بام ھال ءِ نوکیں دروشم ءُ آئی ءِ کارمرد

Thursday, June 28, 2012

بے توشگ ءُ کلی ءَ بنا کرتگ سپر ءَ ھم بام ھال ءِ کارمنداں دمبرگ نہ زانتگ ءُ گوں ھالرسانی ءِ نوکیں دور ءَ وتا ھمدپ کنگ ءِ جھد برجاہ داشتگ ۔ انچوش کہ دگہ تک ءُ پھناتاں نوکی ءُ چَہ شر ءَ شر تر ءِ شوھاز برجاہ اِنت ھمے پیم ماں وب ءَ ھم وب ساچ ءُ ترامکار نوکیں تکنیک ءُ راھبند شوھاز کنگ ءَ اَنت داں روچ پہ روچ مستر ءُ شاھگان بیوکیں اے وب ءُ انٹر نیٹ ءِ دنیا ءَ چاروکاں گشادی ءَ چَہ گیش ءَ گیش مالومداری رسینگ بہ بیت ۔ پہ ھالرسانی شنگ بیوکیں وبتاکاں اے گیشتر ھژدری بوتگ کہ آ ماں انچیں وڑے ءَ ھال شنگ بہ کن اَنت کہ وانوک ءُ چاروک کمتریں وھد ءُ پاسانی تہ ءَ گیش ءَ گیش ھال ونت بہ کن اَنت ۔ بام ھال ءَ چَہ اولی روچ ءَ وتا گوں نوکتریں وبتاکاں نزیک کرتگ بلے اے پہ یک بلوچی زبان ءَ شنگ بیوکیں وبتاکے ءَ اَرزانیں کارے نہ اِنت پرچا کہ گیشتر وب اسکرپٹ ماں انگریزی ءُ پہ ایل ٹی ایل زباناں جوڑ کنگ بوتگ اَنت وھدے کہ بلوچی آر ٹی ایل بزاں رائٹ ٹولفٹ نویسگ بیوکیں زبان اِنت پمیشکا چَہ بازیں جھد ءُ تکانسری ءَ پد ھم مئے وبتاک ءِ تہ ءَ بازیں نزوری یے منتگ کہ گیشتر ھمے اسکرپٹانی نادلسری ءُ نہ مرینگ ءِ سبب اِنت ۔ بام ھال ءِ نوکیں دروشم ءِ تہ ءَ بازیں نوکیں آسراتی ھوار کنگ بوتگ ۔ جھل ءَ ھمے آسراتی ءُ آھانی کارمرد ءِ سوج داتگ اَنت۔

پہ وانگ ءَ شرتریں براوزر

وبتاک ءِ پیش دارگ ءَ براوزر ءِ مزنیں بستارے چوناھی ءَ مانیٹر ءِ رنگ ، گرافک ءُ اسکرین ریزولیشن ھم وبتاک ءِ دروشم ءُ پیش دارگ ءِ سر ءَ اسرمند بنت بلے براوزرانی وب سائٹانی رنگ ءُ دروشم ءِ پیش دارگ ءَ کرد چد ءُ مستر اِنت ۔ بام ھال ءِ وبتاک چوناھی ءَ توامیں براوزرانی تہ ءَ جوانی ءَ کارکنت بلے ' فائر فاکس ' ءِ تہ ءَ دروشم گیشتر براھدارتر ءُ ڈولدار گندگ بیت ۔انٹرنیٹ ایکسپلورر ءِ تہ ءَ بوت کنت وبتاک کمے بے رنگتر گندگ بہ بیت ۔ جھل ءَ پہ ڈاون لوڈ ءَ فاَئرفاکس ءِ تندجاہ ءِ لنک داتگ۔

