بلوچ کَسّے وامدار نہ اِنت، بلوچ ءِ کُشت ءُ کوش کنوکیں لشکر ایف۔سی ءَ گیشتر پٹھان اَنت۔ اختر مینگل

بلوچستان نیشنل پارٹی ءِ سروک واجہ اختر مینگل ءَ گُشتگ کہ اے گپ راستے کہ بلوچ ءِ گوں پٹھان ءَ تاریخی ءُ ربیدگی سیادی است۔ بلے اے یک تھلیں راستی ئے بلوچ ءِ دل ءَ گوں تیراں سُمبوکیں لشکر ءَ گیشتر پٹھان اَنت۔ مُلائیں پٹھانانی نیمگ ءَ اگاں چوشیں گپے دیم ءَ کئیت تہ درد نہ بیت، بلے بزگیں راجانی جنز ءِ گپ جنوکانی نیمگ ءَ چوشیں گپانی دیم ءَ آیگ ءَ باز بژن بیت۔ بلوچ وت ایردست اِنت۔ اگاں پٹھان غلام اَنت تہ ایشی ءِ ذمہ وار بلوچ نہ اِنت۔ پنجاب اِنت۔ اچکزئی ءِ جتگیں گپ ءِ بابت ءَ اختر مینگل ءَ گُشتگ، تاریخ کَسّے ذاتی لوٹ ءُ واھگانی پدا بدل بیت نہ کنت۔آئی ءَ گُشتگ بلوچ کسے وامدار نہ اِنت، اگاں پٹھانانی گپ کئیت تہ اے پدریں مثالے کہ بلوچ ءِ کُشت ءُ کوش کنوکیں لشکر ایف۔سی ءِ گیشتر کاندھانی سیادی گوں پٹھان ھند ءُ دمگاں اِنت۔ بلے ما کدی ایشی ءِ ذمہ وار بلوچستان ءِ پٹھان نہ گشتگ اَنت۔ بلوچ مرچی وت جنگے کنگ اِنت۔ بائد وا ھمیش اَت کہ بلوچستان ءِ پٹھاناں بلوچ ءِ چُک چینی ءِ ھلاپ ءَ توار چِست کُتیں، اختر ءَ مینگل ءَ گُشتگ ھما دمگ کہ تاریخی حوالہ ءَ پٹھان ءِ بھراں تہ بلوچ ءَ کدی آھانی آوار جنگ ءِ گپ نہ جتگ۔ بلے بلوچ وتی تاریخی زمین ءِ بٹکے ھم کس ءَ دات نہ کنت۔