بی ایس او ءِ کارپد آجوئی جھد ءِ وشیں باندات ءِ مانزمان بیت ' بی این ایم

شال : بلوچ نیشنل موومنٹ ءِ جارکش ءَ گْوشتگ کہ بلوچ اسٹوڈنس آرگنائزیشن ءِ نترس ءُ لیکوی نودربراں نہ گیگیں جاوراں راجمان دیوان برجم داشتگ چَہ وتی اے کار ءَ آ داد دئیگ کرز اَنت ۔ بی ایس او ءِ کارپد پہ بلوچ آجوئی ءِ جھد ءَ وشیں باندات ءِ مانزمان بیت ۔ بی این ایم  نوک گچین بوتگیں کابینہ ءُ بنجاھی مجلس ءَ مراد بات دنت ءُ اُوست بند اِیت کہ بلوچ نودربر پہ وتی ماتیں گلزمین ءِ آجوئی ءَ ھرچ وڑیں زانشتی ، سیاسی ءُ گلکاری بودشت ءَ سربار نوکیں کتہ کاری ءَ گوں جھد کنان بنت ءُ گوں بستگیں ھبرانی سر ءَ گامگیج زوگ ءَ منزل ءَ نزیکتر ءَ کار اَنت ۔ نوزدہ سد ءُ شست ءُ ھپت ءَ گر داں انوں بی ایس او ءَ نودربراں سیاسی ءُ زانشتی سنچ داتگ ، نود دربراں  دیمونی ءِ جوزگ ءُ اشتراک پسندی ءِ نوکیں مارشت داتگ ، ساچشتی بود ءِ لچہ کار ، ندکار ، چاگردی ءُ سیاسی سروک ءُ ڈاکٹر اللہ نذر رنگیں زانشتی ءُ گامجنیں سرمچار بی ایس او آزاد ءِ گْران بھائیں داد اَنت کہ آئی ءَ بی ایس او متحدہ جوڑ کنگ ءَ پد نودربراں تچکیں راہ ءِ شون داتگ ۔ بی ایس  او آزاد ءِ پجیگ ءَ دگہ آزاد پسندیں گل بی آر ایس او ، بی آر پی ءُ بی این ایم ءِ پجیگ ءَ سرجمیں راج زورگریں ریاست ءِ  ظلم ، لگتمالی ءُ جبر ءِ آماچ اِنت  ۔ گل ءِ سیاسی کارکنانی ھمدستی ءُ ھمکاری ءَ راج زْرمبش تیز تر کرتگ جارکش ءَ دیمتر ءَ گْوشتگ کہ بلوچستان ءِ تیادپی شھر پسنی ءَ نلینٹ ءِ نزیک ءَ ایف سی ءَ پولیس ءُ لیوز ءِ کمک ءَ پٹ ءُ لوٹ کرتگ ءُ اے میان ءَ بازیں مردم آوار جتگ ۔ اے ریاستی زوراکی ءِ دْرچ اِنت آ گوں وتی ھمے رنگیں کارپداں بلوچ راج ءَ بیم دئیگ ءِ بے مرادیں جھد کنگ ءَ اِنت۔