موزلا فائرفاکس

بام ھال موبائل ورژن

ماں موبائل ءِ تہ ءَ بام ھال موبائل کیپسٹی ءِ ھساب ءَ گندگ بیت البت باز موبائل براوزرانی تہ ءَ دنیگت اے گنجائش نیست کہ آ ماں وبتاکانی تہ ءَ داتگیں اسکرپٹاں ونت بہ کن اَنت ءُ ھما ھساب ءَ پش بہ دار اَنت ۔'' اوپیرا منی '' پہ بلوچی وانگ ءَ چَہ درساں شرتریں موبائل براوزر اِنت البت اوپیرا منی بلوچی نوشتانی زبر زیراں پیش نہ دار اِیت ۔ جھل ءَ پہ شمئے کمک ءَ اوپیرا منی ایرگیجگ ءِ لنک داتگ ۔

اوپیرامنی

بام ھال ءِ روتاکی دروشم ءَ گندگ بیوکیں گستاک

بام ھال ءِ گستاک روتاکی سرتاک ءِ پیم ءَ ترامگ ءُ نچینگ بوتگ ۔ ھمک بنگپانی ھال جتا جتا جاھانی تہ ءَ گندگ بنت ۔ ھالانی اَرزش ءِ ھساب ءَ ، سرمچار، بلوچ راجدوست ، پاکی سرکار آوار جتگیں ، پاکی سرکار کشتگیں ،رودرتکی بلوچستان ، روکپتی بلوچستان ، مزن ھور ، ایران ، اوگانستان ، پاکستان ،جھان ازم ، ادب ءُ شاتکامی ،سائنس، سندھو دیش ، سسا ءُ ٹپاس ءُ دگہ بنگپانی سر ءَ شنگیں ھال جتا جتا گندگ بنت ۔ ،
چَہ ایشاں ابید بام ھال ءَ شنگ بوتگیں نوشتانک ءُ چمشانک ھم گستا جاہ داتگ اَنت ءُ یک جاھے ھما ھال اَنت کہ چَہ درساں گیشتر چارگ بوتگ اَنت ۔
گستاکءَ جھل ءَ سلائیڈرے ءِ تہ ءَ بام ھال ءَ شنگ بیوکیں ھکس اَنت کہ گوں داتگیں بٹن ءَ راست ءُ چپی نیمگ ءَ سُر اَنت ۔ بے بٹن ءَ ھم اے ھکس وتکاریں رنگے ءَ سُر اَنت ۔ بام ھال ءِ گستاک ءَ داتگیں لھتیں دگہ آسراتی اے پیم اَنت۔

سرھال :

وبتاک ءِ درساں برز تر نوکیں ھالانی سرھال وتکاریں رنگے ءَ بدل بنت ۔اے سرھالانی سر ءَ کلک کنگ ءَ گوں سرجمیں ھال پچ بنت ۔

لنکس بٹن :

چَہ بینر ءَ جھل لنکس بٹن داتگ اَنت ۔
وش اَتک : اے گستاک بزاں ھوم پیج لنک اِنت ۔
پجاروکی : اے تاک ءَ بام ھال ءِ درگت ءَ مالومداری داتگ ۔
ھمگرنچی :اے لنک ءِ تہ ءَ بام ھال ءِ جوڑ کرتگیں سوشل نیٹورک ءِ تاکانی لنک داتگ اَنت ۔ماں سوشل نیٹورکنگ تندجاھانی تہ ءَ بام ھال گوگل پلس ، بام ھال ءِ فیس بک تاک ءُ بام ھال ءِ ٹیوٹر تاک ءَ ابید بام دوستانی دیوان ءِ نام ءَ ماں فیس بک ءِ یک گروپ تاکے ءِ لنک ھم ھوار اِنت ۔ اے گروپ ءِ تہ ءَ سیاسی ، چاگردی ، لوزانکی ءُ زند ءِ ھمک تک ءُ پھناتانی سر ءَ ھیال درانگازی ءُ ھبر ءُ ھال بیت بلے پہ توامیں دوستاں اے ڈَک جنگ بوتگ کہ ابید چَہ بلوچی زبان ءَ دگہ زباناں ھبر ءُ ھال کنگ مہ بیت ۔
تیزگام :پہ ھما چاروکاں کہ انٹرنیٹ اِش سست اَنت تیزگام ءِ لنک داتگ چَہ اے لنک ءِ کلک کنگ ءَ بام ھال سادھیں دروشم ءَ گندگ بیت ۔ اے دروشم ءِ تہ ءَ ھالانی گشاد چارگ ءِ آسراتی نیست البت سادہ بوگ ءِ سبب ءَ توامیں ھال یکیں لڑ ءَ گندگ بنت ۔
مئے وبتاک:اد ءَ بام ھال ءِ نیمگ ءَ شنگ بوتگیں دگہ وبتاکانی لنک داتگ اَنت ۔

