کابل : دروگ اِنت کہ گوں اوگان سرکار ءَ پہ ایمنی ءَ گپ ءُ تْران کنگ لوٹ اِیں ' طالبان

کابل : اوگانستان ءِ طالباناں گوں اوگان سرکار ءَ پہ ایمنی ءِ برجاہ دارگ ءَ گپ ءُ تْرانانی ھال دروگ گْوشتگ ءُ اے رنگیں  ھمک گمان رَد کرتگ ۔ بی بی سی ءِ اھوالکار ءِ رِد ءَ اے ھبر طالباناں اوگانستان ءِ صدر ءِ بیان ءَ پد کرتگ اَنت ۔ زانگ بہ بیت اوگانستان ءِ صدر حامد کرزئی ءَ جاپان ءِ شھر کیوٹو ءَ گْوشتگ کہ طالبان پہ اوگانستان ءِ ایمنی ءِ برجم دارگ ءَ گوں آئی ءِ سرکار ءَ گپ ءُ تْران ءَ ساڑی اَنت ۔ کیوٹو ءَ اوگانستان ءِ نوک جوڑ کنگ ءِ درگت ءَ بوتگیں جھانی کانفرنس ءَ ھپتگے پیش کیوٹو ءَ بوتگیں دیوانے ءِ تہ ءَ طالبان ، حزب اسلامی ءُ اوگان سرکار ءِ جھگیراں بھر زرتگ چَہ ایشی ءَ پد ھال شنگ اِتگ کہ طالبان گوں اوگان سرکار ءَ گپ ءُ ھبر ءَ ساڑی بوتگ اَنت ۔ صدر کرزئی ءِ اے ھبر ءِ راستی طالبان راھشون ءُ جیش المسلمین ءِ سروک اکبر آغا ءَ  اوگان ٹیلی وژن ' طلوع نیوز ' ءَ گوں گلگدار ءَ من اِتگ کہ طالبان ءِ روش ءِ تہ ءَ نرمی پیداک بوتگ ۔ طالبان ءَ کیوٹو دیوان ءِ تہ ءَ وتی جھگیرانی بھر زورگ ءِ ھال راست من اِتگ بلے اے ھبر رَد کرتگ کہ آھاں کمیشن ءِ تہ ءَ بھر زرتگ یا گوں اوگان سرکار ءَ گپ ءُ تْران کنگ لوٹ اَنت ۔ طالبان ءِ مدام ھمے گْوشگ بوتگ کہ اوگانستان ءَ دوادار کرزئی سرکار نہ اِنت بلکیں طالبان ءُ امریکہ اَنت ۔