لیاری ءَ وت گڑیں گِنگ وار ءِ نام ءِ سرا بلوچ چُک چینی ءِ عمل یکشلا برجاہ اِنت، راجدوست گل بے توار اَنت

بام ھال: مائی کلاچی ءِ ھنکین لیاری ءَ وت گڑیں گِنگ وار ءِ نام ءِ سرا بلوچ چُک چینی ءُ کُشت ءُ کوش ءِ کار یکشلا برجاہ اِنت۔۔مرچی سیمی روچ ءَ ھم لیاری ءِ بازیں دمگاں بازیں بلوچ ورناہ شھید کنگ بیتگ اَنت۔۔ ھندی ھالانی ردا بلوچ ءِ ھلاپ ءَ آپریشن ءَ سرکاری ڈنگ ارشد پپو گروپ ءُ ایم۔کیو۔ایم ءِ غُنڈہ ھم گوں پاکی پولیس ءَ ھمدست اَنت ءُ بلوچ چُک چینی مستریں کردار چودھری اسلم ھم آپریشن ءَ بھر زیرگ اِنت۔۔۔نوکیں ھالانی ردا لیاری ءِ سرجمیں ھند پاکی دُزیں پولیس، رینجر ءُ دگہ سلاہ بندیں سرکاری ڈنگاں چاگرد کُتگ اَنت ءُ بلوچ ءِ کُشت ءُ کوش برجاہ اِنت۔راہ ءُ در بند کنگ بیتگ اَنت، زھگ ءُ زالبول باز مشکلانی آماچ اَنت ءُ  میڈیا توک ءَ روگ ءَ مکن کنگ بیتگ ءُ اے گپ زانگ نہ بیت کہ شھید بیتگیں بلوچانی کَچ چِنکس ءَ سر بیتگ۔ دومی نیمگ ءَ بلوچ راجدوستیں گلانی نیمگ ءَ ماں لیاری ءَ بلوچ چُک چینی ءِ ھلاپ ءَ حاصیں رد عملی گندگ ءَ نیایگ اِنت۔۔۔