ڈیرہ بگٹی ءَ سُرنگ چیرگیجگ ءُ آپانی تہ ءَ زھرمان کنگ بوگ ءَ اِنت'بی آر پی

شال : بلوچ ری پبلکن پارٹی ءِ بنجاھی ترامکاری مجلس ءِ جارکش شیر محمد بگٹی ءَ پہ آجوئی ءَ بلوچ راج ءِ یکجاھی ءُ تپاکی جاورانی مستریں لوٹ ڈس اِتگ ءُ گْوشتگ کہ چَہ ریاستی واکانی نیمگ ءَ دروگ بندگ بوگ ءَ اِنت داں بلوچانی تچکیں ھبر ءُ ھال مان بہ گیش اَنت۔ ھروھدے کہ پھلی ءِ شتلی کنگ بیت  میت دور دئیگ بنت ۔ بلوچ راج ریاستی واکانی  ڈھنڈوراں دلگوش مہ کن اَنت بلکیں یکجاھی ءُ تپاکی پیش داران گوں آجوئی لوٹوکیں واکاں ھوار بہ بیت داں بلوچستان ءِ شھیدانی مِشن آسر ءَ بہ رس اِیت ۔ آئی ءَ گْوشتگ کہ بلوچستان ءِ شھیداں وتی جان نْدر کرتگ ءُ ڈس اِتگ کہ زورگری ءَ نہ من اِیں ما ھماھانی راہ ءُ لیکو ءِ سر ءَ جُنزان بئے اِیں بلے ریاستی واک بلوچ آجوئِی ءِ جھد ءِ دارگ ءَ کپتگیں کارکنگ ءَ اَنت ۔ بلوچ پسگاں نہ ایوک آوار جنگ ءَ اَنت بلکیں وتی شکنجہ جاھانی تہ ءَ آھاں چَہ انسانیت ءَ دریں شکنجہ دئیگ ، کُشگ ءُ دیمانی شِرگ ءَ پد چگل دئیگ ءَ اَنت ۔ ڈیرہ بگٹی ءُ سوئی ءَ ریاستی لشکر ءَ بے میاریں بلوچانی ترسینگ ، بارودی سُرنگ چیر گیجگ ءُ ھوٹگانی آپاں زھر مان کنگ ءِ کار بنا کرتگ  ءُ ھما ریاستی واک کہ بلوچستان ءَ کاینت پھلی لوٹ اَنت راستی ءَ  دنیا ءَ گمراہ کنگ لوٹ اَنت ھروھدے پھلی لوٹگ بیت میتانی ٹیکی رس اِیت نوں بلوچ دژمن ریاست ءِ گناہ چَہ پھلی ءَ گْوستگ اَنت ۔ آئی ءَ جئے سندھ ءِ راھشون مظفر بھٹو ءِ چِل ءَ آئی ءَ سھرسلام پیش کنان گْوشتگ کہ مظفر بھٹو ءَ پہ ھما مزنیں مول ءَ وتی جان نْدر کرتگ سندھی ورنا آئی ءِ ھیال ءُ لیکواں پہ وتا راھشون جوڑ بہ کن اَنت ءُ پہ دژمن ءِ ایرموشی ءَ جھد ءَ دیم ءَ بہ بر اَنت ۔ آئی ءَ گْوشتگ کہ زورگریں ریاست ءَ بلوچ ری پبلکن اسٹوڈنتس آرگنائزیشن ءِ راھشون عاطف یوسف ءِ برات آصف یوسف گْوستگیں سال ءَ آوار جنگ ءَ پد شھید کرتگ بلوچی سال ءِ ھساب ءَ آئی ءِ سال اِنت ۔ ما شھید آصف یوسف ءِ دیمونیاں سلام پیش کن اِیں ءُ سرپد بئے اِیں کہ شھید آصف یوسف ءَ دگہ بلوچ پسگانی رنگ ءَ پہ ماتیں گلزمین ءِ ننگ ءِ پھریزگ ءَ وتی جان نْدر کرتگ آئی ءِ دیمونی زوال نہ بیت ءُ شھیدانی واباں پیلوکنگ ءَ پد تاھیر بئے اِیں ۔