بریس : ابراھیم تاج ءَ کوڑھیں دنیا ءَ وھیل کرت

ھدامرزی 9 ستمبر ءَ یک بھمانگیں وڑے ءَ بیران بوت ۔ 9 ستمبر 2012 ءَ نیمروچ ءِ وھدءَ  ھال شنگ اِت کہ ھدامرزی چَہ جیمڑی ءَ کاھک ءِ سر ءَ  بریس ءَ واتر بوگ ءِ میان ءَ توجانی پاسگاہ نامیں جاھے ءَ بڈ اِتگ ءُ بیران بوتگ ۔ مئے اھوالکار ءَ رستگیں ھالانی رِد ءَ پوسٹ مارٹم ءِ رپورٹ گوں اے ھال ءَ ھمدپ نہ اِنت ءُ ڈاکٹر ءَ گمان دْرشان کرتگ کہ ھدامرزی چَہ آ وھد ءَ پیش بیران بوتگ کہ مردمانی گْوشگ اِنت ۔

ابراھیم تاج کساس مروچیگ ءَ پنجاہ سال پیش 1962 ءَ روکپتی بلوچستان ءِ تیابدپی ھند بریس ءِ ھمگْور ءَ رودیگ نامیں کْوچگی ءَ ودی بوتگ ھدامرزی ءَ رسمی وانگ داں مڈل ءَ دربرتگ ۔ ھدا مرزی چابھار ءِ ھند ءُ دمگاں روکپتی بلوچستان ءِ چَہ ھما شاعراں یکے شمار بیت کہ اد ءَ بلوچی زبان ءِ رُشت ءُ ردوم ءِ تہ ءَ مزنیں کردے پیلو کرتگ اِش ۔

ھدامرزی بریس لبزانکی گل ءِ پاگواجھی ءِ اُگدہ  ءِ سر ءَ ھم بوتگ ءُ پہ بلوچی زبان ءِ دیم ءَ برگ ءَ شپ روچ یک ئِے کرتگ ۔ ھما زمانگ ءَ کہ چابھارءِ دمگ ءَ بلوچی زبان ءِ وانگ ءُ گوشدارگ ءِ ھب نوکباھندانی تہ ءَ نزور اَت آروسی مراگشانی تہ ءَ لچہ گْوشی دیوان ءِ بھر ھوار کرتگ ءُ نوکباھند ھمے پیم بلوچی زبان ءِ نیمگ ءَ سکین داتگ اَنت ۔ ھدا مرزی ءَ وتی شئرانی دپتر '' گم ءِ اُوتاک '' ءِ نام ءَ سرجم کرتگ ءُ  پہ چاپ ءَ مھتل اَت کہ زند ءَ موہ نہ
دات ۔

ھدامرزی بریس ءِ سیمی مزن نامیں شاعراِنت کہ نیم سند ءِ تہ ءَ اناگتیں مرگ ءَ دوچار کپتگ ۔ چد ءُ پیش صدیق سلیمی ءُ میم مولی ھم ماں ورناھی ءَ چَہ ما سستگ ءُ بریس ءِ ھاکانی میار اَنت ۔ ابراھیم تاج ھم بریس ءِ ھمے کبرانی میان ءَ ھاکانی میار کنگ بوتگ ۔