سرمچار فاروق شھید ' بی ایل ایف ءَ دہ ءَ گیش زورگریں لشکری مُردار کُرتگ

بلوچ لبریشن فرنٹ ءِ جارکش گھرام بلوچ ءَ شھید سرمچار فاروق بلوچ ءَ سھریں سلام پیش کنان ءَ گْوشتگ کہ کیچ ءِ ھنکین ڈنڈار مادگ موڑ ءَ سرمچاراں زورگریں لشکر ءِ  پنچ گاڑیانی سر ءَ گوں وتکاریں سلاہ ءُ راکٹاں اُرش کُرتگ ، چَہ ایشی ءَ دژمن ءِ دو گاڑی سرجمے ءَ سُتکگ ءُ سئے ءَ مزنیں کساسے ءَ تاوان رستگ ۔ چَہ اے اُرش ءَ دژمن ءِ شش سپاھیگ مُرتگ ءُ بازینے ٹپی بوتگ ۔

گھرام بلوچ ءَ گْوشتگ بلوچ سرمچاراں آواران ءِ پیراندر ءِ ھنکین زومدان ءَ زورگریں لشکر ءِ سر ءَ اُرش ءَ گاڑی یے سوتکگ ءُ شش زورگریں سپاھیگ کُشتگ ۔

آئی ءَ گْوشتگ کہ گْوستگیں روچ ءَ بلیدہ زامران ءَ جالگی ءَ ڈیتھ اسکواڈ ءِ کارمند حاجی رشید ءَ گوں چیریں ادارھانی مردماں بلوچ سرمچارانی سر ءَ اُرش کُرتگ چَہ اے جنگ ءَ ریاستی کاسگ چٹانی کارمندے مُرتگ ءُ دو ٹپی بوتگ ۔

گوں ریاستی کاسگ چٹاں بوتگیں جالگی ءِ جنگ ءَ بی ایل ایف ءِ سرمچار فاروق بلوچ شھید بوتگ ۔ بی ایل ایف فاروق بلوچ ءَ سھریں سلام نْدر کنت کہ آئی ءَ پہ بلوچ گلزمین ءِ پھازگ ءَ وتی سر نْدر کُرتگ ۔

جارکش ءَ گْوشتگ کہ ھمے مردم شھید پروفیسر صبا دشتیاری ءِ کوش ءَ ھوار بوتگ اَنت ، زیت ریاستی کاسگ چٹ اے کارانی ڈنڈ دیگ بنت ۔

آئی ءَ گْوشتگ کہ پشمبے ءِ روچ ءَ لباج چوکو آواران ءَ زورگرانی چوکی ءِ سر ءَ اُرش کُرتگ چَہ اے اُرش ءَ بازیں زورگر مُرتگ ۔

آئی ءَ گْوشتگ کہ بی ایل ایف داں گلزمین ءِ آجوئی ءَ وتی دست ءَ نہ دار اِیت ، داں گلزمین ءَ دژمن ءِ سپاھیگے مَل اِیت بی ایل ایف ءِ سرمچارانی تپنگ پہ آئی ءَ آس گْوار اِیت ۔