بلوچ جیڑہ ءِ گیشوار یو۔این۔او ءِ چیر دستی ءَ ”ریفرنڈم” اِنت۔ براھمدگ بگٹی

بام ھال(توار) بلوچ راجی رھشون ءُ راھدربر ءُ بی۔آر۔پی ءِ سروک واجہ براھمدگ بگٹی ءَ گُشتگ کہ بلوچ جیڑہ ءِ بنکی گیشوار ”ریفرنڈم” اِنت۔ بلے ریفرنڈم یو۔این۔او ءِ چیر دستی ءَ بہ بیت۔آئی ءَ درملکی ھالتاک ءَ انٹریو دیان ءَ گُشتگ کہ من درملک ءَ نشتگ ءُ بلوچ راجی وتواکی ءِ ھاترا کار کنگ ءَ اَنت۔۔اگاں دوبر پاکستان ءَ بروآں تہ پاکستان من ءَ شھید کنت۔ انچو کہ پاکستان ءَ اکبرخان ءُ بالاچ ءُ دگہ رھشون شھید کُتگ اَنت۔آئی ءَ گُشتگ کہ پاکی سرکار ءِ گُما گپ ءُ تران ھچ وڑا بیت نہ کنت۔۔بلوچ ءِ جیڑہ گوں پاکی سرکار ءِ گُما گپ ءُ تران ءَ گیشوار نہ بیت۔ بلوچ جیڑہ ءِ بنکی گیشوار ریفرنڈم اِنت کہ یو۔این۔او ءِ چیردستی ءَ جتائیں رنگے ءَ ھند ھند ءَ کنگ بہ بیت کہ باریں بلوچ پاکستان ءِ گما نندگ لوٹاں یا ناں، اگاں بلوچ راج پاکستان ءِ گما نندگ لوٹ ایت تہ ما ھم دزمانجن نہ بئیں۔ بلے بلوچ راج ءَ وتی فیصلہ ءَ وت کنگ ءِ حق دیگ بہ بیت۔ اگاں بلوچ راج پاکستان ءِ گما نندگ لوٹیت تہ من چہ آزاد بلوچستان ءِ گپ ءَ دست بردار باں، اگاں بلوچ راج آجوئی لوٹیت تہ عالمی برادری ءُ یو۔این۔او بلوچستان ءِ آجوئی ءِ جار ءَ بہ جن اَنت۔ براھمدگ بگٹی ءَ گُشتگ ماں بلوچستان ءَ پنجابی آنی کُشگ ”رد عمل” ئے۔۔ پاکی فوج ءَ ھما ورناہ ءُ زالبول کہ شھید کُتگ اَنت، اے ھمے رد عمل اِنت ءُ ھچ وڑا دارگ نہ بیت۔