شوھاز :

پہ ھالانی شوھاز کنگ ءَ سرچ بکسے بزاں شوھاز جاھے داتگ ۔ ھما بنگپ ءَ شوھاز کنگ لوٹ اِت ھمے شوھاز جاہ ءِ تہ ءَ بہ نویس ءُ انٹر ءِ بٹن ءَ بہ جن ۔

سوشل نیٹورکانی بٹن :

شوھازجاہ ءِ کش ءَ سوشل نیٹورکس یوٹیوب ، گوگل پلس ، ٹیوٹر ءُ فیس بک ءِ بٹن داتگ اَنت ۔

سب اسکرائب بٹن ءُ سب اسکرائب کنگ :

سوشل نیٹورک ءِ بٹانی تہ ءَ یک بٹنے سب اسکرائب ءِ ھم داتگ ایشی ءِ سر ءَ کلک کنگ ءَ بام ھال ' فیڈ برنر' ءِ سب اسکرائبنگ سروس ءِ تہ ءَ پچ بیت۔

اگاں تاک سب اسکرائبنگ دروشم ءِ بدل ءَ جھل ءَ داتگیں دروشم ءَ پچ بیت گڑا چَہ داتگیں لڑ ءَ ریڈرے گچین یا ' ویو فیڈ ایکس ایم ایل' ءِ سر ءَ کلک کن ۔

چَہ ایشی ءِ کلک کنگ ءَ تاک برز ءَ گوں مزنیں سب اسکرائب بٹن ءَ پچ بیت ' سب اسکرائب نائو' ءِ بٹن ءَ کلک کنگ ءَ پاپ اَپ ونڈوے پچ بیت آ اُود ءَ ھم اسب اسکرائب ءِ بٹن ءَ کلک کن۔

چَہ ایشی ءَ براوزر ءِ بک مارک ٹول ءِ تہ ءَ بام ھال ءِ یک بٹنے گندگ بیت ھمے بٹن ءِ کلک کنگ ءَ توامیں نوکیں ھالانی سرھال گندگ بنت ۔ چَہ ایشی ءَ شما ابید چَہ بام ھال ءِ وبتاک ءَ روگ ءَ نوکیں ھالاں ونت کن اِت ۔

اگاں شمئے براوزر ءِ تہ ءَ بک مارک ٹول گندگ نہ بوگ ءَ اِنت براوزر سیٹنگ یا آپشنزانی تہ ءَ برو اِت ءُ چَہ ھمود ءَ بک مارک ٹول ءِ آپشن ءَ 'چیک 'بہ جن اِت داں گندگ بہ بیت ۔
بنگپ :
ایشی ءِ تہ ءَ بام ھال ءَ شنگ بوتگیں توامیں ھال ماں بنگپانی ھساب ءَ داتگ اَنت شما ھرچ بنگپے گچین بہ کن اِت سر ھال ماں یکیں تاک ءَ لڑ بنت ۔

چَہ ای میل ءَ ھال گرگ :

