گوادر:سیمسری ڈک دوسد ءُ پنجاہ ءَ جنین آدم گوں پستول ءَ دزگیر

گوادر :  چَہ روردرتکی ءُ روکپتی بلوچستان ءِ سیمسری ڈک دوسد ءُ پنجاہ ءَ چَہ جنین آدمے ءِ اُرداں پستولے درکپگ ءَ پد ایرانی مرزبان ءَ دزگیر کرتگ ۔ مارا رستگیں ھالانی رِد ءَ پستول  ءُ ھشت دانگ تیر یک موبائلے ڈبھے ءِ تہ ءَ بوتگ اَنت کہ  پٹ ءُ پولے میان ءَ ایرانی مرز بان ءَ دست کپتگ اَنت ۔ پاکستانی کسٹم ءِ کارمنداں اے درگت ءَ گوں مئے اھوالکار ءَ گْوشتگ کہ آھاں اے رِد ءَ بازیں مالومداری نیست اے کار ایرانی سمیسر ءَ بوتگ ءُ پہ ھال دزگیر بوتگیں جنین آدم ایرانی شھروند اِنت ۔ 

چم گندوکاں اے رِد ءَ گوں ما ھال کنان گْوشتگ کہ چَہ جنین آدم ءَ پستول ءِ دست کپگ ءَ پد ایرانی مرزبان ءِ سپاھیگاں جنین ءِ گْور جیگ گیپتگ ءُ ژابلینتگ ءُ موداں گیپتگ ءُ گْران کرتگ ءُ پاسگاہ ءِ تہ ءَ برتگ ۔ اِے رِد ءَ پاکستانی کسٹم ءِ کارمند ءَ وتی نام درانہ کنگ ءِ ڈک ءَ گوں اھوالکار ءَ گْوشتگ کہ '' ایران ءُ پاکستان ءِ سیمسراں پہ راھداری ءِ سر ءَ گْوزوکاں ھچ رنگیں آسراتی نیست ۔ ھر دو نیمگ ءِ سرکار ءَ اے نیمگ ءَ دلگوش دئیگ لوٹ اِیت پہ شپکی ءُ سِلاہ ایران ءِ تہ ءَ برگ ءَ ایرانی مرز سک دْراج اَنت چَہ اے رنگیں جاھاں سلاہ یا دگہ بے راھبندیں سامان برگ مشکل اِنت ، البت اے رنگیں کسانیں کار چَہ لھتیں مردمانی ناسرپدی ءَ بنت ۔ پہ ایشانی دیم ءِ دارگ ءَ ھردو نیم ءِ واکداراں مزنیں تک ءَ گند ءُ نند کنگ لوٹ اِیت ''

آئی ءَ گمان دراکرتگ کہ ''  گیشتر ھمے گمان اِنت نام گیپتگیں جنین آدم یکے ءَ رَد داتگ ءُ ٹیکی ءِ نام ءَ داتگیں ڈبہ ءِ تہ ءَ سِلاہ چیر داتگ '' 

آئی ءَ دگہ جستے ءِ پسو ءَ گْوشتگ :''  چَہ راھداری ءِ سر ءَ گْوزوکیں مردم چَہ ایرانی مرزبان ءِ سپاھیگانی رَوش ءَ دلسیاہ اَنت ۔ بوت کنت آھانی لھتیں لاچاری بہ بنت بلے ھریک مردمے دُز ءُ شپک نہ اِنت اے درگت ءَ باید سپاھیگ ھیلکاری ءُ سوج دئیگ بہ بنت ۔ اگاں مرز ءِ ھر دو نیمگ ءَ نوکتریں آسراتی، اسکینر ءُ دگہ پٹ ءُ پولی مشین ایر کنگ بہ بنت پہ اے رنگیں کارانی گر ءُ دار ءَ آسانی بیت ۔''

آئی ءَ چَہ اھوالکارے نیمگ ءَ جست کرتگیں دگہ پسوے ءَ گْوشتگ ''  چَہ مئے نیمگ ءَ گیشتر جھد ھمیش کنگ بیت کہ مسافر دلسیاہ مہ بنت ۔ اے سوج ھم جْوان اِنت کہ پہ جنین آدمانی سامانانی پٹگ ءَ باید جنین آدمیں کارمند ءُ سپاھیگ اُوشتارینگ بہ بنت ۔ سرکار ءِ کار مردمانی دلسیاہ کنگ نہ اِنت بلکیں آھانی زندمانی ءِ پھریزگ ءُ نگھوانی اِنت ۔''

چَہ اے دزگیری ءَ مردماں گمان دْرشان کرتگ کہ سرکار باید اے نیمگ ءَ ھم دلگوش بہ دنت کہ جنین آدم رَد دیگ نہ بوتگ ءُ چَہ میار ءِ راست بوگ ءَ پیش باید گوں آئی ءَ گھتریں رنگے ءَ پیش آیگ بہ بیت ءُ پہ جست ءُ پرس ءَ جنین آدمیں سپاھیگ گْوشگ بہ بنت داں اے کارپد پہ دگہ شھرونداں یک چاگردی ءُ سیاسی جیڑھے جوڑ مہ بیت ۔ 

 آھاں اُوست بستگ کہ ایرانی سرکار وتی شھروند ، میار ءُ بے میارانی میان ءَ کشک رست کنت ۔ لھتیں مامورانی بدروشی ءَ مُراد اے نہ اِنت کہ سرکار پہ بے میاراں تْرند اِنت ءُ سددر سد گمان ھمیش اِنت کہ گوں جنین آدم ءَ اسلامیءُ  جمھوری سلامی ایران ءِ راھبندانی پد ءَ پیش آیگ بیت ۔ اگاں کسے ءَ بدگمانی یے ھست ما گوں دمگ ءِ وکیل واجہ الحاج یعقوب جدگال ، صدر اسلامی جمھوری واجہ احمدی نژاد ءُ رھبر ءَ گوں دزبندی کن اِیں کہ آ اے نیمگ ءَ دلگوش بہ کن اَنت ءُ ضامن جوڑ بہ بنت کہ ریاست ءِ مامور گوں دزگیر بوتگیں جنین آدم ءَ راھبنداں  در رَوش اختیار نہ کن اَنت ۔