بام ھال چَہ پاکستان ءَ پد درساں گیش امریکی آئی پی اڈریساں وانگ بیت 'اسٹیٹس رپورٹ

بام ھال ءِ چاروکانی ھسابداریں تاک ءِ رِد ءَ گْوستگیں ھپتگ ءَ بام ھال چَہ درساں گیش پاکستانی آئی پی اڈریساں وانگ بوتگ کہ ایشی ءَ پد امریکی ءُ آسٹریلیائی آئی پی اڈریساں ۔ پہ نیٹ کارمرد کنگ ءَ ھم ھرچ ملکے ءَ وتی آئی پی ایڈریسے ھست  بلئے گمان ھمیش اِنت کہ امریکہ ءُ آسٹریلیا ءِ آئی پی ایڈریس چَہ ایران ءَ بام ھال وانوکانی نیمگ ءَ کارمرد بوتگ اَنت ۔

ایران ءَ فیس بک ءِ سر ءَ بندش ءِ سبب ءَ پہ فیس بک ءِ کارمرد کنگ ءَ پراکسی یا انٹی فلٹر سوفٹ ویئر کارمرد کن اَنت کہ آ ایرانی بندش ءِ پُروشگ ءَ امریکہ ءُ دگہ در ملکانی آئی پیانی کمک ءَ ایران ءَ فیس بک کارمرد کنوکاں رسائی دئے اَنت ءُ گمان ھمیش اِنت اے آئی پی ھما وانوکاں کارمرد کُرتگ اَنت کہ آ چَہ فیس بک ءَ شنگ بوتگیں لنکانی کمک ءَ اَتکگ اَنت ۔

چارمی نمبر ءَ برٹش آئی پی کارمرد کنوک اَنت ، پنچمی یو اے ای ، ششمی عمان ، ھپتمی رشیا ، ھشتمی بھرِن ، نوھمی سویڈن ءُ  چَہ درساں کمتر چاروک چَہ اوگانستان ءَ بوتگ اَنت ۔

بام ھال ءِ چاروکانی ھسابداریں تاک ءَ اے گمان پُروشتگ کہ اسمارٹ فونانی آیگ ءَ پد انٹرنیٹ چَہ درساں گیش موبایل ءَ کارمرد کنگ بیت بہ گند ئے پہ دگہ ھند ءُ دمگاں اے ھبر راست بہ بیت بلئے بام ھال ءِ دنیگت گیشتر وانوک پنجاہ ءُ ھپت درسد چَہ ونڈوز ءَ براوزنگ کنت ءُ گمان ھمیش اِنت اے براوزنگ چَہ ڈسک ٹاپ کمپویٹر یا لیپ ٹَاپ ءَ بنت ۔ ونڈوز ءَ پد دومی نمبر ءِ وانوکانی کر ءَ انڈروڈ سسٹم ھست کہ آ کلیں وانوکانی نوزدہ درسد اَنت ۔ آ دگرانی ھساب اے پیم اِنت میکنٹوش سیزدہ ، آئی فون پنچ ، آئی پیڈ ، لینکس ، نوکیا، سمبئن ءُ دگہ یک یک درسد ۔

 چَہ براوزرانی تہ ءَ فائرفاکس چَہ درساں گیشتر سی ءُ ھشت درسد کارمرد بیت ، کروم دومی نمبر ءَ بیست ءُ پنچ درسد ، کروم فریم نو ، موبایل سفاری ھپت ،اوپیرا پنچ ، او اس ایف بی ایس وی چار ، انٹرنیٹ ایکسپلورر سئے ، سفاری سئے ، نوکیا براوزر ءُ یوسی براوزر یک یک درسد پہ براوزنگ کارمرد بوتگ اَنت ۔

بام ھال چَہ درساں گیش گوگل سرچ انجن ءِ لنک ءَ َ چارگ بیت ، چَہ ایشی ءَ پد فیس بک  ، فیس بک موبایل ، ٹیوٹر ءُ دگہ نیمگ ءَ شنگ بیوکیں لنک ءَ ھم چارگ بیت ۔

چَہ سرچ انجناں شوھاز بیوکیں بازیں کی ورڈزاں ھمگرنچیں  لنکاں ھم بام ھال ءِ تاک پچ کنگ بوتگ اَنت ، چَہ آھاں ایرانی سرپرہ ، کیچ مکران ، اشرف غنی احمدزئی ، بلوچ سرمچار ، بلوچی ازمکار، بی ایل ایف سرمچار ، جسمم سندھودیش ، سرمچار ءُ دگہ ھوار  اَنت ۔

چَہ اسٹیٹس نامیں اے ھسابدار ءِ کمک ءَ بام ھال ءِ شونکار زانت کن اَنت کہ آھانی وانوک چونیں نکان گیشتر وان اَنت ءُ آھانی اسکرین ءِ سر ءَ بام ھال کجام دْروشم ءَ گندگ بیت چوش بام ھال ءِ دْروشم ءِ گھتر کنگ ءُ وانوکانی تپ ءَ ھمدپیں مواد شنگ کنگ ءَ کمک رس اِیت ۔