شما اگاں بام ھال ءِ ھالاں وتی ای میل ان بکس ءَ وانگ لوٹ اِت وتی ای میل ایڈریس ءَ ھمے بکس ءِ تہ ءَ بہ نویس اِت ءُ کلک بہ کن اِت ۔ شمارا بام ھال ءَ شنگ بوتگیں توامیں نوکیں ھال چَہ ای میل ءَ سر بنت ۔

ھالانی پُتینک :

ھالانی پتینک یا آرکائیوز ءِ تہ ءَ بام ھال ءَ شنگ بوتگیں ھال ماہ ءُ سالانی ھساب ءَ ایر اَنت ۔ ھرچ ماہ ءِ ھال ھما ماہ ءِ ھالانی تہ ءَ ماں یکیں لڑ ءَ گندگ بنت ۔

نکان تاک

چَہ سوشل نیٹورکنگ کڈکانی تہ ءِ لنکاں بام ھال ءِ گستاک ءِ بدل ءَ نکان تاک پچ بیت ۔ آئی ءِ تہ ءَ ھم بازیں نوکیں آسراتی دیگ بوتگ ۔

فیس بک لائک بٹن :

فیس بک ءَ ھال ءِ دوست کنگ ءُ شنگ کنگ ءِ ھال ءِ سرھال ءِ چیر ءَ بٹنے ھست ۔ کلک کنگ ءَ ھال فیس بک ءِ وال ءِ سر ءَ شنگ بیت ۔

شیئر بٹن :

نکان تاک ءَ ھرچ ھال ءِ چیر ءَ سوشل نیٹورکانی شیئر بٹن داتگ اَنت ایشانی سر ءَ کلک کنگ ءَ ھال وتکاریں رنگے ءَ چاگردی کڈکاں شنگ بیت ۔

ھمے درگت ءَ دگہ ھال :

ھرچ ھال ءِ چیر ءَ ھمے بنگپ ءِ سر ءَ دگہ لھتیں ھالانی ' سرھال ' داتگ اَنت چَہ ایشی ءَ وانوک ھمے بنگپ ءِ سر ءَ شنگ بوتگیں کوھنیں ھالاں سرپد بنت ۔

چمشانکجاہ :

بام ھال ءَ پہ وانوکانی چمشانکانی شنگ کنگ ءَ گچینی دلگوش داتگ ۔ پہ چمشانک ءَ چمشانکجاہ ءِ تہ ءَ وتی ھیال ءُ چمشانک ءَ نویسگ ءَ 'چَہ کمنٹ از ' ءَ یکے ءَ گچین ، اے لڑ ءِ تہ ءَ گوگل ، لائیوجنرل ،ورڈپریس، اوپن آئی ڈی ءُ دگہ اکاونٹانی پجیگ ءَ

Anonymous
بزاں نامعلوم ءُ 'نیم آر یو آر ایل ' داتگ اَنت ۔ اگاں شما وتی نام ءَ چیر دیگ لوٹ اِت یا وتی جند ءِ نام ءَ چمشانک دیگ لوٹ اِت ءُ شمارا چَہ برز ءَ داتگییں لڑ ءَ اکاونٹ نیست گڑا ' نیم آر یو آر ایل ' ءَ گچین ۔

نام ءِ جاہ ءَ وتی نام ءَ بہ نویس ءُ یو آر ایل ءِ جاہ ءَ توری ھچ مہ نویس ءُ ھالانی نویسگ ءَ پد پبلش ءِ بٹن ءَ کلک کن ۔

شمئے چمشانک دمانے ءَ پد ھمے ھال ءِ چیر ءَ گندگ بیت ۔ اگاں شما دگرے ءِ چمشانک ءَ پسو دیگ لوٹ اِت گڑا ریپلائے ءِ لنک ءِ سر ءَ کلک بہ کن اِت ۔ شمئے پسو ھمائی ءِ چمشانک ءِ چیر ءَ پسو ءِ ھساب ءَ شنگ کنگ بیت ۔