پی۔کے۔کے ءِ جنگولاں شام ءِ شمالی دمگاں بُنجل جوڑ کُتگ۔ رجب طیب ایردوآن

بام: ترکی ءِ مزن وزیر رجب طیب ایردوآن ءَ شام ءِ سرا بھتام جتگ ءُ گُشتگ کہ پی۔کے۔کے ءِ کُرد جنگولاں ماں شام ءِ شمالی ھند ءُ دمگاں پناہ زرتگ۔ رجب طیب ایردوآن ءَ بیھار دیان ءَ گوشتگ کہ اگاں شام اے درگت ءَ گامگیج مہ زوریت تہ ترکی ھر وڑیں گامگیج ءِ زورگ ءَ چک ءُ پد نہ بیت۔ رجب طیب ایردوآن ءَ ٹی وی ءَ تران کنان ءَ گُشتگ، شام ءِ شمالی ھند ءُ دمگانی پنچ استانانی سرا ”کردستان ورکرز پارٹی” (PKK) ءَ قبضہ کتگ ءُ ایشاں بشار سرکار ءِ پلہ مرزی گون اِنت۔

رجب طیب ایردوآن ءَ گُشتگ اگاں ترک فوج ءِ سرا کجام وڑیں ارشے بہ بیت تہ ماں شام ءِ سیمسرانی تھا ھم جوابی ارش ءَ چک ءُ پد نہ بئیں۔ انچو کہ عراق ءَ ما جوابی ارش کُتگ۔ آئی ءَ گوشتگ ما وتی نگھپانی ءِ ھاترا اے وڑ کُت کنیں۔

دومی نیمگ ءَ شامی سرکار ءِ ھلاپ ءَ مِڑوکیں یاگی کمانڈر عبید موسیٰ ءَ ناشناسیں ھندی ءَ رجب طیب ایردوآن ءِ گپانی پژگرد ءَ بیان دیان ءَ گُشتگ اگاں ترک سرکار شامی فوج ءِ ھلاپ ءَ مئے کمک ءَ بہ کنت تہ ما ”کردستان ورکرز پارٹی” ءِ جنگولاں چہ شام ءِ ھند ءُ دمگاں در کنیں۔ آئی ءَ گُشتگ ما ”کردستان ورکرز پارٹی” ءِ سرجمیں بنجلاں زانیں کہ کجا اَنت، ما آھاں نشانگ جوڑ کُت کنیں، البت مارا چہ ترکی ءَ کمک درکار اِنت۔

”کردستان ورکرز پارٹی” ءَ نوزدہ صد ءُ ھشتاد ءِ دھک ءَ ترکی ءِ ھلاپ ءَ وتی راجی آجوئی ءِ جنگ بندات کتگ ءُ گوستگیں سال ءَ ترک فوج ءَ عراقی سیمسرانی تھا ”کردستان ورکرز پارٹی” جنگولانی ھلاپ ءَ آپریشن کُتگ کہ چر ایشی ءَ بازیں کُرد شھید بیتگ اَنت۔

نوزدہ صد ءُ ھشتاد چار ءَ بگر تاں انوں کُرد جنگول ءُ ترک زالمیں لشکر ءِ میان ءَ بازیں جنگ ءُ چوپاں چِل ءُ پنچ ھزار مردم بیران بیتگ، وھدیکہ امریکہ، برطانیہ ، یورپ ءُ دگہ سامراجی دُزّاں ”کردستان ورکرز پارٹی” یک ناشرکار گلے نامدات کُتگ۔