توتک وھیل ءِ کمیشن رپورٹ ءُ ڈی این اے ٹسٹ پاشک کنگ بہ بنت' نصراللہ بلوچ

  

شال : وائس فار بلوچ مسنگ پرسنز ءِ چیئرمین نصراللہ بلوچ ءَ توتک وھیل ءِ سر ءَ کمیشن رپورٹ ، ستا داتگ ءُ گْوشتگ کہ رپورٹر  یک کنڈے ءَ چگل دیگ مہ بیت بلکیں سرکار ءِ اے ذمہ واری بیت کہ آ چَہ خضدار توتک ءَ دزکپتگیں ژانگولیں لاشانی سر ءَ کمیشن ءِ رپورٹ ءَ دیم ءَ بہ یار اِیت ءُ کار ءِ کنوکانی بگیری ءَ ترندیں کارروائی بہ کنت ۔

نصراللہ بلوچ ءَ گْوشتگ کہ چَہ میڈیا ءَ سرپد بوتگ آں کہ خضدار توتک مژی ءَ دست کپتگیں ژانگولیں لاشانی درگت ءَ بلوچستان ھائی کورٹ ءِ جج ءِ سروکی ءَ کمیشن  رپورٹ سرجم کنگ بوتگ کہ جوانیں کارے بلئے چَہ ھالاں ھمے گمان بوگ ءَ اِنت کہ توتک وھیل ءِ پد ءَ جوڑ بوتگیں کمیشن رپورٹ شنگ کنگ نہ بوگ ءَ اِنت کہ نیکیں پالے نہ اِنت سرکار ءِ ذمہ واری اِنت کہ ایشی ءِ شنگ کنگ ءَ دیر مہ کنت نہ ایوک کمیشن رپورٹ ءَ شنگ بہ کنت بلکیں پہ ڈی این اے ءَ پنجاپ ءَ دیم دیگ بوتگیں ٹیسٹانی رپورٹاں ھم بہ گْوش اِیت  ، ایشاں ھم نی دو ماہ ءَ گیش اِنت کہ رپورٹ دینگت دیم ءَ آرگ نہ بوتگ ءُ اے رپورٹانی کمک ءَ میاربارانی بگیری ءَ راھبندی کارروائی کنگ بہ بیت داں بیگواھیں مردمانی کھولانی بے تاھیری ھلاس بہ بنت ۔

آئی ءَ گْوشتگ کہ بلوچستان ءَ پہ زور بیگواہ کنگ ءِ  کار یکشل ءَ برجاہ اَنت ءُ ایشانی تہ ءَ ھچ  رنگیں کمی نہ یتکگ ۔

آئی ءَ گْوشتگ پہ وتی دوستانی سلامتیں دَرائی ءَ ما ھمک دروازگ ٹک اِتگ  بلئے کس ءَ مئے ٹپ درمان نہ کُرتگ اَنت وتی دوستانی بیگواھی ءَ مارا اَجبیں ذھنی آزار ءِ تہ ءَ کُرتگ ءُ ما ھمروچ مِرگ ءُ زندگ بوگ ءَ اِنت بلئے انیگیں سرکار ءَ گوں ما ھچ رنگیں ھمبستگی یے نیست کہ چَہ کرسیانی واجہ بوگ ءَ پیش پہ مئے دوستاں مزنیں بٹاک اِش جتگ اَت ۔