چَہ ڈاکٹر مالک ءَ اسلم رئیسانی گھتر اَت ' عیسی نوری

زوگریں سرکار ءِ ماں اسلام آباد ءَ پارلیمان ءِ باسک ءُ بلوچستان نیشنل  پارٹی ءِ راھشون  عیسی نوری ءَ گْوشتگ کہ بلوچستان ءِ سروزیر عبدالمالک وت ءَ راجدوست گْوش اِیت بلئے آ راجدوستی ءِ نام ءَ  مردماں ریپینگ ءَ اِنت اے وھدی بلوچستان ءَ چَہ گْوستگیں سروزیر اسلم رئیسانی ءِ باریگ ءَ ھم بدتریں سرکارے نشتگ ۔ پارلیمنٹ کیفے ٹیریا ءَ گوں اھوالکاراں گپ جنان آئی ءَ گْوشتگ کہ مئے گْور ءَ چَہ راھبنداں در مردم کشگ بوگ ءَ اَنت ، بے میاریں مردم آمیدگس ءِ دیم ءَ آرگ نہ بنت ءُ آ چیریں زنداناں آزار دیگ ءُ کشگ بوگ ءَ اَنت ۔اگاں راجدوستانی سر ءَ بھتامے ھست گڑا آمیدگس ءَ پیش کنگ بہ بنت نا کہ چَہ آمیدگس ءِ پرمان ءَ ڈن کشگ بہ بنت ۔ مروچی گْوشگ بیت کہ راجدوستانی سرکار اِنت بلئے پہ راستی ءُ گامگیجی چوش نہ اِنت چَہ اے سروزیر ءَ اسلم رئیسانی گھتر اَت ، انیگیں سرکار ءَ اُلس ءِ باور گون نہ اِنت ۔

آئی ءَ گْوشتگ کہ بلوچ پاکستان دوست اَنت بلئے آ پہ سرمتابی ءَ لاچار کنگ بوگ ءَ اَنت اگاں اُلس کشگ بیت گڑٰا مردم دلپروش بنت ۔