بی ایل اے زانشتی ءُ آشوبی بنیاد ءَ پہ آجوئی ءَ جھد ءَ اِنت ' بی این ایم

شال : بلوچ نیشنل موومنٹ ءِ جارکش ءَ گْوشتگ کہ ڈنگ تب ءُ پہ ڈنگاں گھتریں جاورساچیں رحمان ملک ءِ بی ایل اے ءِ درگت ءَ بدیں ھبر جی ایچ کیو ءِ ربالی اِنت ۔ رحمان ملک ، جی ایچ کیو ، آئی ایس آئی ءُ آرمی ءَ اگاں دلے ھست گڑا اھوالکاراں پہ بلوچستان ءِ سواد ءَ آزادی بہ دئے اَنت ۔ بی ایل اے ، بی ایل ایف ءُ بی آر اے ءِ درگت ءَ ھال شنگ کنگ ، بلوچستان ءِ جاور ءُ سرمچارانی اُرشانی چاپ ءُ شنگ کنگ ءِ اجازت بہ دنت ءُ بہ چار اِیت کہ راستی چون مھلوک ءَ زوت اسرمند کنت ۔ بلوچ سرمچار پاکستان ءِ مزواریں سپاھیگانی پیچ ءَ چَہ سنچ ءُ لیکو ءَ زِبھر نہ اَنت بلکیں سنچدار ، ایماندار ، لیکوی ءُ گلزمین دوستی ءَ سربار پہ راج آجوئی ءَ سردستانی دل ءَ کرتگ اِش جھد ءَ اَنت ۔

آئی ءَ گْوشتگ کہ اگاں بی ایل اے یک راجی آشوبی گلے مہ بوت اِنت گڑا پاکستانی ھاکماں اھوالکار پہ آھانی ھالانی شنگ ءَ کنگ ءَ سکین داتگ اِت اَنت ، رد دیوکیں روتاکی بیان ءَ گوں اسپیت سیاہ کنگ نہ بیت ۔ بی ایل اے ءِ ھیالاںی پیش کنگ ءَ ، جی ایچ کیو ءَ الکیڑانک ءُ پرنٹ میڈیا ءِ سر ءَ بندش جتگ ۔ بلوچ لبریشن آرمی بلوچ سرمچارانی نامی ئیں گل اِنت کہ زانشتی ءُ آشوبی بنیاد ءَ پہ آجوئی ءَ جھد ءَ اِنت ۔ آئی ءِ گوں ملائیت ءُ ڈنگیت ءَ ھوار ترینگ راستی ءِ کوش ءِ نامرادیں جھد اِنت ۔

بلوچستان ءَ مُلّی [ ھمروچ ] درزن ءِ ھساب ءَ ایف سی ، آرمی ءُ چیریں ادارھانی کارمند سرمچارانی دست ءَ کشگ بیت کہ آھاں ھاکم گوں مزنیں بے شرمی ءَ بر اَنت ءُ بے تواری ءَ کل کن اَنت ءُ آھانی لوگ ءِ مردماں ھم سرپدی نہ دئے اَنت کہ آھانی مزواریں سپاھیگ کجا مرتگ اَنت ۔ بی بی سی ءُ وائس آف امریکہ ءِ درگت ءَ اے ھبر پہ بلوچ راج ءَ اجکھی اِنت کہ آ پاکستانی فوجیانی کوش ءَ انچوش چیر دئیگ ءَ اَنت کہ گْوش ئے برٹش ءُ امریکہ ءِ فوجی مرگ ءَ اَنت ۔