کریمہ ءِ نوشتانک راستیانی تامور کنوک اِنت' ھیربیار ءِ پلہ مرزی ءَ درکپتگیں بی ایس او باسک

ھیربیار ءِ پلہ مرزی ءَ اُوشتوکیں چَہ بی ایس او درکُرتگیں باسکاں بی ایس او ءِ وائس چیئرپرسن  کریمہ بلوچ ءِ گْوستگیں روچاں شنگ بوتگیں نوشتانک راستیاں تامور کنوک من اِتگ ءُ گْوشتگ کہ بنجاھی اُگدہ دارانی چَہ گل ءَ کشگ ، راھبنداں نزانگ اِنت ۔آھاں اے ھم جار جتگ کہ آ پہ راستیانی دیم ءَ آرگ ءَ گل ءِ سئے ماھی تاکبند سگار ءَ شنگ کنگ اَنت ۔

آھاں وتی  تاکے ءِ کچیں دراجیں بیانءِ تہ ءَ گْوشتگ کہ بی ایس ا و آزاد ءِ باسک ءُ مھلوک پہ بی ایس او ءِ جیڑھانی سرپد بوگ ءَ آھانی نیمگ ءَ شنگ بوتگیں سگار ءَ بوان اَنت ۔ 

زانگ بہ بیت کہ گْوستگیں روچاں کریمہ بلوچ ءَ نوشتانکے شنگ کُرتگ ءُ آئی ءِ تہ ءَ سوشل میڈیا ءَ ھیربیار ءِ پلہ مرزانی نیمگ ءَ بی ایس او آزاد ءِ سر ءَ جتگیں بھتامانی پسو داتگ ۔

کریمہ ءَ گْوشتگ کہ بی ایس او آزاد ءِ تہ ءَ مزنیں جیڑہ نیست ءُ بی ایس او ءِ باسک جوانیں رنگے ءَ وتی گل ءِ راھبندانی سر ءَ کار کنگ ءَ اَنت ، آئی ءَ گْوشتگ کہ پیشیگیں بی ایس او چیئرمین بشیرزیب ءِ باریگ ءَ جاور انچوش بوتگ اَنت کہ آئی ءَ پارٹی دیوانانی تہ ءَ اَتک نہ کُرتگ ءُ پارٹی ءِ کار اُوشت ءِ آماچ بوتگ اَنت ، سیشن پہ وھد نہ بوتگ پمیشکا کلیں باسکانی ھم شَوری ءَ چارگزاری مجلس ٹھینگ بوتگ اَنت ءُ انی ھمے باسک کہ پارٹی راھبندانی پابندی نہ کنگ ءِ سبب ءَ چَہ بی ایس او ءَ درکنگ بوتگ اَنت ھم ھما سیشن ءَ  پارٹی اُگدہ دیگ بوتگ اَنت ءُ نی اے ھبر پہ راہ نہ اِنت کہ آ بی ایس او ءِ انیگیں اُگدھداراں بے راھبندی گچین بوتگیں گْوشگ ءَ اَنت ، کریمہ ءَ سوشل میڈیا ءِ تہ ءَ شنگ بوتگیں گپ ءُ ھبر بے سر بنیں ڈس اِتگ ءُ ایرجتگ اَنت ۔

ھیربیار ءِ پلہ مرزی ءَ اُوشتوکیں چَہ بی ایس او ءَ درکنگ بوتگیں باسکاں کریمہ ءُ دگہ اُگدہ دارانی کارپد آشوب ردکَن گْوشتگ اَنت ھمے پیم کریمہ ءَ ھم پہ آھاں ھمے گپ دْرشان کُرتگ ۔

زانگ بہ بیت کہ چَہ ھیربیار ءِ نیمگ ءَ چارٹر ءِ شنگ بوگ ءَ پد توامیں بلوچ راجدوستیں گلانی تہ ءَ پُرشت پُروش بوتگ ءُ چَہ آھاں لھتے مردم ھیربیار ءِ پلہ مرزی ءَ اُوشتاتگ وھدے کہ کلیں گلانی سروکاں ھیربیار ءِ چارٹر ءِ سر ءَ تپاک نہ کُرتگ ۔