ھلمند جنگ ، سد طالبان ، سی ءُ پنچ لس مردم ءُ بیست ءُ یک اوگان سپاھیگ مُرت

ھلمند : طالبان ءُ اوگان سرکاری سپاہ  ءِ میان ءَ گْوستگیں پنچ روچ ءِ جنگ ءَ سد طالبان ، سی ءُ پنچ لس مردم ءُ بیست ءُ یک سپاھیگ مُرتگ ۔

دمگ ءِ کماشانی رِد ءَ چَہ اے جنگ ءَ دوھزار کھول پہ وتی لوگانی یلو کنگ لاچار بوتگ ۔

تھی کارانی اوگان کارگس ءِ جارچین صدیق صادق ءَ گْوشتگ کہ چَہ طالبانانی نیمگ ءَ مزنیں اُرشے اَت ۔ پہ کمک ءَ دگہ اُردو دیم دیگ بوگ ءَ اِنت ءُ چَہ سرکاری سپاہ ءِ دست ءَ ھچ دمگ در نہ کپتگ ۔

ھَندی سرکاری واکدارانی رِد ءَ اے جنگ ءَ چَہ ھزار ءَ گیش طالباناں بھرت زرتگ کہ چَہ مزنیں سلاھاں سربار اِت اَنت ءُ ترام ءُ ترتیبیں رنگے ءَ اُرش اِش کُرتگ ۔

ھلمند ءَ یک ھَندی سرکاری کارمندے ءَ گوں بی بی سی ءَ گْوشتگ کہ فوجی پازگاھے  ءِ سر ءَ پولیس ءَ گوں طالباناں جوانیں رنگے ءَ جنگ کُرت بلئے آھاں کمک نہ رست ءُ پازگاہ ءِ طالباناں دستیگ کُرت ۔

سنگین ءَ بنداتیں جنگ دگہ نزیکیں دمگ کجکی ، موسی کلا ءُ نوزاد ءَ تالان بوتگ ۔

ٹکی سردار حاجی اخترمحمد ءَ گّوشتگ کہ اگاں سرکار پہ طالبانانی دیمپانی ءَ ھچ کُرت نہ کنت گڑا مھلوک ءَ سلاہ بہ دنت داں وت ءَ چَہ طالبانانی اُرش ءَ بے پھریز اَنت ۔