پہ گچینکاری ءَ فوجی کارروائی ءِ بندبست بوگ ءَ اِنت' بی این ایف

بلوچ نیشنل فرنٹ ءِ جارکش ءَ گْوشتگ کہ پہ گچینکاری ءِ راہ ءِ بُرگ ءَ زورگیپتگیں بلوچستان ءَ مزنیں کچے ءَ فوجی کارروائی ءِ بندبست بوگ ءَ اِنت ۔ پاکستانی ریاست ءِ کُلیں ادارہ گوں آمیدگس ءُ پارلیمان ءَ ھوار بلوچ راج زْرمبش ءِ راہ ءِ بند کنگ ءِ جھد ءَ اَنت ۔ پاکستانی آمیدگس پہ بلوچ راج ءُ میان اُستمان ءِ گمراہ کنگ ءَ بلوچ دزگیرانی دَراھی ءِ دروگیں ھال شنگ کنگ ءَ اِنت داں دنیا ءَ اے ڈسگ بہ بیت کہ پاکستانی آمیدگس بلوچ مھلوک ءِ دادرسی ءِ جھد ءَ اِنت بلے دومی نیمگ ءَ پاکستانی کاسگ چٹیں بلوچستان ءِ مزن وزیر اسلم رَئیسانی ءُ آئی ءِ کابینہ پہ بلوچ آجوئی لوٹوکانی ایرموشی ءَ فوجی کارروائی کنگ ءِ بندبست کنگ ءَ اَنت ءُ دنیا ءَ پیشدارگ بوگ ءَ اِنت کہ کارروائی پہ دُز ، ڈنگ ءُ آوار جنانی دزگیری ءُ سرءِ گرگ بوگ ءَ اِنت بلے بلوچ راج ءَ جھان سرپد کرتگ کہ بلوچستان ءَ  دُزی ، ڈنگی ءُ آوار جنی  ءَ آئی ءِ وتی برات سراج رئیسانی ، ثناء اللہ زھری ، اسرار زھری ، شفیق مینگل ءِ پجیگ ءَ آئی ءِ کابینہ ءِ دگہ مردم ھوار اَنت ۔ بلے ھما فوجی کارروائی ءِ ھبر ءَ کاسگ چٹیں مزن وزیر کنگ ءَ اِنت آ نیشنل پارٹی ، بی این پی عوامی ءُ بی این پی مینگل ءِ گْوشگ ءِ پد ءَ بوگ ءَ اِنت پرچا کہ نام گیپتگیں پارٹی بلوچ آجوئی لوٹوکاں پہ وتی گچینکاری ءِ راہ ءَ میلانک سرپد بنت بلے نامے پارلیمانی پارٹیانی گچین کاری ءِ واب بِھ پیلو نہ بیت ۔ جارکش ءَ دیمتر ءَ گْوشتگ کہ مروچی گْورے بلوچ پسگاں پاکستانی ریاستی ادارہ آوار جنگ ءُ آھانی دیم شریتگیں میتاں گیاباں چگل دیگ ءَ اَنت ءُ دومی نیمگ ءَ نیشنل پارٹی ، بی این پی مینگل رنگیں پارٹیانی پھریزگ ءِ ذمہ واری ھم ھمے پاکستانی ریاستی ادارھاں گون اِنت کہ ھمے پارٹی ءُ پاکستانی ریاست ءِ ھمبستگی ءُ ھمکاریاں گْواچن کنت ۔ ما گوں بلوچ مھلوک ءَ دزبندی کن اِیں کہ آ پاکستانی کاسگ چٹیں پارٹی [ نیشنل پارٹی ، بی این پی مینگل ، بی این پی عوامی ] ءَ  گوں ترندیں رنگے ءَ پیش بئے اِت ءُ وتا چَہ ایشانی پندلاں دُور داران گوں راج زُرمبش ءَ ھمبستگی ءِ درور بہ بیت ۔