داں مزنیں وھدے ءَ اُستاد غلام رسول دینارزھی ءِ کنڈ پر کنگ نہ بیت ' اُستاد تاج محمد طاھر

چھبار : بلوچی نامی ئیں شاعر ، آزمانکار ءُ زیمر ساچ اُستاد تاج محمد طاھر ءَ گوں بام ھال ءِ جھگیر ءَ گپ جنان ءَ گوشتگ کہ اُستاد غلام رسول دینار زھی یک وژدل ءُ وش تبیں مردے بوتگ آئی ءِ زیمر ءُ آھنگانی تہ ءَ دلپدری ءُ موتک رنگ سما بیت  کہ آئی ءِ تھی درد ءُ دورانی درانگازی بوتگ اَنت بلے ماں دیوان ءَ آ پُر کندگ ءُ وش ھبریں مردے اَت بلوچی زیمرساچی ءِ پڑ ءَ آ وتی مٹ وت اَت بے اُمیت بوگ نہ لوٹ اِیت بلے داں مدتےءَ اے رنگیں زیمر ساچ ودی بوگ ءِ گمان نیست آئی ءِ کمی داں دیر ءَ سما کنگ بیت ۔ اُستاد ھما اولی زیمر ساچ بوتگ کہ بلوچی زیمر ءِ تہ ءَ اولی رند ءَ دو ڈھولے کارمرد کرتگ ، غلام گولو ءُ نصرت ناز ءِ ڈیوٹ ئِے جوڑ کرتگ ۔آئی ءِ دھن سک باز مشکل بوتگ اَنت بازیں گشندھاں جتگ اَنت بلے آھاں ھم  ھما رنگ ءَ کہ  آ جنگ بہ بنت نہ جتگ اَنت ۔اُستاد ءَ گوں وتی ازم ءَ مزنیں شاعر گوں مھلوک ءَ پجاروک کنائینتگ اَنت چوش کہ سید ھاشمی ، جی آر ملا ، عطا شاد ءُ کریم دشتی ۔آ یکیں رند ءِ کار ءَ ایمن نہ بوتگ اَت بلکیں آئی ءَ یکیں دستونک یا لچہ دہ دہ رند ءَ دھن داتگ اَنت ۔ ھمے درگت ءَ غلام بھار ءَ ھم  درور دیان ءَ گوشتگ کہ اُستاد دینار زھی ءَ چَہ وتی زند ءَ چندیں روچ پیش سید ھاشمی ءِ یک دستونکے نوکیں دھنے داتگ چد ءُ پیش کہ اُستاد ءَ دھن داتگ اَت ما ھمے گوشتگ کہ نوں چد ءُ جوانتر بوت نہ کنت بلے ھمیں نوکیں دھن ءَ گوں  اُستاد ءَ گوشتگ کہ چَہ پیشگیں دھن ءَ ھم وشتراِنت ، اے آئی ءِ  زیمرساچی ءِ کمال ءُ آئی ءِ زانتکاری اَت کہ  زانتگ اِت ئِے کہ دھن انگت جوانتر چون کنگ بہ بیت ۔ اُستاد تاج محمد طاھر ءَ گوشتگ کہ اُستاد ءِ شاعری ءِ تہ ءَ ھم پھتوئی اَتکگ اے پھتوئی ءَ وانوک وت سما کن اَنت وھدے کہ آیوکیں روچ ءَ آئی ءِ شعراں وان اَنت ۔ اُستاد ءَ بلوچی زیمر ءِ نوکی آورتگ ءُ وتی یک جتائیں رنگے ءَ زیمر ساچی کرتگ ۔