چک پہ ائید ءِ چیزانی زورگ ءَ بازار شتگ اِت اَنت کہ ناشناساں تیزاپ پرریتک اَنت' شیرگل

شال : گْوستگیں روچ ءَ مستونگ ءَ تیزاپ پرریچگ ءَ بوتگیں دو کسانسالیں جنکانی پت ءَ گْوشتگ کہ مئے گوں کس ءَ دژمنی نیست نہ زان آں کہ تیزاپ پرریچوک کئے اَنت ۔ چک گوں وتی مات ءَ بازار ءَ سودا زورگ ءَ شتگ  اِت اَنت کہ ناشناسیں مردماں ایشانی سر ءَ تیزاپ ریتکگ ۔ بولان میڈیکل کالج ءِ نادراھجاہ ءَ گل شیر ءَ گوں اھوالکاراں گپ جنان ءَ گْوشتگ کہ آئی ءِ دوئیں جنک سحرش ءُ مَھوش وتی  مات ءِ ھمراہ چاندنی دگ ءِ دکاناں پہ وت ائید ءِ چیزانی زیر گ ءَ شُتگ اِت اَنت کہ دو موٹر سائیکل سواراں  گوں سرنجاں  آھانی دیم ءِ سر ءَ تیزاپ پر ریتک چَہ ایشی ءَ پد ھردو نزیکیں ھسپتال ءَ برگ بوتگ اَنت ءُ آ اُود ءَ  درمان کنگ ءَ پد بولان میڈیکل کمپلیکس ءِ نادراھجاہ ءَ آرگ بوتگ اَنت ۔

چکانی ٹپاں درمان کنوکیں ڈاکٹر حیات ءَ گوں اھوالکاراں گْوشتگ کہ چَہ ھما وھد ءَ کہ دوئیں زھگ ھسپتال ءَ سر بوتگ اَنت آھانی ٹپ درمان کنگ بوگ ءَ اَنت چَہ ایشاں یکے ءِ دیم ءُ گردن ءِ دو بھر چَہ تیزاپ ءَ اسرمند بوتگ بلئے اے وھدی ھر دوئیں چُکانی زند ءَ ھچ ترس نیست ۔ اے وھدی گْوشگ نہ بیت  کہ چَہ تیزاپاں آھاں چینکس تاوان رستگ وھد گوزگ ءَ پد زانگ بیت کہ تاوان چینکس اِنت  ۔