پنجگور: جنین زھگانی اسکول بندی ءِ بگیری ءَ ائید ءَ پد زھرشانی کن اِیں' اسکولانی چارگزار

پنجگور :آل پنجگور پرائیوٹ اسکولز ایسوسی ایشن ءَ باند ءَ بیست ءُ شش جولائی ءَ دیوانے لوٹائینتگ ۔ پنجگور دمگ ءِ کلیں پرائیوٹ اسکولانی چارگزارگوں نودربرانی  مات پتاں شَور ءَ پد ھمے آسر ءَ رستگ اَنت کہ چَہ شدتیں سِلاھبندیں ٹکے ءِ نیمگ ءَ جنین زھگانی وانگ ءِ بندش ھچ رنگ ءَ اُوپار کنگ نہ بیت ءُ زھرشانی ءِ کلیں اُستمانی راھبند کارمرد کنگ بنت ۔

آھاں انیگیں سرکار ءِ سر ءَ ترندیں رنگے ءَ ایراد گران ءَ گْوشتگ کہ انیگیں بلوچستان ءِ سرکار '' تعلیمی ایمرجنسی '' ءِ نام ءِ سر ءَ مھلوک ءَ ریپینگ ءَ اِنت ، سلاھبندیں ٹکے ءِ سبب ءَ پنجگور ءِ لکھاں چکانی باندات زیان بوگ ءَ اِنت بلئے واکمندانی گوش ءَ مورے نہ وارت ۔

چَہ چکانی مسترانی نیمگ ءَ سوج کنگ بوتگ کہ چَہ ائید ءَ پد تْرند ءُ زورمندیں وڑے ءَ زھرشانی کنگ بیت ۔ باند ءَ لوٹگ بوتگیں دیوان ءِ تہ ءَ زھرشانی ءِ درگت ءَ شور ءُ سوج  گرگ بیت بلئے وانگجاھانی پچ کنگ یا کلیں اسکولانی تالہ بندی ءِ درگت ءَ چَہ زھرشانی ءَ پد شَوربندگ بیت۔