پہ زرباری کردستان ءِ آزادی ءِ پچ گرگ ءَ سوریای یاگیاں ھم لانک بستگ
Thursday, July 26, 2012
فری سیریا آرمی ءِ یاگی ئیں کرد کمانڈر عبید موسے ءَ چَہ ترکی ءَ لوٹ کرتگ کہ اگاں ترکی یاگیاں گوں بشار لشکر ءَ مڑگ ءَ سلاہ بہ دنت یاگی گوں پی کے کے ءَ ھم جنگ دئے اَنت ۔ زانگ بہ بیت پی کے کے یا پارتی کارکھران کوردستان کہ کرد ورکز پارٹی ءِ نام ءَ زانگ بیت کرد سرمچارانی یک نامی ئیں گلے۔ سوریہ [ شام ] ءَ بشار لشکر ءِ ایرجنگ ءَ بنا بوتگیں تھی جنگ ءَ سوب زوران کرداں سوریہ ءِ ایردست کرتگیں زرباری کردستان ءِ بازیں شھر آزاد کرتگ ءُ وتی دست ءَ آورتگ ۔
فری سیریا آرمی ءِ کرد کمانڈر عبید موسے ءَ گوں اے ایف پی نامیں ھالرسان ءَ گپ جنان گْوشتگ '' اُوست اِنت مارا چَہ ترکی سلاہ ءِ رس اِیت '' ھمے کمانڈر ءَ اے ھبر سوریہ ءِ دومی مستریں شھر الیپو ءَ یک ھون ریچیں جنگے ءِ میان ءَ اَتکگیں اُوشتے ءِ تہ ءَ گْوشتگ ، عبید چل ءُ پنچ یاگیانی کمانڈر اِنت ۔
آئی ءَ گْوشتگ کہ اگاں مارا چَہ ترکی ءَ کمک بہ رس اِیت پہ بدل ءَ پی کے کے ءِ سر ءَ اُرش کن اِیں ، اگاں ما کرد ءُ عرباں وتی بن مھکم کرت ءُ اے کچ ءَ رست اِیں کہ چَہ ترکی ءَ سلاھانی کمک زرت بہ کن اِیں ما ایوک گوں رژیم ءَ جنگ نہ دئے اِیں بلکیں گوں پارتی کارکھران کوردستان ءَ ھم مِڑ اِیں ۔
'' چَہ ترکی ءَ رستگیں سلاھانی کمک ءَ ما سوریہ ءَ پی کے کے ءِ بنجلانی سر ءَ اُرش کن اِیں پرچا کہ ما جْوانی ءَ زان اِیں کہ آ کجا اَنت ءُ کجام دمگ آھاں دستیگ کرتگ اَنت ۔''
ھمے درگت ءَ ترکی ءِ مزن وزیر طیب اُردگان ءَ ھم بے تاھیری دْرشانتگ ءُ چَہ سوریہ سرکار لوٹ کرتگ کہ آ پی کے کے ءِ بنجلاںی سر ءَ اُرش بہ کنت ءُ بیھار داتگ اگاں سوریہ سرکار اُرش مہ کنت اے کار ءَ ترکی وت کنت ۔
سوریہ ءِ تہ ءَ جنگی جاورانی چست بوگ ءَ پد کرداں گوں یاگیاں ھمبستگی دْرشانتگ ءُ چَہ آھاں ھمے اُوست کرتگ کہ چَہ بشار سرکار ءِ ھلاسی ءَ پد نوکیں سرکار گوں زرباری کوردستان ءِ مردماں جْوانیں رنگے ءَ پیش کئیت ءُ آھانی وتواکی ءَ من اِیت بلے چَہ فری سیریا آرمی ءِ کمانڈرے ءِ نیمگ ءَ اے بیانے شنگ بوگ ءَ پد پہ زرباری کرردستان ءِ آجوئی ءَ نوکیں ترسے رُستگ ۔
Comments[ 0 ]
Post a Comment