رودرتکی بلوچستان : گوادر ، نصیرآباد ءُ جعفر آباد ءَ مھلوک پہ تْرمپے آپ ءَ ھیران اِنت

شال :  بلوچستان ءِ تیاب دپی ھند ءُ دمگ  گوادر ، پسنی ، اُورماڑہ ، جیمڑی ءُ  ھمدپیں کوچگاں  آپ ءِ تنگی ءُ نیستی ءَ مھلوک پریشان کرتگ اَنت ۔ چَہ آپ ءِ نیستی ءِ سبب ءَ ٹینکراں آپ ءِ نھاد سک برز برتگ یک آپی ٹینکرے داں پانزدہ ءَ گر داں بیست ھزار روپیہ ءَ رس اِتگ ھمے پیم جعفرآباد ءُ نصیرآباد ءَ ھم ورگی آپ ءِ ڈکال اِنت ۔ ھالانی رِد ءَ پٹ فیڈر کینال ءَ آپ ءِ کمی ءِ سبب ءَ جعفر آباد ءُ نصیر آباد ءَ مردم پہ ورگی آپ ءَ سک پریشان اَنت ۔ واٹر سپلائی ءِ ھوٹگاں داشتگیں آپ ھم کم کم ءَ ھلاس بیان اَنت ۔ پبلک ہیلتھ چار روچ  ءِ سر ءَ ایوک یک کلاکے مردماں آپ رسینگ ءَ اِنت داں مردمانی ساہ مہ سد اِیت ءُ بس ۔ بلوچستان ءَ روچ پہ روچ گیش بیوکیں آپ ءِ تنگی اگاں ھمے رنگ ءَ برجاہ مان اِنت ترس اِنت  مکوران ءُ نصیر آباد ءِ دمگاں مزنیں انسانی تاوانی کئیت ۔