ماشکیل : عبدالرشید ' ریکی ٹک ءِ سردار گچین

خاران : سردار عبدالرشید ریکی ٹک ءِ سردار گچین کنگ بوتگ ۔ ماشکیل ءَ بوتگیں دستار بندی ءِ مراگش ءِ تہ ءَ پاکستان چیردستیں  اُستان وزیر امان اللہ نوتیزئی ءِ پجیگ ءَ چَہ ایران ، اوگانستان ءُ پاکستان ءَ جاہ منندیں ریکی ٹک ءِ مردماں ابید دگہ ٹکانی کماشاں ھم بھر زرتگ ۔نوک سردار جوڑ بوتگیں سردار عبدالرشید ریکی ءَ گوشتگ کہ ریکی ٹک  ءِ ھزارھاں مردماں منی سر ءَ باور کرتگ ءُ من ءَ شرپدار کرتگ ۔وتی کماشی ءِ پاگ منی سر ءَ بستگ ءُ من ءَ مزنیں ذمہ واری یے لڈ اِتگ من جھد کن آں کہ پہ ریکی ٹک ءِ وژھالی ءَ ھرچ رنگیں گامگیج بہ زور آں ءُ گوں دگہ ٹکاں براتی پیم بہ کن آں ۔ اے مراگش ءَ پاکستان چیردستیں بلوچستان سرکار ءِ اُستان وزیر امان اللہ نوتیزئی ءَ ھم تران کرتگ ءُ سرداری ءُ ٹکی بندبست ساڑاتگ ءُ گوشتگ کہ ایشی ءِ تہ ءَ سک باز شری ھست ۔ زانگ بہ بیت بلوچستان ءَ ٹکی بندبست کہ چَہ بن ءَ انسانی دودمان ءِ ردوم [ تھذیبی ارتقا] ءِ یک پرارزشیں دور ءُ نوبتے زانگ بیت بلے بلوچستان ءَ چَہ انگریز سرکار ءَ پد پاکستانی زور سرکار ءِ دزمانجنی ءِ سبب ءَ بلوچ مھلوک ءِ اے بندبست ءِ سر ءَ باور ءُ ستک روچ پہ روچ کم بیان اِنت ءُ اے بندبست ءِ داروک ءُ پلہ مرز ایوک سرکار ءُ کاسگ چٹ پشت کپان اَنت کہ آ ایشی ءَ پہ وت ءَ سوتمند سرپد بنت ۔ بلوچستان ءَ پاکستانی سرکار ءُ آئی ءِ وتی من ءَ دانشورانی دو تل ءُ دوپوستی ھمد ءَ زانگ بیت کہ ھما مردم کہ آئی ءِ دیم ءَ میلانک بنت ءُ آھاں بلوچ مڈیانی لٹ پل ءَ نہ ھل اَنت  آھانی سرداری بند بست ءَ جاھیلت گوش اَنت ءُ ایرجن اَنت ۔ دومی نیمگ ءَ ھرکس گندگ ءَ اِنت کہ گیشتروتگڑیں سردار ، تمندار گوں سرکار ءَ ھمدست اَنت ۔