تپاکیں راج پہ بلوچ جنین آدمانی حق ءَ اسرمندیں کردگار بہ کنت' فرزانہ مجید

شال : انسانی حقانی جھگیر ءُ وائس فار بلوچ مسنگ پرسنز ءِ جنرل سیکریٹری فرزانہ مجید بلوچ ءَ شال ءُ مستونگ ءَ جنین آدمانی سر ءَ تیزاپ ریچگ ءِ کار اِیر جتگ ءُ  گوں تپاکیں راج ءَ ماں بلوچستان ءَ جنین آدمانی سر ءَ تیزاپ ریچگ ءُ آھاں پہ زور وانگجاھاں دور کنگ ءِ بگیری ءَ گوں اسرمندیں کردے ءَ گامگیج زورگ ءِ دزبندی کُرتگ ۔

آئی ءَ پہ روتاکاں شنگ کُرتیں وتی بیان ءِ تہ ءَ گْوشتگ کہ بلوچستان ءِ دو ارزشمندیں ھنکین شال ءُ مستونگ ءَ بیست ءُ چار ساھت ءِ تہ ءَ کسانسالیں جنیں زھگانی سر ءَ روچ ءُ رھمانی تیزاپ پرریچگ  جبر ءِ درور اِنت ۔ بلوچستان ءَ تْرام ءُ پیش ترتیبیں رنگے ءَ مذھبی  ترند روی ءِ نام ءَ جنین آدم نشانگ کنگ بوگ ءَ اَنت ۔

چَہ دوھزاردہ ءَ تیزاپ پرریچگ ءِ کار دیم ءَ پیداک اَنت ۔ اپریل دوھزار دہ ءَ کلات ءُ دالبندین ءَ جنین آدمانی سر ءَ تیزاپ پرریچگ ءِ یک پیمیں اُرش بوتگ ، دوھزار یازدہ ءَ سریاب ءَ اسکول ٹیچرے ءِ سر ءَ تیزاپ پرریچگ بوتگ ءُ دنیگت اے کارانی دارگ ءَ مادنیں گامگیج زورگ نہ بوتگ ۔ تیاکیں راج ءِ پجیگ ءَ ھچ رنگیں ادارہ ءَ اے انسانیت سوچیں کارپدانی دارگ ءَ جوانیں گامگیج نہ زرتگ اگاں اے کارانی دْرچ دارگ مہ بیت تہ بلوچستان ءَ انسانی حقانی جاور گیشتر نگیگ بنت ۔

فرزانہ مجید ءَ گْوشتگ کہ پنجگور ءَ جنین زھگانی وانگ ءِ سر ءَ بندش ھم ھمے کارانی دْرچ اِنت کہ آ اُود ءَ چَہ گْوستگیں سئے ماہ ءَ جنین زھگ پہ وانگ ءَ روت نہ کنگ ءَ اَنت  ۔ آئی ءَ گْوشتگ کہ مذھب ءِ نام ءَ جنین زھگاں چَہ وانگ ءَ دارگ ءُ آھانی سر ءَ گوں تیزاپ ءَ اُرش ، آھانی تْرسینگ ءُ لوگاں بندیگ کنگ ھچ مذھب ءُ راھبند ءَ روا نہ اِنت ۔ جنین زھگانی چاگردی حق برابری ءِ بنیاد ءَ  منگ بوتگ اَنت کہ آھاں ھچ مذھب ءُ راھبند پچ گیپت نہ کنت ۔ بلوچستان ءَ مذھب ءِ نام ءِ سر ءَ ناشرکاری ءِ تالانی ءَ مراد بلوچستان ءَ انسانی حقانی سر ءَ بندش جنگ اِنت ۔

آئی ءَ گْوشتگ کہ بلوچستان ءَ میان اُستمانی تک ءَ منگ بوتگیں ھچ رنگیں انسانی حقانی سر ءَ کاربندی نیست وھدے کہ جنینانی نشانگ کنگ ءَ بلوچستان ءَ انسانی حقانی نہ منگ ءِ تہ ءَ یک نوکیں بھرے گیش کُرتگ ۔

آئی ءَ لوٹ کُرتگ کہ تپاکیں راج وتی چارٹر ءِ سر ءَ کار بند بوان بلوچستان ءَ جنین آدمانی سر ءَ اُرشانی دارگ ءَ المی ءَ گامگیج  بہ زور اِیت ءُ جنین زھگانی وانگ ءِ بنیادی حق ءَ بہ سبزین اِیت ۔