شال : سرکار بیگواھی ءِ میان ءَ کشگ بوتگیں مردمانی لڑءُ سرجمیں ھال ءَ پیش بہ کنت ' پاکستانی سپریم کورٹ

 شال :پاکستانی سپریم کورٹ ءَ کاسگ چٹیں بلوچستان سرکار پرمان کرتگ کہ  چَہ بلوچستان ءَ بیگواھی ءِ میان ءَکشگ بوتگیں مردمانی لڑ ءُ سرجمیں ھالاں آمیدگس ءِ دیم ءَ پیش بہ کنت ۔ آمیدگس ءَ ڈیرہ بگٹی ءِ نوگو ایریا ءِ ھلاس کنگ ءِ ھم پرمان داتگ ۔ دومی نیمگ ءَ سبی ءِ یک انٹی ٹیرسٹ عدالتے ءَ اکبرخان بگٹی کوش ءِ سر ءَ پاکستان ءِ پیشگیں صدر جنرل ریٹائرڈ پرویز مشرف ، پاکستان ءِ گْوستگیں سر وزیر شوکت عزیز ،تھی کارانی وزیر آفتاب احمد شیرپائو ، چیردستیں بلوچستان ءِ ریاستی گورنر اویس احمد غنی ءُ پیشگیں کاسگ چٹیں سروزیرجام یوسف ءِ دزگیری ءِ پرمان داتگ ۔ پاکستانی سپریم کورٹ ءِ چیف جسٹس افتخار محمد چوھدری ءِ سروکی ءَ سئے کسی بنچ ءَ بلوچستان بے ایمنی ءِ نام بستگیں کیس گوش داشتگ  ۔ کیس ءِ گوشدارگ ءِ میان ءَ چَہ بلوچستان ءِ کاسگ چٹیں  تھی کارانی سیکریٹری نصیب اللہ بازئی ءَ جست کنگ بوتگ کہ اُستمان ءَمردماں  کئے کشگ ءُ چگل دیگ ءَ اِنت ۔ اے بنچ ءِ تہ ءَ افتخار محمد چوھدری ، عارف خلجی ءُ جسٹس جواد ایس خواجہ ھوار اَنت ۔ پاکستانی آمیدگس ءَ تھی کارانی کاسگ چٹیں سیکریٹری پرمان کرتگ کہ باند ءَ لیوز ءُ پولیس ءَ دست کپتگیں میتانی سرجمیں لڑ ءُ ھالاں عدالت ءَ پیش بہ دنت ۔ آمیدگس ءَ ھژدہ فروری دوھزار یازدہ ءَ چَہ توتک خضدار ءَ آوار جنگ ءُ بیگواہ کنگ بوتگیں مردمانی ھم آمیدگس ءَ پیش کنگ ءِ پرمان داتگ ۔آمیدگس ءَ گوں ایف سی ءِ وکیل ءَ گْوشتگ کہ اگاں مردماں میارے کرتگ آھانی سر ءَ ماں آمیدگساں کیس کنگ بہ بیت یا یلو کنگ بہ بنت ۔ چَہ مستونگ ءَ آوار جتگیں ورنا ظفراللہ ءِ مات ءَ گوں گْریتگیں چمے چَہ چیف جسٹس ءَ  لوٹ اِتگ کہ آئی ءِ بچ درا کنگ بہ بیت پمیشکا چیف جسٹس ءَ پولیس ءُ ایف سی پرمان کرتگ اَنت کہ داں باند ءَ ظفراللہ آمیدگس ءَ آرگ بہ بیت ۔ چَہ ڈیرہ بگٹی ءَ آوار جتگیں مردمانی کیس ءِ گوشدارگ ءِ میان ءَ چیف جسٹس ءَ گوں کاسگ چٹیں سیکرٹری بلوچستان ءَ جست کرتگ کہ ڈیرہ بگٹی پرچا پہ ھندی ءُ ڈنی مردماں نوگوایریا جوڑ کنگ بوتگ ۔ آئی ءَ پرمان داتگ کہ گوں توامیں ٹک ءُ بولکانی ھمدست ءُ ھمشورے ءَ  پہ ڈیرہ بگٹی ءِ مردمانی پھریزگ ءَ گامگیج زورگ بہ بیت ۔ آمیدگس ءَ کاسگ چٹیں بلوچستان ءِ سروزیر اسلم رئیسانی ءِ برازتگ ھمل رئیسانی ءِ کوش ءِ سر ءَ برجم کرتگیں پٹ ءُ پولی رپورٹ نہ من اِتگ ءُ پنچشمبے ءِ روچ ءَ آئی جی بلوچستان ماں آمیدگس ءَ لوٹ اِتگ۔