءَ دگہ سئے ورناہ رزاق ء پالاری ، جلیل ء مراد ءُ رمضان ء یعقوب ھم پاکستانی لشکریاں آوار جنگ ءَ پد بیگواہ کرتگ اَنت ۔
ھندی مردمانی گْوشگ اِنت کہ آوار جتگیں مردمانی ھچ رنگیں جنگی ءُ سیاسی راجدوستیں گل ءَ گوں سیادی نیست ۔ آوار جتگیں مردمانی لھتیں سرگرمیانی سبب ءَ مردماں ھمے گمان دْرشانتگ اَت کہ ایشانی آوار جنگ ءِ پشت ءَ انٹی نارکوٹکس ءِ دست مان اِنت بلے نوکتریں ھال ءُ صمد بلال ءِ ٹپ ءُ ٹوریں میت ءِ دست کپگ ءَ پد اے شک راست بوتگ کہ اے آوار جنگ ءُ کوش ءِ تہ ءَ پاکستانی چیریں لشکریانی دست مان اِنت ءُ اے دھشت گردیانی پژگرد بلوچ سرمچارانی پشوکان ءَ پاکستان کوسٹ گارڈ ءِ سر ءَ بوتگیں اُرش اِنت چَہ ھما  اُرش داں زیکیں روچ ءَ ھما اِنت پاکستان ءِ لشکریاں پشوکان ءِ جاھمندانی سر ءَ زور ءُ دھشت گردی گیش کرتگ ۔
گْوستگیں شپ ءِ اولی پاساں پشوکان ءَ ھمگْوریں کْوچگ پلیری ءَ پاکستانی چیریں ادارہ ءِ کارنندہ پہ بلوچ جھدکارانی شوھاز ءَ  پتر تگ اَنت ءُ ھند ی مردم اش لٹ کٹ کرتگ اَنت ۔