شال : اشتاپ کن اِت راجی کنگراں : لانگو لھڑی جنگ بندی ءَ یک ماھے سر اَتکگ ءُ اڑ دنیگت نہ گیش اِتگ

شال : لانگو لھڑی تمنانی میان ءَ برجاھیں وت ما وتی جنگ ءُ چوپانی جنگ بندی مسام ءِ ھلاسی ءَ یک ماھے پشت کپتگ ۔ اے گوستگیں سال  ءَ تمنی راھشون خالد لانگو ءِ برات زیب لانگو ءِ کشگ ءَ پد بنا بوتگ ۔اے میان ءَ حاجی فیروز لھڑی ءِ سر ءَ ھم پہ کشگ ءَ اُرش بوتگ ءُ دوئیں بلوچ تمنانی وت ما وتی جنگ ءَ بے کساس مردمانی جان زوال بوتگ ۔سراج رئیسانی ءِ سروکی ءَ دوئیں تمنانی میان ءَ پہ اڑ ءِ گیشنگ ءَ جنگ بندی ءِ مسام ھم بوتگ دوئیں تمنانی سروک خالد لانگو ءُ فیروز لھڑی ءَ اے شورانی سر کاربند بوگ من اِتگ بلے سراج رئیسانی ءُ مولانا عبدالغفور لھڑی ءِ نیمگ ءَ بوتگیں شور ءُ گپانی سر ءَ گامگیج زورگ نہ  بوتگ چَہ ایشی ءَ دوئیں تمن پد ءَ یک دومی ءَ دیم بوتگ اَنت ءُ وتی براتانی ھون اِش ریتکگ ۔ سیاسی ءُ تمنی کماشاں پہ وت ما وتی کشت ءُ کشار ءَ سک بے تاھیری درشانتگ ءُ شھزادگ آغا موسی ، سردار محمد خان شاھوانی ، سردار کمال بنگزئی ءُ دگرانی کماشی ءَ یک دیوانے لوٹائینگ بوتگ ۔اے دیوان ءِ جھد سوبمند بوتگ اَنت ءُ دوئیں تمنانی میان ءَ جنگ بندی بوتگ پہ گردار کنگ ءَ میان ءَ اَتکگیں کماشاں دوئیں تمنانی کماش خالد لانگو ءُ حاجی فیروز لھڑی ءُ دگرانی بیان ھم گیپتگ اَنت داں بہ زان اَنت کہ میار کئیگ بوتگ بلے کراچی ءَ حاجی فیروز لھڑی ءِ چک ءِ کشگ ءَ پد اے جنگ بندی ءِ تہ ءَ دگہ ماھے گیش کنگ بوتگ .روتاک انتخاب ءِ رد ءَ دوئیں اڑوک داں سی ءُ یک اکتوبر ءَ یک دومی ءِ ھلاپ ءَ ھچ رنگیں کارروائی کنگ نہ کنگ ءِ پابند اَنت ۔ اے یک ماہ پہ بلوچ ءِ  دگہ ٹک ءُ تمناں سکیں بے تاھیری ماہ اِنت پمیشکا بلوچ لس ءَ  گوں وتی سیاسی ، تمنی کماش ءُ مذھبی عالماں  دزبندی کرتگ کہ آ دوئیں تمناں چَہ وت ما وتی بے سر ءُ بے نپیں جنگ ءَ دارگ ءَ زوت گامگیج بہ زور اَنت ءُ بلوچانی ھون ءَ چوش ارزان ریچگ ءَ مہ ھِل اَنت ۔