تھران : گیس پائپ لائن لین دیگ ءِ کارتیزکنگ بنت ' گیلانی رحیمی گند ءُ نند ءَ بوتگیں شور

تھران [ ھالچار ] پاکستانی سر وزیر یوسف رضا گیلانی ءَ گوں ایران ءِ اول کمک کماش محمد رضا رحیمی ءَ دیوان ءِ تہ ءَ تپاک کرتگ کہ یک ھزار میگا واٹ لین ءُ گیس پائپ لائن ءِ شوربندیانی سر ءَ بیوکیں کارانی تہ ءَ تیزی آرگ بیت ۔ آھاں اے ھبر یک رندے پد ءَ جتگ کہ ھردو سرکار ءَ ابید دوئیں ملکانی مھلوک ءِ نیام ءَھم نزیکی ودی کنگ بیت۔ ایرانی واکدار ءَ گوشتگ کہ آ بندر عباس ءَ پاکسنای سفارتجاہ ءُ تھران ءَ ربیدگی بنجاہ پچ کنگ ءِ وتی شور ءَ زوت پاکستان ءَ گوش اَنت ۔ رسانکدراں شنگ بوتگیں ھالانی رِد ءَ اے ھبر دوئیں ملکانی نام گیپتگیں واکدار گوں یک دومی  ءَ دیم پہ دیمی دیوان ءَ کرتگ اَنت ۔ یک برے ھر دو ءَ ابید چَہ دگرانی کمک ءَ وت ما وت ءَ گپ جتگ رند ءَ  دگہ واکداراں ھم دیوان ءَ بھر زرتگ ۔ دوئیں واکداراں پاک ایران ءِ سیادی ءِ انوگیں جاوراں ابید بازیں تک ءَ گچینی معشیت ، رسل ءُ رسائل ، تجارت ، توانائی ءُ بنچکی آسراتیانی دیمروی دیگ ءِ سر ءَ ھمکاری ءِ گیش کنگ ءِ سر ءَ گپ جتگ ۔ آھاں اوگانستان ءِ جاورانی سر ءَ ھم گیشتر دلگوش داتگ ءُ گوشتگ کہ اوگانستاں ءَ تاھیر پہ دمگ ءَ سوت مند اِنت ۔دیوان ءِ تہ ءَ ملتان ءُ گیلان براتیں شھر منگ بوتگ اَنت ۔ایران ءِ واکدار ءَ پہ دمگ ءِ تاھیر ءُ ایمنی ءَ پاکستان ءِ کارپد ساڑاتگ اَنت ءُ گوشتگ کہ ایران وتی تجارتی لوٹانی پیلو کنگ ءَ چَہ پاکستان ءَ درآمد کنگ ءَ چَہ دگراں گیشتر دوست کنت ۔گیلانی ءَ گوں احمد نژاد ءَ ھم دیوان کرتگ ۔اے درگت ءَ نژاد ءَ گوشتگ کہ اگاں دوئیں ملک پہ دمگ ءِ ایمنی ءُ تاھیر ءَ ھمدست بہ بنت گڑا پہ دری واکاں دزمانجی کنگ المی نہ بیت ۔