کلانچ :امبی ءَ پاکستانی لشکر ءِ بیڑ ، سئے گس مانداشت ، گاڑی دز اِت ءُ پنچ مردم آوار جت

فیس بک ءَ وش نیوز ءَ ھمگرنچیں اھوالکار عین قادر ءَ ھال شنگ کُرتگ کہ کلانچ ءِ ھنکین '' امبی '' ءَ پاکستانی لشکریاں بیڑ بُرتگ ، ماں اے بیڑ ءَ  آھاں پنچ مردم دزگیر کُرتگ ۔

آئی ءَ ھَندی مردمانی داتگیں ھالانی رِد ءَ گْوشتگ کہ زورگراں اُرش ءِ میان ءَ جنین آدم جتگ اَنت ، سئے لوگ بن داتگ ، گاڑی یے ھم دُز اِتگ ۔ ماھے پیش ھم ھمے میتگ ءَ زورگراں اُرش کُرتگ ءُ بازیں مردم دزگیر کُرتگ  کہ چَہ آھاں چار مردم دنیگت بیگواہ اِنت ۔

آئی ءَ ھال کُرتگ کہ '' امبی '' ءَ لھتے ماہ پیش کشگ بوتگیں بی این پی مینگل ءِ باسک '' ملا یوسف '' ءِ بنی میتگ اِنت ءُ دزگیر بوتگیں مردم ھم آئی ءِ نزیکیں سیاد اَنت ۔

چد ءُ پیش بام ھال ءَ جتائیں ھالوانی داتگیں ھال ءِ پد ءَ ھال شنگ کُرتگ اَت کہ  پسنی ءِ ھنکین کلانچ ءَ زورگریں ایف سی ءِ لشکریاں  مروچی سھب ءَ بیڑ بُرتگ ۔ بازار ءِ  بازیں مردمانی لوگاں پُترتگ اَنت ۔ گرانھریں سامان پُروشتگ ءُ سھر ءُ زر دز اِتگ ءُ مردم آوار جتگ اَنت ۔

پسنی ھال نامیں پَیس بک تاکے ءِ رِد ءَ چَہ بیلار ءَ حاجی پیروز ءِ دو چک '' امیر '' ءُ '' موسی '' ، محمد ءِ چک '' صابر '' ءُ عبدالرحمن ءِ چک '' رشید '' زورگراں آوار جتگ اَنت ۔

بام ھال ءِ اھوالکار ءَ اے رِد ءَ گْوشتگ کہ کلانچی مردمانی گْوشگ اِنت  زورگریں ایف سی ءَ چَہ کلانچ ءَ '' یونس کلانچی '' نامیں مردمے ءِ پجیگ ءَ دگہ لھتے مردم آوار جتگ ۔

اھوالکار ءِ گْوشگ اِنت چَہ بیلار بیڑ ءَ پد ایف سی ءِ کاروان گوادر ءِ نیمگ ءَ اَتکگ ءُ گمان ھمیش اِنت کہ آوار جتگیں مردم ایف سی کیمپ گوادر ءَ آرگ بوتگ اَنت ۔